جدل جديد حول نجيب ساويرس، يشارك صورة على صفحته على تويتر، فتتحول لخناقة، وكل من ظهروا في الصورة واتهم بالتطبيل قرروا أن يكشفوا المستور، وأول من بدأ عمرو أديب والذي قال له: تطبيلنا “كان له أصوات..إنما تطبيلك كان له أبراج ودولارات”، على الرغم أن ثروة عمرو أديب تقدر بالملايين وليست أصوات فقط ولن تتخيل حجمها.
الناس كلها على السوشيال ميديا كانت بتتكلم على اللي عمله نجيب ساويرس، لما شارك صورة على تويتر فيها الاعلامين: عمرو أديب، وأحمد موسى، ومصطفى بكري، ومحمد الباز، ومعتز بالله عبد الفتاح، وكمان تامر أمين.
والصورة كانت وشوشهم متركبة على اجسام وماسكين “طبلة”، وكاتب فوق الصورة “في واحد ناقص”، لكن بعدها على طول عمرو اديب مسكتش وطلع رد عليه وكتب “إحنا مكسبناش من التطبيل قد ما إنت كسبت من تطبيلك يا نجيب، جايز تطبيلنا كان له أصوات..إنما تطبيلك كان له أبراج ودولارات وياخسارة وعجبي”
نجيب من زمان وهو ملياردير وعنده ممتلكات كتير، لان عيلة ساويرس كلها أغنيا، يعني اتولد وهو غني، لكن الابراج والدولارات اللي عمرو بيقول عليهم دول ولا حاجة، لان ثروته أكبر من كدا بكتير.
لان ثروته وصلت لحوالي 5.7 مليار دولار أمريكي، وكمان نجيب حوّل نص ثروته لذهب، وكان حاصل على المركز 460 في قايمة أغنى أغنياء العالم حسب مجلة فوربس، ده غير انه يعتبر هو المؤسس لـ شركة أوراسكوم تيليكوم القابضة، اللي بقت اهم واكبر شركات القطاع الخاص، وهو كمان ورئيس مجلس الإدارة التنفيذي لها، ومالك ورئيس مجلس إدارة شركة أوراسكوم تي إم تي إنفستمنتس.
وشركة أوراسكوم بقى ليها أكبر حصة رأس مال في البورصة، ده غير انه أسس شركة إن تاتش اللي هي أول شركة إنترنت في مصر، وفضل هو مالك قناة “اون تي في”، لغاية ما اتنقلت ملكيتها لشركة اعلام المصريين في 2016.
وده كله كان متوقع لان معروف ان نجيب ساويرس رجل اعمال كبير، وله استثمارات وممتلكات كتير في القطاع الخاص، لكن اللي كان مفاجأة بقى هو الاعلامي عمرو أديب، بيقبض في السنة حوالي 25 مليون جنيه، لكن اجمالي ثروته بيوصل لـ 42 مليون دولار.
رغم انه مش معروف اذا كان عنده أي ممتلكات أو استثمارات ولا لا، غير انه بس ماسك منصب الرئيس التنفيذي لإذاعة نجوم FM.وكمان رئيس لشركة Good News ورئيس تحرير جريدة العالم اليوم.لكن كمان هو من أهم الإعلاميين دلوقتي في مصر، وبرنامجه بيتكلم فيه عن كل حاجة شاغلة الناس
بس كنتوا تتخيلوا ان ثروتهم توصل للمبالغ دي، ولا كانت حاجة متوقعة؟ وقولولنا مين برضو من المشاهير اتفاجأتوا انه بيمتلك ثروة كبيرة.
