أي فيلم ينزل ل تامر حسني نكون عارفين انه سيحقق أعلى ايرادات، سواء في مصر أو في الدول العربية، وهذا يكون من ليلة عرضه.. و بعيدا عن ان ناس كثيرة تشكك في حوار الايرادات.
بس المرة ديه المنافسة قوية جدا .. لان دائما تامر بينزل في وقت المنافسة فيه بتعتبر محسومة ليه … اما يكون بينافس كريم عبد العزيز و امير كرارة و احمد فهمي فاكيد هيحاول انه يبقى توب باي شكل .
بدأ موسم افلام العيد .. و المرة ديه بشكل قوي جدا .. من يومين فيلم بيت الروبي اتعرض في السينمات .. و الايرادات عالية جدا لحد دلوقتي .. و رأي الناس اللي شافوه لحد دلوقتي في صالحه جدا .. وان الفيلم يستحق ان الناس تدخله .. وده دائما بيكون في افلام كريم عبد العزيز ..و اللي في كذا فيلم من افلامه محققين أعلى ايرادات في تاريخ السينما المصرية ..
و خلال الايام اللي جاية هيتعرض فيلم البعبع ل امير كرارة واللي راجع بعد غياب سنين عن السينما .. و عامل فيلم كوميدي مع ياسمين صبري .. فانتو متخيلين الخلطة ازاي .. واللي فعلا الناس مستنية الفيلم ينزل .
علشان يشوفوا الحكاية ايه .. لانه كمان بردو رجوع ل ياسمين صبري الشغل تاني بعد ما بعدت عن الدراما و السينما .
و في كمان فيلم مستر اكس ل أحمد فهمي و هنا الزاهد، ومجموعة كبيرة من نجوم الكوميديا .. واللي السبكي بيعرف يعمل التجميعة ديه علشان عارف ازاي ينجح فيلمه .. فمش محتاج مجهود كبير في الدعايا .. كفاية نقول ان بيومي فؤاد و نجوم من مسرح مصر معاهم .. فكده كده هايجيب ايرادات .
المنافسة بتزيد بقى بفيلم تاج ل تامر حسني .. و اللي يعتبر ديه أهم منافسة لاي فيلم من افلامه اللي قدمها .. علشان كده تامر حسني مش هبعتلك. على فكرة انه حقق اعلى ايرادات من اول ليلة عرض .
تامر شغال محاولات انه يسيطر على دماغ الجمهور علشان يدخلوا الفيلم بشكل كبير .. وده من أول اتعلن ان فيلمه هيكون ضمن افلام عيد الاضحى .. واحنا بنشوف حاجات كتيرة بيعملها تامر حسني اولها بوسترات الفيلم .. و انه هيقدم شخصيتين واحد بطل خارق و التاني عادي .
اما البرومو بتاع الفيلم ده قصة لواحده .. لاننا شوفنا فيه كذا حاجة مش عادية .. أولهم ان تامر حسني ظهر مع أسد في السيرك الايطالي .. و بيخليه يعمل حركات بشكل معين .. ماهو خارق بقى .. طبعا المشهد ده ناس كتير علقت عليه .. وقد ايه تامر بقى كريتيف .
الحاجة التانية اللي لعبها بذكاء بردو تامر هو انه عرف يستغل وجود نويل روبنسون .. التيك توكر الالماني الشهير .. واللي بيعمل فيديوهات بتعدي ملايين المشاهدة علشان بيرقص مع الناس و يتصور معاهم .. لقيناه في برومو الفيلم .. و بيرقص معاه .
فيلم تاج عليه كلام كتير من ساعة التحضير ليه .. يعني اول اللي كانوا موجودين كانت الفنانة هنا الزاهد .. و اللي اعتذرت و اتقال ساعتها ان في مشاكل بين تامر و احمد فهمي و هنا .. و هنا ساعتها قالت انها اعتذرت علشان مشغولة باعمال تانية .
وبعدها بايام قليلة تامر حسني اعلن ان مي عمر هي البطلة اللي قدامه .. و صور و حركات و هنعمل شغل حلو يا تامر .. بس اللقطة ديه مفضلتش كتير .. وهوب مي عمر بتعتذر عن الفيلم .. وبعد ما كنا هنعمل شغل حلو مع بعض .. بقت نعوضها في فيلم تاني .. ومحدش قال الاسباب ايه .. و فضلت القصص ترشيحات الفنانات كتير .. لحد ما رسيو على دينا الشربيني انها بطلة الفيلم .
و خلال وقت التصوير كان تامر بينزل صور كتير ليه هو و دينا الشربيني .. لدرجة ان طلعت اشاعات على وجود قصة حب بين تامر حسني و دينا الشربيني .. لان وقتها دينا اعلنت انها بتعيش قصة حب و مقالتش التفاصيل .. بس اما كترت الاشاعات ديه قالت ان حبيبها من برة الوسط الفني خالص ..
ولسه لحد يوم عرض الفيلم تامر هيفضل يعمل حاجات تشد الناس للفيلم … وعلشان يعرف يسيطر على الموسم ده .. قدام افلام قوية زي اللي موجودة .
