لا يوجد حدبث على السوشيال ميديا إلا عن محمد عامل النظافة وحكاية جديدة له وهي ارتباطه بمذيعة في التليفزيون مع انتشار صورة رومانسية لهم ويديها في يده.
المذيعة التي نشرت الصورة على حسابها على فيسبوك وكانت حديث الناس على السوشيال، خرجت للحديث عن الأمر بعد اشتعال السوشيال ميديا، وقالت: محدش له علاقة بحياتي الشخصية؟ فما هي القصة ومن هذه المذيعة؟ كل هذا سنتعرف عليه من خلال التالي:
خلال الساعات اللي فاتت مكنش فيه حديث على السوشيال ميديا إلا عن عامل النظافة في واقعة كشري التحرير والكلام الكتير اللي حصل عن أنه ارتبط بمذيعة في التليفزيون بعد ما ظهرت صورة رومانسية لهم مع بعض.
وقتها طلع كلام وانتشر على أنهم اتقابلوا وحصل بينهم إعجاب وارتباط ووصل الأمر كمان لخطوبة بينهم.. وده اللي أثار حالة من الجدل الكبيرة على السوشيال ميديا بين حقيقة الكلام ده من عدمه.
الكل كان بيسأل عن مين هي المذيعة دي وإيه اللي حصل؟
المذيعة اسمها غدير أبوخزيم وبتعمل برنامج في قناة الحدث اليوم وهي اللي بدأت ده كله لما نشرت الصورة الرومانسية ليها مع محمد عامل النظافة بدون ما تعلق عليها.
الغريبة في الأمر واللي زود حالة الجدل بطريقة كبيرة على السوشيال ميديا أنها بعد الأخبار عن خطوبتها من عامل النظافة نشرت الخبر على صفحتها على فيسبوك وعلقت عليه وقالت: “الفيس كله اتقلب اهدوا شوية.. من تواضع لله رفعه.. بسببكم محمد اعتذر عن حضور مؤتمر المناخ معايا”.
التعليق بتاعها أوحى للناس أنها بتعلن بشكل غير مباشر عن ارتباطها بمحمد عامل النظافة بالفعل والكل بدأ يتداول الخبر وينتشر بصورة كبيرة.. ومع الجدل الكبير طلعت المذيعة واتكلمت عن حقيقة الموضوع.
المذيعة قالت إن الموضوع كله جبر خاطر واتقلب بطريقة عكسية.. وأن كل الكلام اللي اتقال عن الضحك والهزار والإعجاب حقيقي لكنه كان في إطار حلقة في البرنامج بتاعها عملتها مع عامل النظافة وحصل كلام وضحك.. لكن مع نشر الصورة اتحول الأمر إلى مادة للسخرية.
المذيعة قالت إن حياتها الشخصية وهي حرة فيها وأن الناس هتفهم طبيعة العلاقة بينهم لما يشوفوا الحلقة بتاعته معاها.. لكنها مكنتش تقصد تعمل حالة الجدل دي هي كل اللي عملته أنها نزلت صورتها بدون حتى تعليق.. والناس بعد كده قالوا ارتبطوا وإعجاب وحب من أول نظرة وهما شايفين كده.
المذيعة اختتم كلامه وقالت إنها مش متجوزة زي ما اتكتب ومش عجوزة وليه صغيرة ومفتهاش القطر ولا أي من الكلام ده.. وأن حتى لو حصل ارتباط بينها وبين عامل النظافة فهو مش عيب ولا حرام.
