فنانة صعدت بسرعة الصاروخ، الجمهور حبها وأصبحت من أهم نجمات جيلها، مسيرتها الفنية عمرها ليس طويل، ولكن الأعمال التي شاركت فيها كبيرة، وقدرت تؤديها بشكل مميز.
ممثلة تقيلة وليها وزنها على الشاشة، بالرغم من كل ده هي أصلا مكنتش ناوية تبقى ممثلة، ولا درست تمثيل، ولا حتى أهلها كانوا موافقين على دخولها الوسط ده.. هي أسماء جلال
فنانة مصرية من مواليد 1995، وهي واحدة من أهم نجمالت الأجيال الجديدة، عندها موهبة كبيرة، بدايتها كانت من خلال مسلسل الأب الروحي سنة 2017، واللي رشحها للدور ده المخرج بيتر ميمي، ومن هنا مرجعتش خطوة لورا تاني.
أسماء جلال لما قدمت مسلسل غرفة 207، اتقال عليها مونيكا بيلوتشي العرب، ولكن هي بتحب مارلين مونرو ونفسها تجسد قصة حياتها في عمل فني.
يمكن طفولتها والمواقف اللي اتعرضت ليها كانت سبب في إنها بتهتم بإنها كل شوية تعمل جلسة تصوير جديدة تظهر فيها جمالها وتناسق جسمها، لأن وهي صغيرة كانوا بيقولوها متلبسيش شورت عشان رجلك وحشة، وده اللي أفقدها الثقة في نفسها وجسمها.
هي خريجة كلية إعلام، ومكنش عندها طموح التمثيل، قد ما كانت عايزة تطلع زي البنات اللي بيرقصوا في الإعلانات وتبقى مشهورة، فابتدت إنها تقدم في مكاتب خاصة بالتمثيل وحاجات من دي لفترة من الزمن، لحد ما جالها تليفون وقالولها عندك تصوير كمان أسبوع.
الفنانة أسماء جلال علاقتها بوالدها كانت بالنسبالها مهمة جدا، ويمكن هو اللي حاول يدعمها من تحت لتحت ومن ورا والدتها في موضوع التمثيل، ولكن لما والدتها عرفت، توقف عن المحاولات دي تماما، بتقول إنه لما اتوفى وهي في آخر سنة في الكلية، زعلت منه، لأنها مكنتش متخيلة إنه ممكن يحصل ده أبدا، وهو سبب وفاته كان سكتة قلبية، فكانت بتقول للدكتور هاتوا قلب وحطهوله عشان يرجع يعيش تاني، ونزلت القبر عشان تشوفه وتتأكد إنه خلاص راح.
ومن المواقف المهمة هنا إن والدتها مكنتش تعرف إنها دخلت مجال التمثيل بالفعل، غير مرة كانت بتتفرج على مسلسل «كأنه امبارح» وقالتلها شفت بنت شبهك، وهنا كانت المفاجأة إنها بنتها فعلا وانهارت، وبشكل عام وصفت علاقتها بوالدتها بإنها فاترة وإنها مكنتش بتديلها حب وحنان في طفولتها.
ظهرت في موسم رمضان 2023 من خلال مسلسل الهرشة السابعة، ودورها كان مميز كعادتها، وبتنتظر عرض فيلم «معاوية» اللي انتهت من تصويره في 2022.
أسماء جلال قبل ما تدخل الفن كانت محجبة، وده يمكن في مراحل مبكرة من حياتها، وهي بتقول إن زمان كان اللي حواليها بيتحكموا في حياتها ولبسها.
طفولة أسماء جلال وشباباها، يمكن ليه تأثر كبير عليها وطريقة ظهورها حاليا اللي بتحاول تثبت فيها طول الوقت إنها جذابة وجميلة ومرغوبة وتقدر تقدم الأدوار الجريئة، وده سواء إطلالتها في الصور اللي بتنزلها على إنستجرام، أو حتى من خلال أدوارها اللي بتلعب فيها دور البنت الجذابة الجريئة زي بعض مشاهد مسلسل الغرفة 207 على سبيل المثال.
في وقت من الأوقات اتقال إنها على علاقة بمغنى الراب ويجز، وده طبعا لأنها كانت بتروح تحضر حفلاته برة وجوة مصر، ومن المقربين ليه وظهروا مع بعض في أكتر من صورة، ولكن هي حسمت الموضوع ده، بمنشور على إنستجرام في عيد ميلاده وقالت «عيد ميلاد سعيد يا أخي.. شخص متواضع ولطيف وأفضل صديق يمكن لأي شخص أن يطلبه»، وكانت التعليقات غنه هيفضل في الفريند زون كتير.
حاليا هي مش مرتبطة، ولكن هي مش ممكن ترتبط بشخص كسول أو تايه في الحياة، وبتحب الشخص الطموح واللي عنده حماس وشغف.
