أزمات كثيرة مرت على المصريين في عام 2022 وسمعنا العديد من الاخبار التي لم تكن في مصلحتنا، ونتمنى مع العام الجديد أن نسمع أخبار سعيدة، لذلك فإن 2023 تحضر لنا 5 أخبار سعيدة، سوف تسعد كل المصريين وسوف نتعرف عليهم من خلال التالي:
الأمل بقى في 2023، تيجي بقى تعوضنا عن اللي فات بقى، فحبينا نعرف هي مخبيالنا إيه..بس قولنا كفايا أخبار مش كويسة، ونهتم شوية بالأخبار السعيدة ونشوف جيبالنا إيه.
ولقينا إن في 5 أخبار تهمنا كلنا، وأولهم المرتب هيزيد.. مفيش أحلى كدا، وفي 7% علاوة هيزيدوا على المرتب، هيبقوا في شهر يناير، وشهر يوليو.
ده حسب قانون الخدمة المدنية في المادة 37، اللي بينص على إن الموظف من حقه، يستفيد بعلاوات سنوية بشكل دوري، بعد ما يعدي عليه سنة في شغله، وده بهدف انه ينظم الاداء الوظيفي، ويدي للموظفين حقوقهم، بمرتبات تناسب ظروف المعيشة.
ومش بس كدا كمان عرفنا ان الحد الادني للأجور في القطاع الخاص اتحدد، حسب قرار المجلس القومي للأجور، انه رفع معدلات الرواتب لـ 2700 جنيه لـ 2400 جنيه.
والزيادة هتبدأ من اول مرتبات 2023، وحسب السنة المالية المحاسبية لكل مؤسسة، وفي نفس الوقت الزيادة، مش هتقل عن 3% من أجر الاشتراك التأميني، حسب المتحدد في قانون المعاشات والتأمين الاجتماعي.
والمجلس القومي للأجور دلوقتي في اتفاقات مع اتحاد الغرف المختلفة، عشان يوصلوا لمرتبات كويسة تناسب الظروف الاستثنائية اللي بتمر بيها البلد.
دي أخبار من ناحية المرتبات، ومن ناحية تانية بقى الخدمات الطبية اللي هتتقدملنا هتبقى أحسن بكتير من السنين اللي فاتت، وده ضمن خطة وزارة الصحة في برنامج الرعاية الصحية والمراكز الطبية، انها هتحط صحة المواطنين في اولوية اهدافها في 2023.
أما الخبر ده ف هيهم اي حد بيعاني من شراء الانابيب وزهق منها، وبيحسب هو استهلك قد إيه، لان خلاص مشكلتك هتتحل، بعد ما الدكتور طارق الملا وزير البترول والثروات المعدنية، قال ان قطاع البترول بيشتغل ليل نهار عشان يسرع توصيل الغاز الطبيعي للبيوت والمصانع، وطبعا ده هيوفر علينا كتير في الاستهلاك.
وكمان وزارة البترول بتحاول انها تأمن مستقبل مصر من منتجات البترول والثروات المعدنية، وتقدر تلبي استهلاك المواطنين
وبيأكد ان مصر في 2023 هتكون مركز اقليمي لتجارة البترول والغاز وصناعة البتروكيماويات.
وكمان هنحس ان الزحمة بتقل وبنروح مشوارينا في وقت أقل من الاول، وده عشان وزارة النقل والمواصلات، هتكمل خطتها في المشاريع الجديدة في النقل سواء بري او بحري او نهري.
وهيفتتحوا مشاريع جديدة بتكلفة هتوصل لـ 107 تريليونات جنيه، واهمها هو تنفيذ مشروع مونوريل العاصمة الجديدة، وده بهدف تطوير مصر في 2030.
يعني لغاية دلوقتي السنة الجديدة خدمانا ودخلالنا بأخبار كويسة، قولنا ايه اكتر خبر فرحك وبيهمك فيهم؟
