مفاجأة عن فوائد وسعر البيض البودرة الذي يغزو الأسواق

حالة كبيرة جدا من الجدل بين المواطنين على مواقع التواصل الاجتماعي خلال الساعات الماضية بسبب “البيض البودرة” أو البيض المجفف.
أيه حكاية النوع ده من البيض وليه ظهر فجأة الأيام دي؟ وهل نقدر نعتمد عليه بدل البيض العادي؟ كل ده وأكتر هنعرفه مع بعض في التقرير ده.

ازاي بيتعمل؟

قبل أي حاجة وعشان تبقى فاهم.. البيض البودرة ده عبارة عن بيض طبيعي خالص وبيتعمل له عملية تجفيف في درجات حرارة معينة وبآلات خاصة عشان يتحول لبودرة.

يعني ببساطة.. البيض ده بيتعمل بنفي طريقة تصنيع اللبن البودرة.. وموجود في السوق 3 أنواع منه.. البياض لوحده، والصفار لوحده، وفي نوع الاتنين مع بعض.

استخدامات بيض البودرة

طيب أيه استخدامات النوع ده من البيض؟ هو البيض ده صحيح مفيهوش الفيتامينات الموجودة في البيض العادي.. لكن له فوايد كتير بصراحة.

زي مثلا أنه بيقوي العضم وبيحميه من الكسور.. وبيقلل خطر الإصابة بهشاشة العظام.. لأنه بيقدم للجسم 13% من الجرعة اليومية اللي الجسم محتاجها من معدن الكالسيوم.. وكمان النوع ده مفيد لصحة الأسنان.

ولو بتعمل دايت أو بتخاول تخس.. يعتبر البيض البودة الاختيار المناسب ليك ولأي حد بيعمل دايت.. لأنه منخفض السعرات الحرارية.. والحصة الواحدة منه فيها حوالي 357 سعر حراري.. يعني حوالي بيضتين من العادي.

ومسحوق البيض كمان مهم حدا لصحة القلب والأوعية الدموية لأنه بيحتوي على حوالي 286 جرام من البوتاسيوم.. اللي بيساهم في تنشيط الدورة الدموية ويظبط ضغط الدم ويحافظ على توازن السوائل في الجسم.

سعره مفاجأة

وبالنسبة لسعره في الأسواق.. فشعبة المواد الغذائية والبقالة والعطارة في الغرف التجارية، قالت إن العبوة الـ 200 جرام سعرها بيكون 40 جنيه.. والعبوة الـ 500 جرام سعرها بيكون 100 جنيه.. وسعر الكليو منه بيوصل لحوالي 200 جنيه.. وهو طبعا يعتبر أرخص بكتير من البيض العادي.

بيان وزارة الزراعة

ومع انتشار البيض البودرة والأخبار عنه.. وزارة الزراعة طلعت بيان قالت فيه إن المتخصصين في معهد الإنتاج الحيواني بيأكدوا أن البيض البودرة مينفعش يكون بديل عن البيض العادي.. وطبعا مينفعش ناكله مسلوق أو نعمله أومليت.

الوزارة قالت كمان إن استخدامات بيض البودرة بتكون أكتر في الحلويات ومصانع الحلويات بتستخدمه في تصنيع منتجاتها، وكان بيتم استيراده من الخارج عشان كدا وبس.

الوزارة قالت كمان.. إن بودرة البيض تعتبر زي لبن البودرة بالظبط.. وبيتم إضافة معلقة منها أو معلقتين على كوباية الشاي أو النسكافيه أو الكاكو أو غيرها من المشروبات.

صناعة المخبوزات والحلويات

الدكتور ثروت الزيني، نائب رئيس الاتحاد العام لمنتجي الدواجن، قال إن بيض البودرة مُجفف.. وممكن يتخزن لفترة طويلة. وصلاحيته بتوصل لشهور وسنين.

وأكد كمان على اللي قولناه من شوية أن البيض البودرة مرتبط أكتر بصناعة المخبوزات والحلويات.. واستخداماته مختلفة عن البيض العادي.. يعني مينفعش أقولك تقوم من النوم الصبح تاخد معلقتين بيض بودرة وتسلقهم أو تعملهم أومليت.