الكل يعرف قصة منى زكي وأحمد حلمي وكيف عرفوا بعض وتزوجوا، وأصبحوا من انجح قصص الحب والزواج في الوسط الفني ربنا يسعدهم ، لكن كل فترة أحدهم يخرج ويقول لنا سر من اسرار علاقتهم الحلوة وازاي مكملين ومستمرين في ظل حالات الانفصال الكتيرة اللي ضربت النجوم مؤخراً.
من كام يوم كانت منى في لقاء مع محمود سعد ، واتكلمت عن جوزها وحبيبها أحمد وقالت عنه كلام جميل ، وكشفت سر من اسرار نجاح جوازتهم لحد دلوقتي اللي بقالها تقريبا 20 سنة ، وقالت علاقتنا مستمرة لأننا مبنشوفش بعض كتير، لكن الحقيقة أحمد شخص متفهم، هو هدية من ربنا ليا، علمني يعني إيه تسامح، دايمًا بيتفهم ظروف شغلي، وبيشجعني أكون أحسن عشان كده بعشقه.
كمان قالت انها بتاخد رأيه في اي حاجة كوميدي ولايت بتتعرض عليها وبيساعدها وبيشجعها تكون احسن واحسن ..
منى زكي زماااان مكنش في دماغها خالص انها تتجوز احمد حلمي اللي حبها وفضل يلف وراها عشان ترضى تبقى معاه ، وحلمي حكى ده بنفسه مع اسعاد يونس ، وقال ان هو اللي حبها الاول وكان معجب بيها لكن هي مكنتش في دماغها القصة ولا فكرت فيه خالص وكانت معتبراه صديق ، لكن مع اهتمامه بيها وانه مفقدش الامل وطلب يتقدملها فكرت في الموضوع بشكل تاني.
تعالى احكيلك احمد ومنى عرفوا بعض ازاي من عشررررين سنة ..زمان اوي كان احمد راح للمنتج محمد فوزي عشان يشارك في مسرحية ، وبالصدفة منى راحت نفس المكان وهو قام فتحلها وكانت اول مرة يقابلها وبعدها بقوا اصحاب وعملوا مع بعض فيلم عمر 2000، وفي وقت تصوير الفيلم كان معجب بيها ومش عارف يقولها وفضل يقرب منها ويبقى معاها وقت ماتحتاجه ويعمل حركات جدعنة عشان يلفت انتباهها
ولما سافرت منى زكي تصور فيلم افريكانو ، فضل يبعتلها حلمي ويكلمها ويبعتلها ورد ، وهنا قرر بقى انه يتشجع ويقولها الحقيقة ، واتصل بيها من مصر وهي مسافرة وقالها انه بيحبها وعايز يتجوزها كمان
وقتها منى كانت مشهورة وخلاص الجمهور عرفها لكن احمد حلمي كان لسة متعرفش اوي ومش مشهور زيها ، لكن هي حست انه شاريها وعايز يسعدها باي شكل ، وحكت منى لباباها القصة لكنه مكنش عاجبه عشان لسة في بدايته ومش من مستواهم وقتها.
واضح ان منى وشها كان حلو عليه وفي الوقت ده حلمي دخل يصور فيلم 55 اسعاف ورحلة حب ، ومن هنا بدأ يتشهر والجمهور يعرفه وملامح مشواره الفني بدأت تظهر.
وراح حلمي قابل والد منى زكي ، لكنه اتشرط عليه بقى دي بنته الغالية ، وطلب منه انه يعيشها في نفس المستوى الاجتماعي ويجيبلها شبكة بحوالي40 الف ج ، وده كان رقم كبير جدا من عشرين سنة ، واداله فرصة سنة عشان يجهز نفسه للجوازة.
وعشان هي من نصيبه ، الدنيا اتسهلت وشركة كبيرة طلبته يعملهم اعلان ، راح حلمي طلب 30 الف جنيه اجره في الاعلان وفعلا عمله وخد الفلوس وجابلها بيها الشبكة ، وبعدها بدأ يجهز شقته وسنة 2002 اتجوز حلمي ومنى.
وعملوا فرح كبير وجميل حضره نجوم كتير منهم عادل امام وأحمد زكي ، رغم ان حلمي كان لسة ممثل صغير لكن تقريبا الوسط الفني كلها وقتها حضروا فرحهم وكانت مفاجئة بالنسبالهم ان منى زكي تتجوز حلمي.
، ومن بعدها الدنيا اتفتحت قدامه وبقت وش السعد عليه وقدر يحقق نجاحات كتيييير السنين اللي بعدها وعمل افلام كسرت الدنيا لحد مابقى نمبر وان الكوميديا في مصر وكلنا بنستنى افلامه بفارغ الصبر.
احمد ومنى خلفوا اول بنوتة لي لي سنة 2004 ، وبعدها فضلوا سنين طويلة مانعين الخلفة ، وركزوا هما الاتنين في شغلهم بس ، وبعدين رجعوا تاني خلفوا انهم سليم في 2014 ، وكمان خلفوا يونس في 2016 ، لكن الولدين مش بينشروا صورهم على السوشيال ميديا خالص.
وطبعا بعد قصة الحب دي الجمهور طول السنين اللي فات كان مستني يشوف منى وحلمي مع بعض في عمل فني واحد لكن معملوش ، لحد ما منى اعلنت من ايام انهم لقوا قصة حلوة وهيعملوا مع بعض حاجة قريب وكانوا مستنين يلاقوا ورق كويس وقصة مختلفة عشان دي اول حاجة يعملوها مع بعض من زمااااان.
