افرحوا ياجماعة سعر الدولار سينزل 15%، وهذا كلام الامريكان نفسهم، وحتى البنوك العالمية تقول نفس الكلام! وطبعا انت الآن تسأل متى وكيف؟، وهل معنى ذلك ان الجنيه في امان ولا يوجد تعويم؟ تابعونا لمعرفة التفاصيل:
دلوقتي في توقعات بتراجع قيمة الدولار بنسبة تترواح من 10% إلى 15% ، خلال ال18شهر الجايين، حسب تقرير جديد لوكالة بلومبرج العالمية.
والسبب في كده، هو اتجاه الفيدرالي الأمريكي الفترة الجاية لخفض أسعار الفايدة، مع بداية تراجع معدلات التضخم.
ولنفس الأسباب تقريبا، بنك HSBC حذر المستثمرين من ضعف الدولار لفترة طويلة ابتداء من يوليو الجاي.
ولو رجعت بالذاكرة لورا شوية، هتفتكر ان معدل التضخم في أمريكا سجل أعلى مستوى ليه من 40 سنة خلال في الشهور الأولى من 2022.
وعشان كده البنك الفيدرالي هناك حاله اتقلب 180 درجة، وبعد ماكان بيحافظ على أسعار فايدة منخفضة، بدأ سباق لرفع أسعار الفايدة لمواجهة التضخم وده زود قوة الدولار عشان يسجل هو كمان أعلى مستوى ليه من 20 سنة.
وفعلا مع استمرار الفيدرالي في رفع الفايدة، بدأ معدل التضخم ينزل، عشان كده نقلت وكالة بلومبرج وجهة نظر محللين في مؤسسة مالية أمريكية بتقول ان الخطوة الجاية للفيدرالي احتمال تكون خفض تكاليف الاقتراض..
وطبعا احنا في الحالة دي يهمنا الإجابة على سؤال واحد: هل تراجع الدولار عالميا هينقذ الجنيه من التعويم؟
بص ياسيدي، تراجع سعر الفايدة في أمريكا بيخفف الضغط على عملات الدول التانية وبيقلل من هبوطها، حسب وكالة بلومبرج.
بس برضه متنساش اننا لسة بنعاني من نقص الدولار، وده تسبب في عودة السوق السودة للعملة الأمريكية وسعر الدولار فيها بقى أعلى بنسبة 30% عن السعر الرسمي في البنوك، حسب بنك جولد مان ساكس..
كمان في تقارير من بنوك عالمية توقعت تنفيذ تخفيض جديد في قيمة الجنيه، عشان يسجل الدولار على المدى المتوسط مابين 32 أو 35 إلى 40 دولار.
وحتى في العقود الآجلة للجنيه لمدة 12 شهر، سعر الدولار وصل إلى حوالي 41 جنيه، وده يعتبر مؤشر على احساس المستثمرين بأننا في مصر داخلين على خفض جديد في قيمة الجنيه.
وفعلا محمد بدرة، الخبير المصرفي، توقع ارتفاع سعر الدولار في البنك بس تدريجيا عشان يقرب من سعره في السوق السوداء، يعني في حدود 36 جنيه لكل دولار.
و الخبير محمود نجلة، شايف إن نسبة الارتفاع في سعر الدولار مش هتبقى كبيرة اوي، ولو بتسأل على معاد التنفيذ فغالبا هيحصل مع بداية دخول تدفقات من الدولار جاية من شراء مستثمرين خليجيين لحصص مملوكة للدولة في عدد من الشركات.
فهل تتوقعوا انتوا كمان ان تراجع سعر الدولار عالميا هيحسن موقفنا ويقلل من نسبة تراجع الجنيه ، ولا احنا في مصر لينا حسبة مختلفة؟
