من أجل يسرا..نانسي عجرم تتجاهل فنانة عالمية شهيرة

من المعروف أنه عندما نلتقي مع نجوم عالميين فإننا نجري ونسرع من أجل السام عليهم والتقاط الصور، لأنها مواقف نادرة أن نراهم، ولكن نانسي عجرم كسرت هذه القاعدة من أجل الفنانة يسرا، للتي فرحت فرحا كبيرا عندما رأتها فما القصة؟

مهرجان البحر الأحمر بصراحة يا جماعة مقفل العداد جامد، كل يوم والتاني بنلاقي نجم عالمي مشهور معدي على السجادة الحمراء، ولا متصور مع الجمهور، ولا معموله ندوة وبيتكلم على أعماله في هوليوود ولا بوليوود عادي كده.

بس كل ده كوم، والتعامل مع يسرا كوم تاني خالص، خصوصا من المغنيين اللبنانيين، كل واحدة تشوفها تحلف بحياتها، وتجري عليها عشان تتصور وتغني وترقص معاها، ده يسرا طلعت محبوبة أوي

في حفل الافتتاح إليسا أول ما شافت يسرا راحت لها وأحضان وبوس والنبي نتصور، لا والنبي نرقص سوا، ونسخة طبق الأصل من ده عملته نانسي عجرم برضه في حفل الختام ، مقدرش تمسك نفسها واتحركت بعفوية كبيرة

نانسي سابت كل الناس وأول ما لمحت يسرا من على المسرح نزلت جري، وراحت لها وهي ماشية في طريقها مكنتش شايفة غير يسرا، عدت على كام فنان عالمي كده، منهم نعومي كامبل، الموديل والممثلة العالمية الشهيرة، اللي لما جت مصر من كام يوم في عرض أزياء ديور الدنياء وقفت على رجل

نانسي عجرم دخلت على يسرا بكل الحب، حضنتها وباستها واتصورت معاها، وكان واقف جنبها أحمد حاتم وهدى المفتي حضنتهم هما كمان، فا واحد من اللي واقفين قالها ايه يا نانسي هتفضحينا قدام الأجانب، تعالي سلمي على نعومي كامبل دي ضيفة برضه، رجعت وسلمت عليها عالماشي كده وخدت الصورتين ورجعت ليسرا تاني

طبعا يسرا بروحها الحلوة اتبسطت أوي من نانسي عجرم، وقعدت تغني وترقص معاها على أغنية “قول تاني كده”، وكانت منشكحة أوي إن الناس كلها في مهرجان البحر الأحمر كانوا لما بيشوفوها بيقفوا يضربوا لها تعظيم سلام

ده حتى شاروخان أول ما شافها في حفل الافتتاح قالها أنا ليا حضن يا يسرا، وطبعا هي ما صدقت، ومسابتوش غير لما حضنته، يا بختك يا فنانة والله ده انتي عدى عليكي في المهرجان ده اسامي محصلتش قبل كده.

مهرجان البحر الأحمر قفل العداد زي ما بيقولوا في عدد الضيوف الأجانب،مش بس شاروخان وشارون ستون اللي جم من أول حفل الافتتاح، ده على مدار أسبوع كل يوم ضيف داخل وضيف خارج

من جاكي شان لـ مايك تايسون لريتيك روشان بتاع بوليوود، لزميله رانبير كابور، أندي جارسيا، وطبعا مش هننسى ماريا بيدرازا بطلة مسلسل Elite المثير للجدل، وغيرهم وغيرهم من الفنانين العالميين اللي بجد

بس كل دول يعدوا من هنا،ويسرا على وضعها، كل الفنانين بيتصوروا معاها، كله بينشر صوره ويقول الديفا بتاعتنا.