مع تألق كهربا أمام الهلال السوداني فإدارة النادي الأهلي ناوية تكيد المستشار مرتضى منصور، وتعمل على ذلك الآن بقرارات مهمة بشأن كهربا، ولكن بطريقه ينتقموا فيها من المستشار مرتضى منصور، وتجعل كهربا يلعب رغما عنه.
إزاى الأهلي هيعمل كده؟ وإيه اللى هيغيظ مرتضى منصور؟ .. كل ده وأكتر هنعرفه مع بعض في التقرير التالي:
جمهورنا بتاع الكوره، اظن كلكم دلوقتى تابعتوا ماتش الاهلي و الهلال السودانى واللى عمل فيه كهربا شغل عالى جدا، خلاه إسم على مسمى فعلا ” الفولت العالى” وأظن أن المستشار مرتضى منصور دلوقتي متغاظ منه ومستحلفله، ومش ها يحل أبدا عن الغرامة اللى عليه، وكله بهدف أنه يبطله لعب.
بس من الواضح كده أنه هيتغاظ ويضايق أكتر بعد لما يعرف ان كابتن خالد مرتجى، أمين صندوق النادى الأهلى ما قال إن كهربا هيسدد الغرامة اللى عليه وهيلعب غصب عن مرتضى منصور، ومش هيبطل كوره تانى ابدا، وكمان هيسددوا الغرامة با أكتر طريقه تغيظ المستشار مرتضى منصور، وهى أنهم هيحطوا الفلوس في حساب نادى الزمالك اللى ممدوح عباس واخد حكم عليه ومحجور عليه.
يعنى مرتضى هيطلع من الغرامة يا مولاي كما خلقتني، أبيض معهوش جنيه من فلوس كهربا، وفى نفس الوقت هتسقط العقوبات اللى على كهربا، وهيرجع يلعب تانى ويشارك مع النادى الأهلى فى كل مبارياته، ويعمل زي ما عمل فى ماتش الهلال السودانى، يمتعنا بالأهداف.
والفكرة بقى ان كهربا دلوقتى اخد دفعة معنوية قوي من كل أداره النادى الأهلى، الكل بيتكلم عليه بشكل كويس خالص، ده حتى قال عليه خالد مرتجى أنه “تحمل ما لا يتحمله أحد، وكافح وظهر بمستويات رائعة، وسيسدد الغرامة المقررة ضده لصالح الزمالك للاستمرار مع الفريق”، وكمان عدد كبير من لاعبين الأهلى أكدوا أنهم على أتم استعداد لمساعدة كهربا فى تسديد الغرامة اللى عليه، منهم كابتن الشناوي وعلى معلول، وزيد عليهم كابتن أمام عاشور لاعب الزمالك السابق واللى حاليا محترف بره، ده قال مع رامز جلال فى البرنامج بتاعه أنه على أتم استعداد أنه يسدد جزء من الغرامه بالنيابة عن كهربا، شفتم بيحبوا كهربا ازاي.
تفتكروا القرارات دى هتغيظ المستشار مرتضى منصور فعلا ولا لأ، خصوصاً وأنه يادوب لسه امبارح كان بيتكلم على المشكله دى، ومستغرب أن كهربا مش هامه يعنى ولا شاغل باله بموضوع الغرامة، وكمان مندهش أن مافيش ولا قرار دلوقتي لإيقاف كهربا، كلها قرارات بيستأنف فيها.
اللى شايف فيكم أن كهربا يستحق يرجع يلعب تانى براحته يكتب في الكومنتات، واللى شايف العكس بردوا يقول، بس الكل يقول أسبابه، وكمان اللى تابع منكم الماتش بتاع الهلال يقول رأيه إيه فى الأداء اللى ظهر بيه كهربا في المباراة.
