مسلسلات رمضان تقدم وجبة متكاملة للجمهور، فبين الدراما والأكشن والرومانسية والقضايا الاجتماعية كالمشكلات الزوجية، ستجد كل هذا وأكثر في مسلسلات رمضانولكن من الممثلين من خطف الأنظار بتالقه وخفة ظله ومنهم من قلنا عن أدائه رخم أو ثقيل.
شطارة الممثل بتبان في قدرته على توصيل مشاعر معينة للجمهور، فلو هو كان بيعمل دور واحد رخم أو خبيث، وقدر غنه يخلي الجمهور يطلع على السوشيال ميديا يهاجمه ويتمنى غنه يحصله مصيبة أو دوره ينتهي بأي شكل من الأشكال، لأن الناس بقت خلاص عايزة تدخل من الشاشة تجيبه من رقابته، فهو كدة قدر إنه في يتقمص الدور بتاعه.
في مسلسلات رمضان اتنافس عدد كبير من النجوم على تقديم أرخم الشخصيات، ولكن مسلسل جعفر العمدة قدر إنه يقدم اتنين منهم بمنتهى البراعة.
الفنان مجدي بدر إنه يقدر شخصية الرخم الخبيث اللي معندوش أي مبدأ ولا أخلاق في مسلسل جعفر العمدة ببراعة شديدة، وصلت لمرحلة إنكم تبقى بتتفرج عليه ومش طايقه، هو بيلعب دور بلال شامة، وده اللي خطف ابن جعفر العمدة وهو صغير، وطول الوقت هربان أو بيهرب وجعفر هيتجنن ويجيبه، لكن هو عامل زي التعالب، مكار، ومش فارق معاه حاجة، ولحد آخر لحظة في حياته هيعمل أي حاجة عشان يأكد إن هو رزل.
كمان الفنان أحمد عبدالله، اللي بيلعب دور كارم فتح الباب، في مسلسل جعفر العمدة، هو كمان قدير في لعب دور الشاب الرزل، اللي قاعد ليل نهار بيفكر إزاي يضايق جعفر، ولكن كل مرة بيرجع هو الخسران، وجعفر بيفرج عليه أمة لا إله إلا لله، وباردو مبيتعلمش، هو عيل طري كدة، ولابس دهب وبتاع، وذكاؤه محدود شويتين، ومفيهوش أي ميزة، غير إن هو يطلع يتهزق ويرجع تاني، ومع ذلك مبيحسش خالص، ويرجع يفكر ويدبر في شر تاني.
عندنا كمان من النجوم اللي تألقوا في تقديم شخصية البني آدم الثقيل، الفنان محمد عز، في مسلسل المداح، واللي بيلعب دور زين، وده كان جوز هبة مجدي، اللي هي بقت مرات حمادة هلال في المسلسل، وده باردو طالع بدور واحد غتيت، وعليه شوية نظرات خبث مالهاش حل، الناس بقت بتتمنى جن يلبسه ويروح بعيد عننا عشان خلاص اتخنقوا منه.
الفنان أحمد صفوت الناس فرحت لما اتقتل في مسلسل «سره الباتع»، بسبب دوره الرخم في مسلسل «الأجهر» وهو باردو طالع شخص رزل قاعد بيرازي في بطل العمل طول الوقت، وهو ابن المعلم سعداوي اللي اتبنى عمرو سعد من وهو طفل بقى، وكبر على إيده.
اللي كان مفاجأة الموسم بقى هو الفنان أحمد عيد واللي بيلعب دور مسعود عبدالجبار في مسلسل عملة نادرة، وهو باردو شخص رزل وثقيل، وكمان حاقد، وقدر إن هو يفاجئ الجمهور ببراعته في الدور، ويحقق نجاح كبير خلال الموسم الرمضاني الحالي.
