صندوق النقد الدولي قرر يعمل إجتماع خلال ساعات عن مصر في العاصمة الأمريكية واشنطن، فما السبب وما هي الطلبات التي سيناقشها لكي تنفذها الحكومة المصرية؟ وهل هذه الطلبات لها علاقة بالقرض التي مصر حصلت عليه؟ سنتعرف على الإجابة من خلال التقرير التالي:
صندوق النقد الدولي قرر يناقش برنامج مصر الاقتصادي واللي بيدعمه الصندوق في مؤتمر صحفي بكره يعني بتاريخ 10 يناير 2023، والمفترض كمان إن رئيسة بعثة الصندوق في مصر والشرق الأوسط وآسيا هتكون حاضرة المؤتمر.
وعلى الصفحة الرسمية للصندوق في منشور مهم أكد الصندوق فيه إن المؤتمر ده هيتكلم عن دور الصندوق وسياساته اللي بتساعد في إنها تحافظ على استقرار الاقتصاد الكلي المصري .
ولو انت مش عارف فـ المجلس التنفيذي لصندوق النقد الدولي، وافق في ديسمبر اللي فات، على تمويل مصر بقيمة 3 مليارات دولار، واللي تم تقسمها كـ دفعة أولى من قيمة القرض بقيمة 750 مليون دولار.
وموافقة الصندوق كانت عشان مساعدة الحكومة المصرية في الإصلاح الاقتصادي والتصدي للأزمات الاقتصادية التي واجهت مصر.
وبيقدم برنامج مصر المدعوم من صندوق النقد الدولي روشتة كاملة المفترض تنفذها الحكومة المصرية عشان تحافظ على استقرار اقتصاد مصر الكلي، وتمهد الطريق لنمو شامل بقيادة القطاع الخاص.
و المتوقع أن صندوق النقد يدي مصر تمويل إضافي بحوالي 14 مليار دولار واللي هيكون من شركاء مصر الدوليين والإقليميين، غير كمان تمويلات تانيه من دول مجلس التعاون الخليجي .
طبعًا لما الحكومة هتاخد الدعم المالي ده من الصندوق هيساعدها في تحقيق استقرار الاقتصاد الكلي، وانها تقلل الدين العام، وتحسن قدرة الاقتصاد المصري على مواجهة الصدمات الخارجية اللي بتكون ناتجة عن الأزمات العالمية الحالية.
غير كمان إن البرنامج مهتم جدا بتعزيز شبكة الأمان الاجتماعي، والحماية الاجتماعية للمواطنين المصريين، و تحسين أداء الاقتصاد المصري من خلال إجراء الإصلاحات الاقتصادية اللي بتاخدها الحكومة.
وطبعًا المعروف إن صندوق النقد الدولي بيحط روشتة لكل بلد تتقدم إليه بطلب قرض وبتتضمن الروشتة دي تحقيق مرونة فيسعر صرف العملة المحلية أمام العملات الرئيسية.
وده اللي حصل مع الحكومة المصرية وأكد الصندوق في بيان ليه سابق إنه هيراقب عن قرب أسواق العملات الأجنبية في مصر عشان يشوف إذا كان بيتوافق مع نظام سعر الصرف المرن ولا لأ؟
غير كمان إنه طالب الحكومة المصرية إنها تعمل برنامج يساعد في تخفيض الدين العام اللي هو بالعربي ناتج حاصل الديون الخارجية مضاف إليه الديون الداخلية.
لماذا أخذت مصر تمويل من صندوق النقد؟
الحكومة المصرية أكدت في بيان سابق ليها إن الموافقة على البرنامج يعتبر تأكيد إضافي على مساندة المجتمع الدولي وشركاء التنمية لبرنامج الاصلاح الاقتصادي المصري.
قالت كمان إن البرنامج بيعكس الثقة في قدرات مصر على الوفاء بالتزاماتها الدولية وإنها قادرة على تحقيق معدلات النمو الاقتصادي اللي بتستهدفها الدولة، خاصة وإنه مهتم جدا بتعزيز شبكة الأمان الاجتماعي واللي هيحقق أكبر قدر من الحماية للطبقات الأولى بالرعاية.
تفتكروا إيه اللي ممكن يحصل في المؤتمر الخاص بالصندوق وهل ممكن يكون في قرارات جديدة للحكومة المصرية ؟
