قرار خطير من روسيا يثير القلق حول ارتفاع سعر رغيف العيش

” رغيف العيش سعره سيزيد والسلع سترتفع أكثر” هذا السيناريو يتسبب في قلق كبير للناس، ومؤسسات عالمية تحدثت لتحذر من قرار خطير أعلنته روسيا.

بس يا ترى قالوا ايه؟ وإيه هي اتفاقية البحر الأسود اللي مسببة القلق ده كله؟ وازاي هتأثر على سعر رغيف العيش والسلع الغذائية عموما؟

الساعات الأخيرة روسيا أعلنت انسحابها الموقت من اتفاقية تصدير الحبوب الأوكرانية من خلال البحر الأسود، وقالت إنها ممكن ترجع الاتفاقية من تاني لو العالم التزم بتفيذ شروطها.

ما هي اتفاقية البحر الأسود؟

شوف يا سيدي، حسب جريدة الوطن، إن بعد الأزمة الروسية الأوكرانية اللي حصلت في فبراير 2022، الأمم المتحدة اتدخلت عشان تعمل اتفاقية تسمح بتصدير الحبوب من موانئ أوكرانيا، وفي المقابل هتسهل مرور الصادرات الروسية لباقي العالم.

وده عشان نتجنب حدوث أزمة غذاء في العالم خصوصا ان في دول كتير معتمدة على غذائها منهم

وفعلا روسيا سمحت بالتصدير من خلال ممرات أطلقوا عليها ممرات التضامن الأوروبي، اللي بتدعم الصادرات الأوروبية واللي الهدف منها خفض أسعار المواد الغذائية، وبعدها تم تصدير 30 مليون طن من الحبوب والمنتجات الغذائية التانية

وبالمناسبة، المفروض المستفيد الأكبر من الاتفاقية ديه هي الدول الفقيرة وده لأن تم شحن 64% من القمح للبلدان النامية وده يجي في الوقت اللي تم تصدير الدرة بشكل متساوي على الدول النامية و المتقدمة يعني كله مستفيد سواء دول غنية أو فقيرة

وطبعا اتفاق زي ده مهم جدا، لأنه حسب موقع سكاي نيوز: روسيا وأوكرانيا من الموردين العالميين للقمح والشعير وزيت عباد الشمس وغيرها من المنتجات الغذائية.

بس روسيا دلوقتي طالعة تقول انها مش مكملة لأن العالم مالتزمش باتفاقه معاها، ولسة في قيود على السفن والبضايع بتاعتها، ده كمان قالت إن أغلى الشحنات اللي طلعت من أوكرانيا مراحتش الدول الفقيرة زي مااتقال.

وطبعا الاخبار دي تعتبر صدمة للعالم كله، وخصوصا الدول المعتمدة على استيراد احتياجاتها من الخارج.

والأزمة بقى ان مصر هي أكبر مستورد للقمح في العالم، وخصوصا من روسيا واكرانيا، فياترى دلوقتي إيه مصير استيرادنا من القمح؟ وإزاي ده هيأثر على سعر العيش اللي بيعتمد على القمح؟

حسب إبراهيم عشماوي، مساعد أول وزير التموين، إننا لحد دلوقتي مش عارفين ده هيأثر علينا ازاي والكلام ده سابق لأوانه،بس عموما اي اضطراب هيحصل في سلاسل الامداد ده هيأثر على الأسعار بشكل سلبي بدليل أن أسعار القمح زادت الساعات الأخيرة على شاشات البورصة العالمية بنسبة 2.7%.

بس رجع وطمن الناس وقال إن بعد الأزمة الصحية العالمية اللي حصلت في 2020مصر استوعبت المتغيرات العالمية اللي أدت لاضطراب في سلاسل الامداد، عشان الدولة بدأت تزود مخزونها الاستراتيجي من السلع ودلوقتي بقى عندنا مخزون آمن خصوصا من القمح اللي عندنا احتياطي منه يكفينا لـ 6 شهور.

وقال إن الدول بدأت دلوقتي تتجه لعقد اتفاقيات لاستيراد القمح بعيد عن روسيا واوكرانيا تحسبا لخروج روسيا من اتفاقيةز تجميد الحبوب، عشان كده احنا دلوقتي عندنا تنوع في سلاسل الامداد ومبقناش نعتمد على روسيا وأوكرانيا بشكل كامل

وبحسب وكالة الصحافة الفرنسية، إن الاتفاقية دي لو متجددتش والممر تم إغلاقه بشكل دائم ده هيكون له تأثير على ارتفاع أسعار السلع الغذائية، وممكن كمان يقلل المعونات الغذائية وده لأن اوكرانيا مورد لبرنامج الأغذية العالمي.

ودلوقتي بقى قولنا هل شايف إن الحكومة عقد تتعامل لو حصل أزمة غذاء جديدة في العالم ، وتعدي برغيف العيش لبر الأمان من غير ماتزود سعره؟