هي حبة الفراولة في حياة أبوها سيطرت على قلبه وعقله وعمل لها كل ما تتمناه. التي نتحدث عنها هي سارة بنت الزعيم عادل إمام التى تتسبب في حالة من القليان على السوشيال ميديا عند ظهورها.
طيب لما هي جميلة كده ليه أبوها الزعيم كان بيخبيها من الكل.. وإيه هو سرْ اختفائها ده يا ترى ليه بتكره الفن ومش بتحب الممثلين ومين الشخص اللي اتجوزته وكان في اعتراض على الجوازة دي من حسني مبارك نفسه.
في التقرير ده هقولكم ليه سارة بنت عادل إمام مبتظهرش كتير وشوفناها من يومين كده في حفل خطوبة ابن أخوها رامي إمام واللي يبقى حفيد الزعيم الأول.. وهل جوزها ليه يدْ في اختفائها وإبعادها عن الأضواء ولا إيه الحكاية بالظبط؟.. طيب ليه رغم جماله ووشها المقبول قدام الكاميرا باباها رفض إنها تمثل وبقت مبتحبش الفن؟.. يلا بينا نعرف الحكاية.
سارة بنت عادل إمام مش زي اخواتها محمد عادل إمام اللي دخل التمثيل ورامي إمام اللي دخل الإخراج.. أصل أبوها رفض إنها تمثل وغالبا هي رسمت طريق كده لنفسها تكون بعيدة فيه عن الشو والإعلام والأضواء والكلام ده.. أبوها طبعًا عنده أسبابه اللي تخليه يحكم على بنته متمثلش.. وكمان هي سمعت الكلام ومش بتظهر دلوقتي كتير يعني كل سنتين مرة مثلًا رغم إنها بنت الزعيم وخلاص اتجوزت وتقدر تحكم إذا كانت تظهر على السوشال ميديا أو لأ.
ظهور متباعد
كان في إطلالة بسيطة كده ظهرت فيها سارة عادل إمام بنت الزعيم وده ظهور نادر ليها وهي اختارت بنفسها تكون بعيدة عن الشو والأضواء عشان هي اتربت في بيت أبوها على كده وكمان لما كبرت بقت تكره تظهر قدام كاميرا أصلا.. وفي صورة ليها نشرها موقع القاهرة 24 من حوالي أسبوعين، وده كان بعد سنتين من صورة نشرها الصحفي علاء حكيم ليها، يعني ظهورها محسوب.. ومن كام ساعة كانت في مناسبة عائلية مع أخوها رامي اللي شاركته فرحته بابنه اللي خطبة وهيتأهل ويدخل دنيا مع حب عمره.. قبل كده شوفنا سارة في فيديو على تيك توك مع بنتها وكمان ظهرت في حفل أحمد عمرو عرفة ابن المخرج المعروف يعني ظهورها يتعد على الصوتيه زي ما بيقولوا.
مين هو جوزها
دايمًا شايفين إن في علاقة كويسة بين الرئيس الراحل محمد حسني مبارك وبين الفنان عادل إمام، ده طبيعي لأنه واحد من أهم النجوم على الساحة ولحد وقتنا ده ليه مكانته في العالم العربي كله لكن إن عرش العلاقة المتينة بين مبارك والزعيم دي اتهدت بسبب سارة بنته.. وده اللي مكنش حد يتوقعه أبدًا الحكاية كلها بسبب جوازة بنت عادل إمام واللي بسببها قال مبارك الجوازة دي مش لازم تتم.
الحقيقة سارة بنت عادل إمام كانت وقعت في قصة حب مع عريس كان مبارك رافضه.. وسارة من مواليد سنة 1977 يعني عندها 44 سنة دلوقتي وهي الابنة الوسطى لعادل إمام وباباها كان عنده إصرار ميسمحش ليها بالتمثيل ودخول الوسط الفني.. وسارة أو ساسو زي الزعيم ما بيناديها تبقى خريجة إعلام الجامعة الأمريكية واتجوزت من زميلها في الدراسة واللي كتبت كتابها شيخ الأزهر الأسبق محمد سيد طنطاوي وده كان سنة 2004.
لما علاقة حب اتطورت بين سارة وزميلها في الجامعة الأمريكية واسمه أحمد مقبل وده يبقى ابن القيادي الإخواني نبيل مقبل، هوب العلاقة دي اتوجت بخطوبة رسمي وده بقى اللي زعل حسني مبارك لدرجة إنه جاب عادل إمام وقاله إنه مش راضي عن الجوازة دي ولازم يوقفها (إزاي الكلام ده يا جدع)، ببساطة كده مبارك كان بيشوف إن الجوازة دي فيها اختراق إخواني لعيلة عادل إمام اللي يعتبر محسوب على السلطة، وكمان الإخوان كانوا رافضين الجوازة دي لإن عادل كان بيهاجم التيارات دي في أعماله الفنية بس الزعيم رفض خالص واتحدى الريس.
وقتها عادل إمام مش يسكت بقى لأ ده بلغ الريس مبارك إن دعوات حفل الزفاف اتطبعت واتوزعت وهوب راح باعت دعوة لحسني مبارك كمام زي ما يكون بيتحداه بس الريس رفض حضور الزفة ده وكمان جمال وعلاء رفضوا.. وقتها اتطورت الأمور بين الزعيم ومبارك لدرجة إن مبارك فكر يطرده بره مصر بس واحد من اللي بيعاونوا مبارك حذره من الخطوة دي عشان شعبية عادل إمام وعلاقاته في الدول العربية فمكانش قدام الريس غير الاضطهاد واتعرض عادل إمام لمضايقات زي العراقيل اللي اتحطت قدام فيلمه “السفارة في العمارة”.
رفض التمثيل
عادل إمام رفض دخول بنته الوسط الفني وحتى الإعلامي رغم إنها اتخرجت من كلية الإعلام بس هو قالها مفيش ظهور خالص.. رغم إنها خفيفة الظل وبيشببها بـ حبة الفراولة.. بس موضوع التمثيل ده بقى اتقال إن الزعيم رفض بسبب العادات والتقاليد اللي يرفضها في مجال التمثيل زي القبلات وغيرها.
