من قال ان الفلوس ليست كل شئ، ونحن لا نعمل من أجل الفلوس، فهل رأيتوا عمرو دياب وكيف جمع ثروته وما قيمتها؟ تابعونا من خلال التقرير التالي لمعرفة التفاصيل:
مبقاش حد في العالم ولا في مصر يقدر يخبي هو معاه كام.. الفنان من دول أرقام حساباته في البنوك وقيمة ثروته بتتعرف بسهولة، حتى أرقام التعاقدات الجديدة والشراكات مع كيانات كبيرة، بتتعرف برضه.
ومن ساعة ما تم الإعلان عن قايمة أغنى الممثلين في العالم.. وكان فيها أسماء قوية زي الروك وشاروخان وتوم كروز.. لازم طبعا الناس تسأل، طب هو فين الهضبة بتاعنا، عنده قد ايه ده؟
عمرو دياب الحقيقة جنب اللي شفناه في قائمة الأغنى اللي وصلت لـ مليار دولار، طلع غلبان خالص، بعد 40 سنة شقى وشغل وغنا هنا وهناك، وحقق شعبية كبيرة، إلا إنه مكنش في قائمة أغنى المطربين العرب حتى لغاية فترة قريبة جدا.
الهضبة لما لقى نفسه مشهور بس ثروته مش قد كده، بدأ يعمل نشاط اجتماعي ونشاط ثقافي، قصدي يعني ينوع مصادر دخله، من هنا ألبوم على حفلة جوه وبره بقى.. وفلوس الخليج كتيرة اليومين دول، فا نزود الحفلات عندهم شوية.
لدرجة إنه حتى دخل مجال تنظيم الحفلات والإيفنتات، وده بقى النشاط التجاري.. عمرو دياب سأل نفسه.. هو أنا هفضل “مهما كبرت صغير” لحد امتى؟ ويعني أنا هفضل أغني كده على طول.. طب يوم ما أبطل الشغلانة دي هعمل ايه
وعلى طول كانت الخطوة الجديدة.. إنه يدخل في شراكات واستثمار عقاري، ويبقى شريك في مشروعات كبيرة ومولات ونايت كلوب.. كله كله.
طب بعد كل ده عمل قد ايه الهضبة؟.. وصلت ثروة عمرو دياب مؤخرا لـ 45 مليون دولار.. وطبعا ده في اليومين اللي فاتوا بقى رقم وهمي بالمصري.. خصوصا بعد ما اتعاقد مع تطبيق أنغامي.. وباع كل أغانيه ليهم مقابل إنهم يذيعوها حصريا
متخيلين أنغامي دفعوا كام لـ عمرو دياب عشان يمسح فيديوهاته من على يوتيوب ويتخلى عن فلوسه؟.. اللي فاده أكتر كمان إن التطبيق نزل أسهمه في البورصة الأمريكية.. فوايد هنا وهناك .. ووالعة معاك يا هضبة.
عمرو دياب دخل عالم البيزنس من حوالي سنتين.. قالك الجمهور بيحب كل حاجة من ريحته.. يبقى ننزل برفيوم الهضبة.. شياكته وأناقته سر جماله.. نعمل لبس على طريقة الهضبة.. وكله بيتباع .. ومش بس كده بقى كل حاجة عنده في الماركة اللي عملها بتجيب فلوس.. نضارات إكسسوارات .. مخلاش.
السنة الجاية الحفلة في الساحل هتبقى عند الهضبة.. مشروع الفندق الجديد بتاعه في مراسي هيخلص.. وهيعمل سلسلة ما بين مصر ودبي.. تصميماتها وديكوراتها فخمة.. حاجة كده هتبقى شبه المالديف.. ويا عالم ممكن يعمل بيزنس في ايه تاني.. بس اللي لازم فعلا نكلم عنه ان ثروة الهضبة عمرو دياب مجتش بالصدفة ومفيش فنان في مصر عنده ثروة ضخمة بالشكل ده حتي محمد رمضان اللي بيقول علي نفسه نمبر وان ثروتة متجيش نص ثروة الهضبة كمان نجم الجيل تامر حسني اللي بيالف وينتج ويخرج ويغني ويمثل معندوش ربع ثروة الهضبة وعشان كده عمرو دياب هيفضل في حتة لوحده.
