فن و مشاهير

أغرب حيل النجوم لركوب التريند في مسلسلات رمضان

وسط سيل الأعمال الفنية التي تعرض على القنوات حاليا، بسبب الموسم الرمضاني، يحاول كل نجم أو منتج، أو مخرج، أو صناع الأعمال عموما، إنهم يقدروا يوصلوا للمعادلة التي تسمح لهم إن العمل يحقق نسب مرتفعة من المشاهدات.

وبالذات في أول كام حلقة، عشان يقدر إنه يضمن متابعته طول الشهر، لأن المنافسة كبيرة، والموضوع مش سهل خصوصا إن كل النجوم نازلين بتقلهم، والدعاية مالية الدنيا..

صناع الدراما بقوا بيلجأوا لبعض الحيل خصوصا في موسم رمضان عشان يضمنوا إنهم بخطفوا عين الجمهور، ويقدروا إن هما يحققوا نسب مشاهدات معقولة لمسلسلاتهم، وبالذات في أول الحلقات، لأن دي غالبا اللي بيتبني عليها نجاح أو فشل المسلسل كله خلال الموسم.

ومن بين الحيل دي الاستعانة بالبلوجرز أو بعض المشاهير اللي مش ممثلين، ولكن شوية فيديوهات ليهم ودعاية منهم بتكون هي دي المطلوبة، المهم يعني إنهم يظهروا في العمل بمشهد أو لقطة كنوع من الدعاية، عشان يروحوا على صفحاتهم يرجوجوا للأعمال دي.

منهم مثلا الفنانة يسرا اللي بتشارك من خلال موسم رمضان الحالي بمسلسل «1000 حمدالله على السلامة» واللي بتتكلم عن سميحة بطلة العمل وهي الفنانة يسرا، واللي بتيجي من كندا، مع ولادها الاتنين سماح وسامح، واللي بيلعب دورهم مايان السيد وآدم الشرقاوي، عشان يمشوا في إجراءات وصية ميراث.

المهم يعني المسلسل يمكن حظوظه مش الأكبر وسط الصخب اللي حاصل الفترة دي من نجوم وأعمال تاني كتير، ولكن استعان صناع العمل بحيل منها ظهور شاب شبيه اللاعب كيليان مبابي كابتن فريق باريس سان جيرمان، ونجم منتخب فرنسا، وده شاب كل قصته في الحياة إنه بيلبس تشيرتات مبابي ويتصور بيها وحالق نفس حلقته، وعامل نفسه هو، فطلع معاها على أساس إنه يروج للمسلسل على حساباته على مواقع التواصل، وبنفس الطريقة بلوجر تاني بيشبه محمد صلاح وبيعمل إعلانات وعنده حسابات عليها متابعين كتير، عشان هو شبه الملك المصري محمد صلاح.

كمان في مسلسل ستهم، استعان صناع العمل بالبلوجر حليم، عشان يروح يصور فيديو مع الفنانة روجينا بطلة العمل وينشره على حساباته على مواقع التواصل، عشان يعم ترويج للمسلسل، خصوصا إن صفحته عليها 3.5 مليون متابع، ووهو نفسه البلوجر اللي ظهر في مسلسل «سره الباتع» للمخرج خالد يوسف.

كمان تم الاستعانة بالراقصات في الأعمال الفنية السنادي، زي ما شوفنا ظهور لورديانا في مسلسل الكبير، لما كان أحمد مكي بيحلم إنه اتجوزها عشان يصحة لاقي رحمة أحمد في وشه، وإن كل ده كان حلم، ولكن من خلال وجودها تم توليد كوميديا عملت حالة انتشار كويس.

يمكن في طرق تاني للترويج للأعمال الفنية، زي استخدام الجمل الموزونة دي، واللي بتتقال قال يعني بتعبر عن اللغة اللي بيتكلم بيها الناس في الشوارع والمناطق الشعبية، والنوع ده كمان من الكلمات بيتم استخدامه عشان يتم ترويجه على فيسبوك باسم العمل وبطله، فيقدر إن هو يحقق انتشار مناسب ويجتذب أكبر قدر من الجمهور، بـ«حكم التكاتك» زي ما بيقول المتابعين.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى