يختفي ويعود بموقف مثير جدا يشعل به السوشيال ميديا، محمد رمضان عندما تهدأ الأضواء من حوله يعود بموقف يشعل الأجواء من جديد، فماذا فعل مؤخرا؟ هذا ما سنتعرف عليه من خلال التقرير التالي:
محمد رمضان من الفنانين اللي بيعرفوا يردوا كويس اوي على اي هجوم بيحصل عليهم .. او حتى لو مش هجوم من الجمهور هجوم من فنانين بقى او اعلاميين.
المهم انه بيعرف يرد بطريقة غير مباشرة .. بس واضحة وانتو طبعا عارفين ان من يومين الاعلامي عمرو اديب اخد براءة في قضية السب و القذف ..اللي كان رافعها رمضان عليه، واللي كانت بدايتها في مارس ٢٠٢١ .. ساعة رفض محمد رمضان دفع تعويض للطيار الراحل أشرف ابو اليسر .
و انفعل عمرو اديب شوية بسيطة يعني المفروض انه كان بينصحه، بس سرحت منه شوية، رمضان راح رد عليه بطريقة فيها سخرية منه، طبعا عمرو اديب مسكتش، و اليوم اللي بعده اداله كلمتين على الهوا ايوا اما قاله لو محدش رباك، انا اللي هربيك يا محمد.
غير ان كمان اتحدد يوم 20 ديسمبر المقبل، لنظر دعوى الإعلامي عمرو اديب ضد محمد رمضان. ما هو عمرو اديب مسكتش ورفع قضية على رمضان وقتها بردو .
المهم تفتكروا رمضان هيعدي الموضوع بالساهل ابدا، لقيناه النهاردة منزل فيديو ليه من مطار السعودية، و الفيديو عبارة عن المعجبين اللي بيتصوروا معاه، و شغال عليه اغنيته السلطان.
واللي بيقول فيها انا عارف ان اسمي شاغل كل الحاقدين وحب الناس نعمة حتى شوف المعجبين، طبعا انتوا فاهمين هو يقصد مين، ومش بس كده لا ده كمان طلع في الطيارة، و قعد يرقص مع المضيفة تاني.
الناس شافوا ان محمد رمضان بيبين انه ولا فارق معاه ان عمرو اديب متحكمش عليه، او انه خد براءة بعد ما قاله الكلام ده على الهوا، او حتى هامه حوار القضية اللي رافعها ضده.
وناس تانية شافت ان رمضان بيحب يثير الجدل، لانه عارف برقصه مع المضيفة هيتكلموا، وده حصل فعلا ، لانه رقص رمضان مع المضيفات مش اول مرة يحصل.
ده حصلت قبل كده و الناس هاجمته و قعدوا يقولوا: فاكر اللي حصل مع الطيار أشوف ابو اليسر ، عاوز تأذيها هي كمان.
والحقيقة ان محمد رمضان لا بيهمه دول بيقولوا ايه، ولا دول بيفسروا افعاله ازاي، ومستمر في كل اللي بيعمله او بيقدمه،
خصوصا انه راجع من حفلة كبيرة ليه كانت في الرياض، و اللي الجمهور ساعتها كان بيقول مع رمضان كل اغانيه و بيرقصوا معاه، فهيركز ليه مع اللي بيهاجموه، هو بيرد بس لكن مبيقفش عند كلامهم ، عموما هي الايام اللي جاية هيبقى الكلام على رمضان كتير، ادينا مع بعض و ربنا يستر.
