لا ترى نفسها ملكة جمال وتفكر تجري عمليات تجميل، وتقول هسجد عندما أتزوج للمرة الثالثة من العريس الجديد.. ريم طارق طليقة مطرب المهرجانات حسن شاكوش مازال لديها مفاجآت وحكايات كثير نتكلم عنها.
يا ترى إيه المفاجأة عن العريس الجديد وجوازتها التالتة؟ وهي عايشة فين دلوقتي؟ وإيه حكاية الملايين اللي خدتها من حسن شاكوش؟.. ويا ترى إيه قصة عروض التمثيل اللي جاتلها؟.. كل دي تفاصيل وأسرار هنتكلم عنها في الفيديو اللي معايا.
ريم طارق مستنية العوض اللي ينسيها أيام الهمْ اللي عاشتها مع طليقها حسن شاكوش.. بتقول إنها ناوية على جوازة تالتة وكمان كشفت مفاجأة عن العريس الجديد اللي جاي في السكة وشكلها ناوية تخلص العدة من هنا وتكتب كتابها من هنا.. ده غير بقى إن حياتها بقت كليانة تفاصيل وحكايات وخدت شهرة جامدة اليومين دول.. وبتتكلم عن عمليات تجميل وعروض تمثيل.. يلا بينا نعرف كل جديد اتقال من ريم طارق المرة دي.
طابع الحُسن
ريم طارق طلعت في بثْ مباشر واتكلمت عن حكايات كتير بس اللي تابعوها قعدوا يعاكسوها ويقولوا إنها جميلة واللي قال إنتي ملكة جمال واتكلموا عن النُغزة اللي في دقنها وناس فكروها عملية تجميل والقصص دي.. فقالت لأ والله يا جماعة أنا مش ملكة جمال ولا حاجة ده أنا شكلي أستغفر الله العظيم.. واللي عندي ده طابع الحُسن وده مش عملية ولا حاجة ده طالع لوحده.. وأنا بفكر أعمل فيلر وبوتوكس يعني هتلجأ لعمليات لتجميل.
جوازة مفاجأة
طبعًا الناس عاوزة تتكلم عن حاجات شخصية وتعرف إيه الجديد عندها وإيه المستخبي والفنانة اللي جابت سيرتها واللي كان طليقها حسن شاكوش بيروحلها في رمضان.. فقالت يا جماعة أكيد هتكلم عن حاجة بدون دليل ومينفعش حد يتكلم من غير ما يكون معاه اللي يثبت كلامه.. الغريبة بقى إنها قالت عن جوزها الأولاني إنه كان عنده مشاكل تمنع إنها تكمل معاه في الجوازة.. لكن الانفصال عن حسن شاكوش المفروض إن الناس بقت عارفة خلاص.
ولو تفتكروا وقت جوازة ريم طارق وحسن شاكوش والسجدة اللي سجدتها لما اتجوزت وفكرت نفسها خلاص إنها لقت العوض بس طلعت آوت المرة دي.. قالت إنها مسجدتش لما انفصلت عنه لما الناس قعدوا يسألوها.. وبعدها قالت أنا هسجد تاني بس في الجوازة التالتة أكيد ويكون العوض اللي ربنا يعوضني بيه عن كل اللي شوفته.
وهنا طبعًا الناس اتكلمت عن عريس في السكة وإنها ناوية على التالتة بعد ما تخلص عدتها من شاكوش.. ومحدش عارف ريم ممكن تكون مخبية إيه وهتفاجئ الناس بإيه الفترة الجاية.
ريم طارق عايشة فين؟
ريم طارق كملت في المفاجآت بتاعتها وقالت إنها ولا خدت ملايين من حسن شاكوش زي الناس ما فاكرة وكمان مطالتش منه ملايين ولا الكلام ده.
والجديد بقى إنها مخدتش تمكين من الفيلا وبتقول إنها عايشة في بيت باباها ومخدتش فيلل من حد وحتى حقوقها اللي المفروض تاخدها من شاكوش (القايمة يعني) قالت والله لسه مخدتش حقوقي ولا حصل أي جديد في الموضوع ده.
بس ده ميمنعش إنها حققت حققت شهرة كبيرة الفترة بتاعت الجواز والانفصال والمشاكل دي واللي بسببها جالها عروض تمثيل وبتقول إنها لسه مقررتش هتعمل إيه في العروض دي.. لكن اللي هي متأكدة منه إنها هتكمل في السوشال ميديا عشان لو في أي حاجة تدافع عن نفسها قصاد أي كلام غلط ممكن يتقال..
تفتكروا في عريس تالت في حياة ريم طارق هتفاجئنا بيه الفترة الجاية؟.. وهتقبل عروض التمثيل ولا لأ؟.. ويا ترى هتاخد ملايين من حسن شاكوش بعد ما اداها القاضية غيابي ولا خلاص كده كل حاجة هتروح عليها؟.. اكتبولنا آرائكم في الكومنتات.
