أفلام كثير ستعرض في موسم عيد الأضحى ويتنافس عدد كبير من النجوم على رضا الجمهور وهذا سيظهر من خلال شباك التذاكر.
وكل واحد من صناع الأعمال بيحاول يقدم تركيبة مميزة وتجذب الانتباه عشان يقدر يقول زي ما سعاد حسني كانت بتغني «أنا أهو أنا أهو والكون مش قد مقاسي» ومنهم فيلم مستر إكس للنجم أحمد فهمي، واللي بيظهر فيه عدد من النجوم والرياضيين عشان يقدر يوصل لأكبر قاعدة جماهيرية ممكنة.. ومن بين الشخصيات اللي استعان بيها الأميرة المحاربة: حبيبة القبرصي.
خلاص صناع فيلم مستر إكس حطوا اللمسات النهائية ومستنيين عرض الفيلم خلال موسم عيد الأضحى بقى واللي بيضم عدد كبير من النجوم، وهيكون وسط منافسة شرسة، في ظل وجود أهم نجوم الفن المصري زي كريم عبد العزيز ومحمد هنيدي وأحمد السقا ومحمد إمام وأمير كرارة.
الفنان أحمد فهمي عارف إنه داخل منافسة كبيرة، ومن هنا بيوسع قاعدته الجماهيرية من خلال الاستعانة بمشاهد لبطل كمال الأجسام بيج رامي، وكمان نجوم الرياضة زي إبراهيم فايق ومجدي عبدالغني، وكمان الوجه الجديد اللي بيستعين بيه لأول مرة في التمثيل واللي بيطلق عليها لفظ الأميرة المحاربة حبيبة القبرصي.
مين هي حبيبة القبرصي.. وايه قصتها وليه لفتت الانتباه؟
أحداث فيلم مستر إكس للفنان احمد فهمي، بتتكلم عن رئيس عصابة بيقع في حب محامية، ومن خلال العلاقة بينهم دي بيحاول إن هو يبعدها عن أي مشاكل هي بتتورط فيها.
البرومو الرسمي بتاع الفيلم بيظهر فيه إن أحمد فهمي بيقود مجموعة هدفها تساعد الناس على الانفصال وعدم الرجوع مرة تاني، وغالبا هتكون قصة الفيلم بتدور في الإطار ده بشكل كوميدي، يعني فكرة العصابة هنا مش هتاخد سياق أكشن، ولكن سياق هزلي.
من بين قصص الانفصال اللي بتظهر في الفيلم ده، هو انفصال بيج رامي عن زوجته اللي بتلعب دورها حبيبة القبرصي واللي بتعمل دور « small fatma»، وفي مشهد بيظهر في رامي السبيعي بطل مستر أولمبيا مرتين وهو بيعيط بجسمه الضخم ده بسبب إن مراته بتضربه وعايز ينفصل عنها.
مراته دي هي حبيبة القبرصي، واللي هي بالمناسبة بطله في لعبة التايكندو، وحاصلة على مراكز متقدمة في اللعبة دي في أكتر من بطولة، يعين هي رياضية متمرسة، ولكن جانب الاتجاه العنيف في شخصيتها ده، فهي بتتمتع بأنوثة كبيرة، وكمان بتشتغل عارضة أزياء.
حبيبة القبرصي بتتميز بالطول والقوام الممشوق، وده بفضل اهتمامها بالرياضة وكمال الاجسام والتدريب المستمر في الجيم، وهي لاعبة تايكندو مهمة في المجال ده، وقدرت إنها تحصل على المركز الثالث في بطولة الجمهورية، كمان فازت ببطولة برة مصرو هي في هولندا في نفس الرياضة.
حبيبة القبرصي كمان مهتمة بعروض الأزياء وشاركت مع مصميين مصريين سواء في مصر أو برة ونجحت في إنها تكون موديل للأزياء اللي بيصمموها.
فوق كل ده هي مدربة كمال أجسام ومدربة تايكندو وده لاهتمامها الكبير بالرياضة بشكل عام، وبسبب رشاقتها وجمالها وكمان اهتمامها بالرياضة أطلق عليها لقب الأميرة المحاربة.
الأميرة المحاربة هنشوفها لأول مرة بتمثل من خلال فيلم مستر إكس، ومش عارفين إذا كانت هتكون المرة الأخيرة ولالا، في النهاية الحكم للجمهور على الموضوع ده ومدة تقبله ليها، ولكن الأكيد إنها هتظهر في أعمال تاني لأن المنتجين هيستغلوا الإمكانيات اللي عندها ولكن مدى نجاحها في النهاية متوقف على حجم موهبتها ومدى اهتمامها بمجال الفن.
حبيبة القبرصي في بداية حياتها كانت بتحلم إنها تكون موديل ولكن اترفضت في البداية ولقيت تعليقات سلبية كتير، وبعد كدة قررت إنها تلعب تايكندو، وخلال رحلتها في الرياضة دي، المدرب بتاعها حفزها شجعها عشان تقدر إنها تحقق حلمها وتتعلم المجال اللي حابة تكون موجودة فيه، وبالفعل أنفقت فلوسي كتير على إنها تتعلم إزاي تكون موديل.
بعد كدة راحت قدمت في مكاتب كتير عشان تلاقي فرصة، وبالفعل حصلت على مقابلة في مكان، ولكن اتعرضت لنقد كبير وكانت تعليقاتهم سلبية، ولكن اللي حصل إنها رجعت وقعدت وقررت إنها تصلح كل الحاجات دي، ورجعتلهم تاني.
ولقيوا عندها تركيز والتزام وإصرار وكمان عالجت الاخطاء دي، ومن هنا قدرت إنها تبدأ شغلها في المجال اللي بتحبه، عشان تشارك بعد كدة في أسبوع الموضة في ميلانو، وكمان عروض أزياء في دبي وفي أماكن تاني سواء في أوروبا أو مصر.
حبيبة بتقول إن الرياضة وعروض الأزياء غيروا طريقها في الحياة، وإنها مبقتش بتشتغل في مجال دراستها، ولكن هي لقيت طريق تاني، وبقت بتحس بالاستقلالية والقوة، وأهم حاجة اتعلمتها إنها لازم تجتهد عشان تحسن وضعها وتطارد أحلامها ومتشكش في نفسها ولا تستمع للأشخاص السلبيين.
