صورة متداولة على موقع التواصل الاجتماعي فيسبوك ، أثارت الجدل والتي أوضحت أن السفارة تقوم بتسعير الدينار الكويتي بـ 150 جنيه، فهل هذه الصورة حقيقة وما قصة الرسوم الجديدة التي فرضتها سفارة الكويت في مصر، كل هذا سنتعرف عليه من خلال التقرير التالي:
لسة بنستوعب قرار الكويت بمنع دخول العمالة المصرية لأراضيها، وإذ فجأة نلاقي في وشنا صورة متداولة على الفيسبوك، واللي منزلينها بيقولوا انها أسعار الرسوم اللي بتحصلها سفارة الكويت في مصر من المتعاملين معاها عشان تصدق على الأوراق المختلفة.
وقبل ماتستعجل وتقولي انا مالي: لا انا في الكويت ولا حد من قرايبي، احب اقولك اصبر: لو الصورة دي حقيقية فأنا وانت والمصري اللي في الكويت كلنا هنتأثر، لأنها بتوضحلك الدول التانية شايفة قيمة الجنيه المصري ازاي.
وحسب الصورة، السفارة محددة رسوم توثيق التوكيلات والعقود والقرارات وشهادات الزواج والميلاد بقيمة 5 دينار، وبالمصري 750 جنيه.
طيب ده معناه ايه؟ اقسم 750 على 5 يطلعلك الدينار الكويتي ب 150 جنيه مصري. وقيس على كده باقي الأوراق، يعني عندك مثلا رسوم معاملة الالتحاق بعائل قيمتها 15 دينار أو 2250 جنيه لو السن أقل من 18 سنة، لكن لو العمر 18 سنة أو اكتر صاحب الطلب هيدفع 20 دينار يعني 3 آلاف جنيه.
السعر الرسمي للدينار الكويتي في مصر كام
حسب اخر التحديثات ولغاية وقت الفيديو ده الدينار الكويتي مسجل حوالي 80 جنيه بيع وشرا في البنك المركزي.
يعني بنتكلم في فرق سعر حوالي 70 جنيه، انت متخيل! وطبعا ده ياخدنا لسؤال مهم هو الجنيه قيمته الحقيقية كام؟
في ظل الوضع الحالي ومع أزمة الدولار اللي بتمر بيها البلد صعب تتوقع رقم، فزي مانتوا عارفين في وقت الأزمات ومع حالة الترقب والقلق عند الناس بتلاقي الأسعار طلعت السما.
وحسب وكالة رويترز، سعر الدولار في السوق الموازي عدى 33 جنيه، بص بقى على التوقعات اللي وراها مؤسسات دولية معروفة، هتلاقي ان فيه شبه اتفاق على خفض جديد في قيمة الجنيه.
وارجع للقرار الأخير الصادر من الكويت بوقف استقدام العمالة المصرية وشوف التفاصيل هتلاقي ان الصحف الكويتية اتكلمت عن اكتر من سبب، منها وضع آلية جديدة لضبط الاستقدام من مصر، مع مخالفة السفارة المصرية القوانين الكويتية المنظمة لسوق العمل، وكل ده عشان يمنعوا دخول أي عمالة زايدة عن حاجة البلد.
كمان المصادر قالت إن في اشتراطات ورسوم جديدة لتوثيق تصاريح العمل حددتها الكويت بعد التغيرات اللي حصلت لقيمة الجنيه.
وحسب الخبرا في مصر، عندنا 3 مستويات متوقعة لسعر الدولار على نهاية السنة: 26 جنيه ، و28 جنيه ، و30 جنيه.
وسواء اعتمدنا السعر اللي في السوق السودا 33 جنيه، أو التوقعات ب30 جنيه، ده برضه ميغطيش فرق السعر بين سعر الدينار الكويتي في البنوك وسعره في الصورة المتداولة.
عشان كده تفضل الصورة دي محل تساؤل لغاية متطلع جهة رسمية توضح حقيقتها، ومن هنا لغاية دا مايحصل قوللنا بقى لو انتوا أو حد من معارفكم في الكويت، الدينار الكويتي محسوب على كام؟
