فن و مشاهير

انتصار الجريئة وابرز تصريحاتها التي جعلتها في مرمى الانتقاد

هي بنت إسكندرية، يعني «مايه مالحة ووشوش فالحة»، لكن من أصول صعيدية، عندها ميزة لن تتخيلها ، تقول كلام متسجل، وترجع تقول مقولتش، و«قالوا للي قال احلف، قال جالك الفرج»، تاريخها الفني طويل وفيه نجاحات كثيرة، ولكن في آخر كام سنة دخلت مجال التقديم، البرامج خلتها تتكلم، ولسانك حصانك إن خنته خانك.. هي الفنانة انتصار

اتولدت في إسكندرية سنة 1972، واتخرجت من كلية تجارة جامعة إسكندرية، وهي صغيرة كدة كانت بتشارك مع فريق المسرح، ودي كانت بدايتها الفنية كهواية، لكن بعد شوية اكتشفها المخرج رأفت الميهي وقدمها في فيلم «تفاحة» واللي بتعتبره من أهم الأعمال اللي شاركت فيها.

الفنانة انتصار اشتهرت بأدوراها الكوميدية، واشتغلت في أفلام كتير منها «سهر الليالي، أبو علي، ولاد العم»، ومسلسلات منها «الوتد، الزلزال وتوابعه، يوميات زوج معاصر، راجل وست ستات».

هي بتمثل كوميدي بس، وإن كانت بتصنف نفسها كدة، لكن هي كمان اشتغلت دراما كتير، ولعبت أدوار صعبة ومركبة، وليها قبول على الشاشة وقدرة فنية عالية، ولكنها اختارت تصنف نفسها ممثلة كوميدية، لأن ده بالنسبالها كدة «اللي قفل اللعبة»، اللي هو عرف يعمل كل حاجة تاني، وكمان فوق كل ده عندها موهبة زيادة، لأن مش كتير في العالم اللي عندهم القدرة دي على حد كلامها.

انتصار عندها مشكلة كبيرة مع مسألة الجنس، مش النوع، إن هي عايزة تبقى راجل لا سمح الله، لا التاني اللي هو العلاقات، عندها فكر مش عارفين بريء ولا غريب عن الموضوع، بيخليها تتكلم كلام مهما كنت حر مش لازم تقوله، لإنه شيء شخصي.

ودي حكاية عجيبة، لأن الفنانة انتصار في حلقة من حلقات برنامج «نفسنة»، واللي كانت وقتها مع شيماء سيف وهيدي كرم، كانوا عاملين حلقة مريبة، محدش فاهم ايه سببها، بس هي بتتكلم عن موضوع الجنس، المهم إن الفنانة انتصار قعدت تتكلم عن الأفلام دي، وأهميتها بالنسبة للثقافة الجنسية، ولما شيماء سيف قالتلها إنتي بتتفرجي، قالت اه، فطبعا الجمهور هاجمها، وده شيء بديهي، فنانة مشهورة عملت فوق الـ200 عمل فني طالعة تتكلم في حاجة زي دي على الهوا.

المهم يعني إنها بعد فترة طلعت تتخانق، وتقول إن الناس اللي نقلت الخبر مكلفتش نفسها تشوف الحلقة، رغم إن كل اللي شاف الحلقة سمعها وهي بتقول، المهم بقى مرة في برنامج من فترة قريبة عشان المذيعة شغلتلها الفقرة دي وهي بتقول اه بتفرج، ومنفعتش الحجة القديمة، قامت متخانقة مع المذيعة وقالتلها على فكرة أنا حرة، ودي حياتي الشخصية، وطبعا يعني محدش قالها مش حياتك، لكن إحنا بنقول إنك قولتي.

انتصار بتتميز بالجرأة يعني، عشان هي حرة وكدة، فقالت إنها شرحت لابنها كل حاجة ليها علاقة بالعلاقات الجنسية، ومن ضمن المطالبين بتدريسها في المدارس، وبالمناسبة دي هي والدة ملكة جمال المرهقات شاهيستا نادر، وقالتلها إنها معندهاش مانع إنها تعمل مشاهد بوس وحاجات من دي، طالما طبعا في سياق الدرامة، والبنت قالت أنا لسة صغيرة ومش هعمل ده دلوقتي، ممكن لما أكبر شوية أغير رأيي.

الفنانة انتصار كان ليها معركة جانبية كدة مع شيماء سيف، لأن شيماء اتهمتها بإنها تآمرت عليها عشان تمشيها من برنامج نفسنة، فانتصار ردها كان غريب، مقالتش مقولتش، لأ أنا قلت، قالت أنا وهيدي كرم اتكلمنا عليها، بس ده كان في سياق الشغل، اللي هو زي البوس في سياق الدراما كدة.

الفنانة انتصار اتجوزت مرة واحدة، وانفصلت في وقت ما محدش يعرفه، وعندها ولد وبنت، ممدوح وشاهيستا، ومن فترة قالت إنها مخطوبة ورفضت تكشف عن هوية الشخص ده، بس مش عارفين بقى كملوا مع بعض ولالا.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى