موسم رمضان هذا العام ظهر به الكثير من النجوم والوجوه الشابة من أبناء الفنانين الذين قرروا إن يخوضوا نفس تجربة أسرهم، ويدخلوا الوسط الفني ويشتغلوا، ومنهم من سبق له خوض التجربة وقدم أعمال سابقة ومنهم من ظهر للمرة الأولى.
فكرة إنك تكون ابن ممثل أو مخرج أو حد من الوسط الفني وتقرر تمثل بتفتح عليك باب إنك شغال بالواسطة، زيها زي مثلا لعيبة الكورة اللي ولادهم بيقرروا إنهم يبقوا لاعيبة زيهم، ولكن في النهاية سواء التمثيل أو الكورة، فانت قدام الجمهور، ومطلوب منك تحقق عائد، فلو حد ساعدك تبدأن عمره ما هيقدر يخليك تنجح وتكمل.
ولاد الممثلين اللي دخلوا المجالف الفني كتير، ولكن بنتكلم عن المتواجدين على الساحة خلال موسم رمضان حاليا، منهم اللي أول مرة يمثل ومنهم اللي من أهم نجوم الساحة الفنية.
طبعا على راس القايمة دي الفنانة دنيا سمير غانم، وهي طبعا بنت الراحل سمير غانم والفنانة الراحلة دلال عبدالعزيز، وهي بتقدم بطولة مسلسل «جت سليمة» خلال الموسم الحالي، وهي طبعا معروفة إنها من أهم المواهب على الساحة الفنية، بعيدا عن أسرتها، فهي بتقدم نجاح كبير ومن سنين كمان.
وبعدها بينضم للقايمة الفنانة ليلى أحمد زاهر، واللي بتشارك الموسم ده من خلال مسلسل «تلت التلاتة» من بطولة الفنانة غادة عبدالرازق، اللي بيدور في إطار الجريمة والتشويق، وليلى من النجمات اللي بيتعرضوا لنقد وهجوم كبير رغم النجاحات اللي محققاها، وبيفضل الاتهام الأكبر ليها إنه بتقلد دنيا سمير غانم.
من أشهر أبناء الفنانين المتواجدين على الساحة، وكمان خلال موسم رمضان الحالي الفنان نور النبوي، وده ابن الفنان خالد النبوي طبعا، وهو من أبناء الفنانين المحبوبين جدا واللي من أول ظهوره الجمهور استقبله بحب وترحاب، وكمان البنات اتعلقت بيه جدا، وهو بيظهر خلال موسم رمضان الحالي من خلال مسلسل الأجهر للفنان عمرو سعد.
وبمناسبة الكلام عن الأجهر وعمرو سعد، فخلينا نقول كمان إن من النجوم المتواجدين على الساحة الموسم ده هو ابنه، النجم الشاب رابي عمرو، واللي خطف الانتباه بقبوله وطلته على الشاشة من أول ظهوره في المسلسل بعد ما بقى شاب، وهو ظهر قبل كدة مع والده في عدد من الأعمال الفنية كطفل، ولكن شكلنا هنشوفه في أدوار مختلفة الفترة الجاية.
مسلسل ستهم للفنانة روجينا فتح الباب لمشاركة اتنين من أبناء الفنانين، ونبدأ الأول بالفنان أحمد كمال أبو رية، ومن الاسم طبعا عرفنا هو ابن مين من الفنانين، ودي مش أول مشاركة فنية ليه، ولكن هو شارع قبل كدة في عدد من الأعمال منها مسلسل قوت القلوب الجزئين، ومسلسل قصر العشاق.
وفي مسلسل ستهم باردو بتظهر مريم أشرف زكي، عشان تسجل الظهور الأول ليها مع والدتها روجينا في مسلسل ستهم، واللي بيقولوا عنها غنها بتمثل زي عمتها ماجدة زكي.
وطبعا في مسلسل جعفر العمدة، بتظهر الفنانة الشابة لمى كتكت، وهي بنت الممثلة المصرية أمل رزق، والمنتج الأردني الراحل إسماعيل كتكت، ودي مش أول مشاركة فنية ليها، وهي بتوصف نفسها إنها فنانة شاملة وبتشتغل بمجهودها مش بالواسطة.
وأخيرا، النجم الشاب محمود عمرو يس، وهو حفيد النجم الراحل محمود يس، وابن السيناريست المعروف عمرو محمود يس، واللي بيظهر الموسم ده من خلال مسلسل «الكتيبة 101» ولكن هو ليه مساهمات فنية قبل كدة.
