بيع شركة الشرقية للدخان، بالتأكيد فإنك قد سمعت عن هذا الخبر، لأننا نتحدث عن أكبر شركة في السوق والتي تسيطر 75% من إنتاج السجائر في مصر.
والأهم ان الحكومة طول عمرها صاحبة نصيب الاسد في الشرقية للدخان.. فهل بيع جزء من حصتها لشركه اماراتيه معناه ان الحكومة بتسحب من ايديها من السوق وهيبقى كله ما بين القطاع الخاص والزبون المصري؟ ولا قرار البيع ده في صالحك؟
وأهو على يدك خلال الشهور اللي فاتت الكل اتكوى بجنون اسعار السجاير اللي خلت علبه كليوباترا اللي ب24 جنيه تتباع ب 65 جنيه وانت مفيش حل قدامك غير الدفع؟
في التقري ده هتعرف ليه الصفقه تمت دلوقتي؟ وايه تاثيرها على الأسعار؟ فتابعنا للاخر عشان في تفاصيل مهمه جدا.
الحكومه اعلنت وبشكل رسمي بيع جزء من شركة الشرقيه للدخان لشركه جلوبال القابضه الإماراتية، والتفاصيل كالآتي:
الشركه الاماراتية هتشتري 30% من الشركة بمقابل 625 مليون دولار يعني بالمصري بنتكلم في 19 مليار و336 مليون تقريبا.
ده غير 150 مليون دولار هتدفعهم جلوبال الإماراتية عشان الشرقية للدخان تشتري بيهم مواد خام وتطلع انتاج.فهل معنى كده ان الشرقية للدخان بقت اماراتية خلاص؟
الحقيقه لا، لأن الحكومه لسه لها 20.9% والحصة الباقيه مطروحه في البورصة.. وطبعا انت دلوقتي بتقول انا مالي بده كله. انا اللي يهمني في الاخر لما اشتري علبه السجاير هدفع كام؟
بص يا سيدي، منصور عبد الغني المتحدث الرسمي لوزارة قطاع الأعمال العام، قال مليون% بيع الشرقية للدخان مش هيأثر على أسعار السجاير أو الشيشة.
وخصوصا يعني إن تسعير السجاير في مصر ما كانش مسؤوليه الشرقيه للدخان في المقام الأول، واطمنوا:بعد صفقه الشريك الاماراتي الاسعار مش هتزيد وهتفضل ثابته، بل بالعكس عبد الغني كشف عن الخبر اللي المصريين كلهم نفسهم يتحقق :
بعد الصفقة الجديدة، أزمة السجاير هتخلص خلال أسبوع، لأن زي ما قلنا في 150 مليون دولار هنشتري بيهم تبغ عشان نزود الانتاج بأكتر من حاجة السوق ونواجه جشع التجار.
َما تنساش كمان ان شركه الشرقيه للدخان ومن قبل الاعلان عن الصفقه قررت انها تزود الانتاج 40% على مرحلتين المرحله الاولى كانت بنسبه 25% والتانيه واللي هتتنفذ خلال الايام الجايه المفروض تبقى 15%.
كمان الشركه على تواصل دائم مع اجهزه الرقابه عشان تبلغهم أول بأول بحجم الكميات اللي بيطلع من عندها وبتروح فين ولمين وفي أي مكان.
وده عشان تضمن ان علبة السجاير في الآخر توصللك انت بسعرها الرسمي وتقضي على حيتان السوق، اللي اشتكى منهم هاني امان الرئيس التنفيذي للشركه اكتر من مرة.
وقال انه بعد زيادة انتاج السجاير في المرحلة الأولى، فعلا بدأنا نشوف الاسعار تنزل ونسمع عن رقم 40 ب 45 جنيه لعلبه الكليوباترا، لكن لقينا مقاومه شديده من بعض المستفيدين من الأزمة بس احنا مصممين على المواجهة.
اما بقى لو شايف ان شركه الشرقيه للدخان شركة حكوميه ممتازة وطول عمرها بتحقق أرباح كبيرة للدوله وخايف بيع جزء منها يقلل من ايرادات خزنة مصر، فبرضه المتحدث باسم وزاره قطاع الاعمال العام قاللك ما تقلقش: الدوله هتاخد أرباحها زي ما هي واللي وصلت تقريبا إلى 85 مليار جنيه في السنة ضرايب على السجاير.
ودلوقتي بقى قولنا: انت كمان متفائل بصفقة الشرقيه للدخان الجديدة؟ وعلبة السجاير دلوقتي وصلت عندك لكام؟
