كل التوقعات خاطئة والذهب سيعاود الصعود مرة أخرى، هذا ما قاله نجيب ساويرس عن أسعار الذهب، ليس هذا فقط ،أيضا أكبر البنوك العالمية كشفوا عن مصير أسعار الدهب الفترة الجاية
بس يا ترى نجيب ساويرس قال إيه؟ وايه أصلا علاقته بالدهب؟ وإيه هي توقعات البنوك العالمية؟كل ده وأكتر هتعرفه في التقرير التالي:
كتير من الناس دلوقتي مبقاش على لسانهم غير سؤال واحد هو الدهب بكام انهاردة؟، وده لان الدهب كل يوم بيفاجئنا بسعر جديد.
ده غير التوقعات اللي خلت مصير الدهب غامض اكتر، وده لان في فريق بيقول ان الدهب هينخفض وفريق شايف ان هيرتفع تاني زي الاول واكتر كمان.
بس هو الدهب هيرتفع ولا هينخفض؟ بص يا سيدي، حسب تصريحات لطفي منيب نائب رئيس شعبة الدهب بغرفة القاهرة التجارية لجريدة الوطن، انه من الصعب نتوقع اسعار الدهب الفترة الجاية.
وقال ان سعر الصرف مستقر من مدة، لكن ممكن اسعار الدهب تنخفض بانخفاض سعر الصرف، بس قال كمان إن مبادرة دخول الدهب بدون جمارك مبقتش مؤثرة بشكل كبير دلوقتي على الأسعار لأن دلوقتي في توازن بين العرض والطلب.
بس رجل الأعمال نجيب ساويرس حسم مصير أسعار الدهب، وقال إن كل التوقعات الصادرة من بعض المواقع الإلكترونية، واللي بانخفاض أسعار الذهب خلال الفترة الجاية توقعات غلط.
وده كان من خلال نشر تدوينة على موقع “تويتر” كتب فيها كلمة “غلط” كتعليق على موضوع بيتكلم “هبوط غير متوقع في سعر الذهب بعدما لامس أعلى مستوى في شهر ونصف”، ده كمان نشر على حسابه في تويتر صورة بتشير لارتفاع سعر أونصة الذهب فوق مستوى 2000 دولار.
وبالمناسبة ساويرس يعتبر من كبار المتخصصين في مجال الدهب، وده لأنه سنة 2021 ، أعلنت شركة لامانشا اللي بيرأسها عن انشاء صندوق استثمار طويل الاجل في مجال تعدين الدهب مقره في لوكسمبورج.
الصندوق ده يعتبر من أهم الصناديق وده لأنه بيدير أصول قيمتها مليار و400 مليون دولار أمريكي، وعلى فكرة الصندوق مش خاص بعائلة ساويرس بس، لأنه معاه شريك استثمار فيه بمبلغ 100 مليون دولار.
وواضح كده أن كلام ساويرس هيطلع صح والدهب هيزيد الفترة الجاية فعلا، وده لأن أحدث بيانات لأسعار الدهب في السوق العالمي، قالت إن أسعار الدهب في صعود من 3 أسابيع ومن المتوقع إن الدهب يوصل لـ 2000 دولار على المدى القصير، وده حسب موقع فيتو.
ده كمان في بنوك عالمية اتوقعت ارتفاع أسعار الدهب عالميا زي بنك مورجان ستانلي اللي اتوقع في اخر تقرير ليه ارتفاع اسعار الدهب خلال النص التاني من العام الحالي نتيجة ضعف العملة الامريكية.
ده كمان بنك سوستيه جينرال الفرنسي اتوقع بارتفاع اسعار الدهب بسهولة ووصوله لـ 2200 دولار للأوقية نهاية العام الحالي، وده بسبب ضعف الدولار الامريكي وخفض سعر الفايدة ودول اللي هيدعموا المعدن الأصفر في الصعود.
بس هو الدهب وصل لكام في السوق المحلي؟
حسب المصري اليوم اسعار الدهب خلال الساعات الأخيرة لكن لسة عيار 24 تحت 2500 جنيه، ودلوقتي عيار 21 تحت سعر 2200 جنيه، وعيار 18 تحت 1900 جنيه.
ودلوقتي قولنا إيه توقعاتك لسعر الدهب؟
