والمقصود هنا هو إنك تجيب مجموعة من الترابيزات مرفوعة القوائم لأربع اتجاهات بارتفاع 30 سم وتحطها بشكل مايل شوية عشان تصرف الماية الزيادة .وتحط جواها مشمع بلاستيك سميك بولي إيثلين أو أي مادة عازلة.
وقال حنفي على صفحة الشخصية على موقع التواصل الاجتماعي فيس بوك إن التربة هتكون عبارة عن طمى زراعي مع رمل مخلوطين بـ 5 جنيه زريعة ملوخية من عند العطار ، بعدها ترشهم على التربة من فوق.
وبعد كده ترويها بالماية في الصيف مرتين في اليوم وفي الشتا كل يوم ، وتقدر تحط جردل تحت الترابيزات دي عشان يستقبل أي ماية زيادة ، وكمان بتقدر تعمل حصاد لـ من 4 لـ 6 سيقان خلال الموسم الواحد .
الجميل بقا إنه قال إنك تقدر تبيع المحصول النهائي للملوخية في الأسواق بسهولة جدا ، كمان تقدر تحسب معدل الربح الخاص بالمشروع وفقًا لسعر بيع الملوخية في السوق ، وده طبعا بتختلف حسب التسعيرة المحددة لكيلو الملوخية في المنافذ المختلفة .
ولو بتسأل عن تكلفة مشروع زراعة الأسطح؟ف الجميل أن المشروع ده مش هيكلفك كتير وده لإن معظم الحاجات اللي بيحتاجها موجودة في كل بيت زي مثلا الصناديق الخشبية وخزان الماية، والتربة سهلة في الحصول عليها.
وكل اللي هتتكلفه هو تمن البذور ودي كمان موجودة في الفاكهة والخضروات اللي بناكلها زي بذور الطماطم والفلفل واللي موجودة في الثمرات نفسها.
ولو احتاجت بذور تانيه سهل تلاقيها في منافذ بيع المواد الزراعية، أو محلات العطارة، وكل الحاجات اللي هتحتاج تشتريها للمشروع ده مش هتكلفك أكثر من 3 ل 5 آلاف جنيه، ودي بتختلف حسب الحجم والكمية.
قولنا رأيك في المشروع ده وهل ممكن تفكر تعمله؟
