كل يوم والثاني نسمع عن خناقة جديدة في كواليس مسلسل جعفر العمدة، والموضوع خرج من يد المخرج محمد سامي والفنان محمد رمضان، خصوصا بعد ما انتهوا من التصوير والفنانين يتحدثوا عن التجربة بكل حرية.
في الأول ظهرت خناقة زينة مع أبطال العمل كله.. وطلعوا بس مش طايقين بعض في أحداث المسلسل.. لا دول مش طايقين بعض في الحقيقة.. والخناقة هنا مش على راجل واحد.. لا ده على مسلسل واحد.
ولسه محليناش مشكلة زينة اللي مقاطعة المسلسل وحالفة ما تحتفل بأي حاجة تخصه.. دخلنا في مشكلة جديدة بين منة فضالي وأحمد داش.. حاجة مش منطقية أنا عارفة بس أهو ده اللي حصل.
الفنانة منة فضالي خلصت تصوير المسلسل من هنا.. وبدأت رحلة اللف على القنوات والبرامج.. تحتفل وتتكلم وتلم القرشين.. وتستعد لأجازتها الجاية بره مصر كالعادة يعني.
وفي لقاء من دول قالت منة فضالي سر محدش يعرفه عن جعفر العمدة.. إنه من ضمن المشاكل الموجودة هو ترتيب أسامي الأبطال على التتر.. وبالنسبة لها هي.. كان وجود أحمد داش “اللي كلهم لسه شايفينه عيل صغير يعني”.. قبل منها
منة بتقول إنها اتفاجئت بإن
اسمها مكتوب بعد اسم أحمد داش في التتر.. واتفاجئت أكتر لما عرفت أن الممثل الصغير ده مشترط الموضوع ده في العقد بتاعه.. إنما هي بالخبرة بتاعتها دي كلها متعرفش تعمل خطوة زي دي
ورغم إنها قالت في حقه كلمتين حلوين وإنه ممثل هايل وإنها مش قاصدة تغلط فيه بالعكس دي بتحبه جدا.. بس هي والممثلات التانيين اتفاجئوا ان اسمه مكتوب الأول
طب هل الموضوع ده هيتغير لما نتكلم فيه يا منة؟.. هي بنفسها قالت لأ وإنه خلال التتر نزل أول يوم ومش مهم المهم هو نجاح المسلسل والصدى اللي محققه.. وحتى محمد سامي مش هيقدر يعمل حاجة في القصة دي لإنها مع الشركة المنتجة.
