أخبار الاقتصاد

 تأثير قرار تثبيت الفائدة على الاقتصاد ولماذا اختار البنك المركزي هذا القرار؟

كل الناس كانت تنتظر أن تعرف نتيجة قرار البنك المركزي المصري بخصوص سعر الفايدة، و الأمر اتحسم بالفعل  والبنك المركزي أعلن تثبيت سعر الفائدة.

والسؤال دلوقتي، ليه البنك المركزي اختار تثبيت الفايدة، وده تأثيرها إيه علينا، وهل معنى كده ان مفيش شهادات ادخار جديدة هتنزل البنوك؟

البنك المركزي قرر تثبيت سعر الفايدة عند 18.25% للإيداع و 19.25% للإقراض خلال اجتماع شهر مايو، وكمان تم الإبقاء على سعر الائتمان والخصم عند مستوى 18.75%.

واجتماع اللجنة في شهر مايو جه بعد رفعها سعر الفائدة 2% في اجتماعها الأخير يوم 30 مارس اللي فات، ومن قبلها تثبيت الفايدة في يناير اللي قبله.

وفعلا خبراء الاقتصاد أغلبهم توقع إن البنك المركزي هيلجأ لقرار التثبيت بشرط إنه ميحصلش خفض جديد لسعر الجنيه مقابل الدولار.

وده الكلام اللي قالوا مصرفيون في وقت سابق لـ مصراوي أكدوا في إن البنك المركزي هيثبت سعر الفائدة في اجتماع لجنة السياسة النقدية،
خاصة بعد تراجع معدل التضخم خلال شهر أبريل وتثبيت سعر الصرف خلال الفترة اللي فاتت.

وده لأنه تراجع معدل التضخم السنوي لإجمالي الجمهورية الشهر الماضي لـ 31.5% مقابل 33.9% في مارس اللي فات

ومش بس كده ده كمان سجل معدل التضخم السنوي في المدن خلال أبريل اللي فات 30.6% مقابل 32.7% في مارس اللي قبله، ودي المؤشرات الأخيرة اللي أعلنها بيان من الجهاز المركزي للتعبئة العامة والإحصاء.

أما بقا المعدل السنوي للتضخم الأساسي- واللي بيعمله البنك المركزي شهريا فـ خلال شهر أبريل اللي فات سجل 38.6% مقابل 39.5% في مارس 2023 .

وبيستهدف البنك المركزي تراجع معدل التضخم لـ 7% بزيادة أو أقل 2% بنهاية ديسمبر 2024 وده عشان يتراجع لـ 5% بزيادة أو أقل 2% في نهاية 2026.

 تأثير قرار تثبيت الفايدة على الاقتصاد

حسب تصريحات محمد عبد العال الخبير المصرفي، قرار الإبقاء على سعر الفايدة وعدم رفعها هيخلي الاقتصاد المصري يتجنب أي زيادة في الأعباء الخاصة بتكلفة الاقتراض سواء على القطاع الخاص أو الحكومة وكمان هيتجنب زيادة التضخم.

عبد العال كمان قال إن أي ارتفاع في سعر الفايدة هيحصل دلوقتي هيزود سعر العائد على أذون الخزانة واللي بتعتبر واحدة من أهم الأدوات التمويلية اللي بتطرحها الحكومة بشكل أسبوعي لسد عجز الموازنة.

وحسب وزير المالية كل زيادة 1% بسعر الفايدة بتكلف البلد 32 مليار جنيه.

أما سهر الدماطي الخبيرة المصرفية فكانت بردو مع اتجاه إن البنك المركزي هيثبت الفايدة خاصة وده عشان يتفادى الآثار السلبية اللي بتحصل لو رفع الفايدة في قطاع البنوك ومجتمع الأعمال.

وقالت في تصريحات لـ موقع مصراوي إن الاستمرار في زيادة الفايدة كان هيتسبب في مخاطر منها تراجع معدل الاقتراض من البنوك

وعن احتماليه طرح شهادات جديدة بعد قرار البنك المركزي بتثبيت الفايدة:
استبعدت سهر الدماطي، طرح شهادات ادخار جديدة بفايدة أعلى، وخصوصا مع وجود شهادات بفايدة تترواح من 19 إلى 22% في البنوك.

ومن أشهر الشهادات دي الشهادة البلاتينيه في البنك الأهلي، وشهاده القمة وابن مصر في بنك مصر.

ودلوقتي بقى قولنا رأيك في قرار البنك المركزي؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى