عمل نقاش وكهربائي في شقته وقبل الفرح راحوا اشتروا رخامة المطبخ مع بعض.. فرحهم أسطوري والعريس ادى ضهره للعروسة يوم الفرح.. كلامي هنا عن زفاف المذيع يحيى حمزة على ملكة جمال مصر ريم رأفت.
الزفة كانت أسطورية وفستان العروسة مفيهوش غلطة.. كل حاجة معمولة صح والترتيبات والحضور كانوا أحلى حاجة حصلت في الفرح.. طيب يلا بينا في الفيديو ده نشوف أبرز اللقطات اللي حصلت في فرح حمزة يحيى وريم رأفت.
الاتنين كانوا مستنيين اليوم الحلو ده تعبوا بجد في تجهيزات الشقة والعفش والحكايات اللي في الجواز دي كلنا عارفينها.. لدرجة إنهم كانوا بيطلبوا دليفري وياكلوا في الشقة عشان ينجزوا حالهم.. طيب إيه حكاية الفرح بقى اللي قلب السوشال ميديا وناس بتقول عليهم أحلى عريس وعروسة ومش عارفين هما فين.
زفاف أسطوري
لقطات الفرح ده كتير العريس عمل فريست لوك ولبس بدلة بيضا وادى العروسة ضهره وهي اللي قربت منه وكانت ماسكة بوكيه الورد وقربت عليه وحضنته وده عكس اللي بنشوفه في الأفراح.. الغريبة بقى إن صحاب العريس بيقولوله انت معيطتش ليه يا بني.. والزغاريد اشتغلت والكل كان فرن بيهم عشان كانوا مستنيين اللحظات دي من زمان.
اللوك ده العريس كان عامله عشان يعمل السيشن هو وعروسته وفعلاً اتصوروا أحلى صور مع بعض واتبسطوا باليوم ده والعروسة كانت مبسوطة وفرحانة جداً بالليلة بتاعتها دي وكان في صورة جريئة كده في النص وفي بينهم بوسة.. حقهم بقى ما هم كتبوا الكتاب من كام يوم والكل كان فرحان بيهم.
لوك تاني
العريس كان واخد كل الشو لنفسه وبعد ما خلص السيشن والصور الحلوة اللي هتبقى أحلى ذكرى في حياته غير البدلة بقى ولبس بدلته السودا والعروسة زي ما هي بأحلى فستان أي عروسة تتمناه.. العروسة ريم رأفت جسمها رشيق طويلة شوية والفستان زودها جمال.. وهو من تصميم فاطمة نصر والماكياج عملته نسمة منصور وتسريحة الشعر عملها مصطفى طنطاوي.. طبعاً كل حاجة كان مترتبة صح وشكلهم مكانوش مستعجلين.
حضور الزفة
وعشان هما مكانوش مستعجلين كان الصحاب مستنيين اليوم ده أكتر منهم وده اللي كان واضح في التعليق اللي كتبه الفنان نور بدر اللي نشر صور ليه مع العريس وقال هرمنا من أجل اللحظة دي.. طبعاً نور بدر خد معاه خطيبته نور إيهاب الفرح ورقصوا مع بعض.. كمان كان في صورة ليهم مع الإعلامي الرياضي إبراهيم فايق.. والعريس والعروسة ظهروا في فيديو ليهم وهما بيرقصوا على أغنية سالكة بنسوق الدنيا عن عن ولا لينا مالكة.
الفرح كان مليان رقص وأحضان بين العريس والعروسة وده حقهم طبعاً في ليلة زي دي.. القاعة كانت حلوة والفرح أسطوري والديكورات جميلة ومبهجة وكل قرايب العريس والعروسة حضروا واتصوروا وكان في بينهم حالة من الحب والفرحة زي أي أهل مستنيين فرحة ولادهم.
قبل الفرح العريس تعب في الشقة والتجهيزات ومعاه عروسته لدرجة إن في فيديوهات ليه وهو شغال نقاش في شقته وبيعمل ألوان الحوائط بنفسه.. العروسة في مرة جابت أكل دليفري وقعدت جنب عريسها ياكلوا ومنها جو رومانسي ومنها بيتابعوا شقتهم اللي بتتوضب وليه متفرشتش.. العريس بردوا اشتغل كهربائي وكان واقف على سلم خشب يظبط النجفة زيه زي أي عريس بيتابع تجهيزات شقته.. واللي واضح من الفيديوهات اللي وثقوها دي إنهم تعبوا كتير عشان يوصلوا للنقطة دي.. ربنا يفرحهم بحياتهم وألف مبروك ليحيى حمزة وريم رأفت على الزفاف السعيد.
قولولي بقى إيه رأيكم في الفرح واللقطات اللي عرضتها ليكم؟ اكتبولي في التعليقات.
