البنك الفيدرالي الأمريكي قرر أنه يثبت سعر الفائدة، القرار هذا لم يمر مرور الكرام بل أنه قلب الدنيا في العالم كله، وهذا لأن رفع أو خفض سعر فايدة الفيدرالي له تأثير كبير على مستوى العالم.
بس السؤال هنا: إزاي تثبيت سعر الفايدة هيكون ليه تأثير على مصر؟ وهل هيأثر على اسعار الدهب الفترة الجاية؟ ويا ترا البنك الفيدرالي ممكن يرفع الفايدة مرة تانية؟
خلال الساعات الأخيرة البنك الفيدرالي الأمريكي كان أعلن تثبيت سعر الفايدة للمرة الأولى من يناير 2022
وده بعد ما رفعها عشر مرات على التوالي من مارس 2022، لكن خلال لجنة اجتماع لجنة السياسة النقدية الأخير، الأعضاء صوتوا بالإجماع بتثبيت سعر الفايدة عند 5% و 5.25%، وده حسب بيان البنك الفيدرالي الأمريكي
وبحسب اليوم السابع، البنك الفيدرالي كان أعلن عن رفع سعر الفايدة 10 مرات من السنة اللي فاتت لحد ما وصلت لـ 5.25% في شهر مايو اللي فات، وده عشان يقدر يسيطر على معدل التضخم في أمريكا ويوصل بيه لمستوى 2%
تأثير قرار تثبيت سعر الفائدة
بص يا سيدي، بحسب تصريحات الباحث الإقتصادي محمد عبد الرحيم للمصري اليوم، إن تثبيت سعر الفايدة مؤشر لبداية انخفاض التضخم العالمي اللي سيطر على العالم خلال الشهور الأخيرة ورفع أسعار السلع بشكل كبير جدا
وقال كمان إن تثبيت الفيدرالي الأمريكي لسعر الفايدة، له تأثير مباشر على كتير من البنوك المركزية في العالم اللي ماشية على نفس مسار الفيدرالي الأمريكي
ومش بس كده تثبيت الفايدة هيكون ليه تأثير في ارتفاع أسعار الدهب عالميًا، بالإضافة أنه من المفترض يأثر بشكل إيجابي على مؤشرات البورصة الأمريكية
وقال إن بشكل عام تثبيت سعر الفايدة نقطة تحول من سياسة التشديد النقدي لبداية سياسة نقدية تيسيرية حتى لو كانت بشكل نسبي، والأفضل لمؤشرات الاقتصاد الكلي هو تثبيت سعر الفايدة لأن رفعها ده إستثناء مش قاعدة
ولما إتسأل هو ممكن البنك الفيدرالي يرفع الفايدة مرة تانية؟
رد وقال إن كل الإحتمالات مفتوحة في الإجتماع الجاي، ومن الوارد إن الفيدرالي الأمريكي يلجأ لرفع الفايدة مرة تانية
وبحسب الباحث الإقتصادي، إن سياسات رفع الفايدة اللي كان ماشي عليها الفيدرالي الأمريكي للسيطرة على معدلات التضخم المرتفع في الولايات المتحدة، أتسببت في حالة من عدم الاستقرار وخصوصا في الأسواق الناشئة اللي منها مصر، وبالتالي تثبيت سعر الفايدة أمر مطلوب للاقتصاد العالمي في المرحلة اللي احنا فيها.
وبحسب هاني ميلاد، رئيس شعبة الدهب والمجوهرات بالإتحاد العام للغرف التجارية لموقع مصراوي، إن تثبيت سعر الفايدة هيرفع أسعار الدهب عالميا، وبالتالي الأسعار في مصر هترتفع
أما لو الفيدرالي كان قرر زيادة سعر الفايدة هنا بقى كانت أسعار الدهب انخفضت عالميا ومحليا ومش البنك الفيدرالي الأمريكي هو بس اللي قرار يثبيت سعر الفايدة في اجتماعه الأخير، ده كمان البنك المركزي في الإمارات وقطر هما كمان قرروا خلال الساعات الأخيرة بتثبيت سعر الفايدة
وده بحسب موقع مصراوي، إن مصرف قطر المركزي قرر إنه يثبت أسعارالفايدة على الإيداع و الإقراض وإعادة الشرا، وقال فيبيان ليه إنه هيراجع سياسته النقدية حال وجود أي تغييرات في المتطلبات الإقتصادية
وكمان مصرف الإمارات المركزي قرر تثبيت سعر الفايدة من غير تغيير عند 5.15% ودلوقتي قولنا شايف قرار تثبيت البنك الفيدرالي لسعر الفايدة هيأثر على مصر إزاي؟
