الكينج وحسين فهمي في مرمى الانتقدات بسبب إعلان البوكسرات والسمنة!!

إعلان سمنة وزيت، وإعلان قطونيل، وتعليقات من الجمهور يسخروا فيها من الكينج محمد منير، وابن البشوات حسين فهمي، ماذا حدث؟ وما تعليقات الجمهور؟ والتعويم هو السبب ؟ كل هذا سنعرفه في التالي:

كانت صدمة لجمهور الكينج محمد منير إنه يظهر في إعلان السمن والزيت، ومش بس كده ده كمان بعد حتة صغيرة من المسلسل بنلاقي النجم حسين فهمي الواد التقيل اللي غنت ليه السندريلا سعاد حسني، طالع يعمل لينا إعلان عن قطونيل، والناس بتتريأ عليه وتقوله إيه اللي سموك عامله في نفسك ده؟.

نجوم المركز الأول بيعملوا اعلانات

النجمين احتلوا المركز الأول في السخرية على مواقع التواصل الاجتماعي، مش بس كده دول بدأو يقارنوا بينهم وبين نجوم إعلانات شهر رمضان بتاعت زمان، واللي بتمثل 90% من ذكرياتنا، وأغلب الناس كانت بتستمتع بمشاهدة النجوم وهما لسه أطفال على شاشة التلفزيون، بس الفرق إن وقتها كانت الفواصل الإعلانية بتظهر مرحة وخفيفة مش زي دلوقتي إعلان وحتة من المسلسل.

 اعلانات زمان

كلنا فاكرين إعلان راني بتاع “محمود إيه ده يا محمود”، وكان إعلان الفنانة سحر حسانين بتاع “بستك ناو بستك ناو شوكولاتة رسي واكلة الجو” والفنانة ياسمين عبد العزي وإعلانها المميز ” خواجة جه من اليابان” ، وإعلانات كتير مكنش ليها نجوم كبيرة ولا إنتاج رهيب ولا أي حاجة، لكنها لحد النهارده أغانيها لسه موجودة في عقول الناس.

زمان كنا بنلاقي إن النجوم في بداية حياتهم بيبدأو بالإعلانات زي ياسمين عبد العزيز وشيريهان وشيرين رضا، وحتى الفنانة نعيمة الصغيرة، التي كانت بترعبنا في يوم من الأيام بسبب فيلم العفاريت واللي ظهرت فيه مع الهضبة عمرو دياب، لقيناها عاملة إعلان عن بسكويت هش وناعم وبيتفتت قبل مانفتحه، أينعم إحنا مكناش بنشتري البسكويت عشان خايفين منها، بس كان الإعلان مضحك، بسبب صوتها واللي مش ماشي مع الإعلان.

انتقادات الجمهور

لكن دلوقتي وبعد ما احتلت شركات كتير مساحات الإعلانات، الموضوع مبقاش زي الأول، ودلوقتي كله بيدور ع الفلوس وبس ومحدش بيهتم بالمحتوى، عشان كده نجوم الصف الأول بدأو يظهروا في الإعلانات، زي حسين فهمي ومحمد منير وده اللي خلاهم يتعرضوا لانتقادات على السوشيال ميديا، والجمهور اعتبر إن دي حاجة مش بتليق بالتاريخ بتاعهم، وإن شخصية بحجم حسين فهمي وافق إن يكون واجهة قطونيل وهو رئيس مهرجان القاهرة السينمائي الدولي، والكينج محمد منير عمل إعلان عن نوع من أنواع سنة كريستال.

حسين فهمي واعلان قطونيل

حسين فهمي مهتمش بكلام الناس ونزل بعدها على الصفحة الشخصية الخاصة بيه الإعلان الرسمي لقطونيل واللي هو كان البطل بتاعه، وعلق عليه وكتب “الإعلان الرسمي لشركة قطونيل مصر للملابس وسر الشقاوة.. كل عام وأنتم بخير، رمضان كريم.. أدامه الله عليكم بالخير”، لكن المتابعين مسابهوش في حاله وعلقوا على البوست بتريأة وقالوا “عامل عالم فرنسي في مسلسل (سره الباتع) نطلع فاصل نلاقي العالم الفرنسي عامل إعلان ملابس داخلية”.

الكينج في اعلان سمنة وزيت

لكن منير بالرغم من إن الناس كلها متعودة عليه في إعلانات رمضان، لكن الإعلانات دي كلها كانت عبارة عن عقارات أو اتصالات أو عن البنك الزراعي المصري، عشان كده لما ظهر بأغنية طعم البيوت والناس فهمت إنه إعلان سمنة، مسكتوش عليه واتريأو وقالوا “محمد منير عامل إعلان سمنة، وحسين فهمي عامل إعلان ملابس داخلية، واضح أن التعويم طاول الكل”.

ياترى إيه السر وراه الإعلانات دي، وهل فعلا الإعلانات بسبب تعويم الجنيه، قولولنا رأيكم في الكومنتات.