أسعار الشقق والعقارات ارتفعت خلال الفترة الأخيرة بشكل كبير جدا وهذا جعل كل من يبحث على شقة الموضوع بالنسبة له أصبح صعب جدا.
بس أستنى ومتدورش كتير، وده لأن وزارة الأوقاف كانت أعلنت عن طرح وحدات سكنية وأراضي بالتقسيط، بس يا ترا إيه تفاصيل الوحدات؟ وتقدم عليها أزاي؟ والتقسيط بيكون على كام سنة؟ والمقدم قد إيه؟ وإيه هي شروطها؟
وزارة الأوقاف كانت أعلنت عن طرح وحدات سكنية للمواطنين معروفة بأسم ” شقق وزارة الأوقاف” اللي بتطرحها سواء للبيع أو للإيجار وده بالتعاون مع بنك القاهرة
تفاصيل الشقق الأوقاف
بص يا سيدي، بحسب جريدة الوطن الوزارة أعلنت عن مزاد بيتم من خلاله بيع الشقق ومن المفترض أن المزاد يبدء على 5 مراحل هيستمروا لحد 13 يوليو
المرحلة الأولى من المزاد بدأت بالفعل و عرضت الشقق في 9 محافظات بس وهما القاهرة والجيزة والقليوبية والسويس وبورسعيد والإسماعيلية والشرقية والفيوم وبني سويف، أما باقي مراحل المزاد فهيغطي الـ 27 محافظة الباقيين
وبحسب جريدة الوطن الجلسة الأولى من المزاد كانت في مقر الجامعة العمالية في طريق النصر، في شارع عباس العقاد بمدينة نصر.
وعلى فكرة الوحدات اللي بيتم طرحها مش شقق تمليك بس ده كمان شقق إيجار ومحلات وأراضي في مناطق كتير في المحافظات
لكن إيه تفاصيل الشقق دي؟
أنا هقولك، الشقق دي من مميزاتها أن فيها تسهيلات كبيرة في السداد وده لأن فترة التقسيط بتمتد لـ 15 سنة، كمان بتتحجزعن طريق مزاد علني من خلال طلب كراسات الشروط من موقع ومقر الهيئة أو من خلال فروع بنك القاهرة
أما بقى بالنسبة للمقدم فبيكون حوالي 16 ألف جنيه و 200 جنيه مصاريف إدارية
والقسط الشهري بيكون لمنخفضي الدخل 5 ألف و 40 ألف جنيه وده بيتحدد حسب مستوى الدخل
أما في حالة سداد قيمة الوحدة بالكامل بتاخد خصم 7% من قيمة الوحدة، وبتبدأ عملية التقسيط بسداد 30% من تمن الوحدة والباقي بيكون على 3 سنين من غير فوايد.
أو بيتم سداد 20% من قيمة الوحدة والباقي بيتسدد على 5 سنين لكن بفايدة البنك المركزي، وممكن سنين القسط تزيد لـ 15 سنة وده بيتحدد حسب الطريقة اللي عايزها الرسي عليه المزاد
بس إيه الأوراق المطلوبة عشان تقدر تقدم على الشقق دي؟
بحسب موقع فيتو، لازم يكون معاك صورة البطاقة الشخصية وأنت بتحضر جلسة المزاد وفي حالة مقدرتش تحضر ممكن تعمل توكيل خاص لأي شخص لأن غير كده مش هيتم السماح بدخولك
وبعدها بتمضي على الشروط التقديم في الوحدة اللي بتكون إقرار بأنك عينت الوحدة وموافق على شرائها بالمواصفات دي، وبتتعهد أنك تلتزم بسداد الإلتزمات المستحقة زي الأقساط ومصروفات نقل الملكية الخاصة بالشهر العقاري وغيرها من الإلتزامات
بالإضافة أنك بتتعهد متعملش أي تعديلات على الشقة إلا بعد موافقة الهيئة، والتعديلات دي بتكون بضوابط وقوانين معينة
ولو هتاخد محل تجاري لازم تعرف أنه مخصص لكل الأغراض التجارية ماعدا الأنشطة اللي بضر الصحة العامة أو اللي بتأثر على سلامة المباني
ودلوقتي قولنا هتقدم على شقق وزارة الأوقاف ولا لأ؟
