فن و مشاهير

سبب صادم وراء اعتزال ميريهان حسين التمثيل

واضح إن الفنانة ميرهان حسين تعيش حالة من الحزن والغضب خلال الفترة الحالية وصلت إلى أن تخبر جمهورها بخبر إعتزالها، فما القصة وما السبب وراء الاعتزال؟ تابعونا لمعرفة التفاصيل من خلال التقرير التالي:

بديلة شيريهان

اللي متابع ميرهان حسين على حسابها في إنستجرام هيتأكد إنها موهوبة فعلًا مش لازم تظهر في مسلسلات ولا أفلام عشان تقول للجمهور إنها ممثلة شاطرة.. محدش ناسي إنها بارعة في التقليد أستاذة في الرقص برنسيسة في اختيار اللي بتعمله لدرجة إن الجمهور قال عليها لازم تقدم فوازير لأنها بديلة النجمة شيريهان فعلًا لأن محدش اختلف على موهبتها.

فاكرين لما قلدت الفنانة نبيلة عبيد وكانت متميزة ونبيلة أعجبت بيها فاكرين ليها دورها في عمر وسلمى فاكرين ليها دورها في مسلسل “توبة” مع مصطفى شعبان.. طيب هي ليه زعلانة بعد كل الإشادات دي؟.

اعتزال التمثيل

ميرهان حسين فاجئت الجمهور من كام ساعة وكتبت ستوريهات على حسابها في إنستجرام، وقالت إنها في إجازة مفتوحة من السوشيال الميديا والمكالمات والالتزامات والمجاملات والتواجد من أجل الآخرين.

معقول كل ده مرة واحدة أيوه وكمان هتعتزل التمثيل وقالت مش إنها هتكون موجودة ولا عايزة حاجة من حد ولا حد يعوز منها حاجة واللي زمان عاشته لغيرها دلوقتي هتعيشه لنفسها.. وكمان ولا عايزه تقدير لا في شغل ولا في حياة ولا صحاب ولا حبايب ولا معارف ولا في أي حاجة تستاهل ولا حد يستاهل.

وشكرت اللي بيحبوها لكن اللي مش بيحبوها لازم يشيلوها من حساباتهم لحد ما تقدر تواجه الحياة الظالمة دي تاني.

سبب الاعتزال

طبعًا ميرهان حسين مش مجنونة ولا طالعة تقول كده شو هي صراحة شايفة شغلها اللي بتعمله وبتشتغل على نفسها وحتى الفيديوهات بتاعة التقليد اللي بتعملها بتصور وتمنتج لنفسها وحتى اللبس بتشتريه لنفسها وتبتدي تختار وترتب كل حاجة لكن وسط كل ده هي مش حاسة بالتقدير بموهبتها حتى في وسط تعبها كل ده على نفسها وشغلها وعشان كده هي مش عاوزة تكون موجودة في مكان ومع أشخاص مش بيقدروها.

آه هي اعترفت كمان إنها قدمت أدوار مش شبهها ولا شبه موهبتها ولا بتستغل أدواتها كفنانة ممثلة محترفة خدت ورش تمثيلية ده غير صوتها الحلو وقدرتها على الغنا اللي بتعشقه.. وميرهان مبقتش سعيدة بجملة إنتي مظلومة ولازم تظهري أكتر بس معلش يا جماعة سكة ودغري كده هي مش هتعرض موهبتها على اللي مش شاييفها ولا بيقدرها وإن إحنا أصلًا في وسط مصالح وشللية وموضة ومين اتجوز مين ومين مصاحب مين؟.. مش مين شاطر ومين موهوب؟!!.

علاقة دنيا سمير غانم

واضح كده إن ميرهان حسين جايبة آخرها وحالتها بقت صعبة فعلًا وكلامها الجمهور حسْ بيه وحصل معاها تعاطف ومن هنا بدأ يكون في مقارنة بين اللي بيحصلها واللي شافته واللي بيحصل مع الفنانة دنيا سمير غانم وهنا جت سيرة دنيا عشان في اهتمام بيها والكل بيقول عليها فنانة شاملة بتغني وتستعرض وتمثل وبيطالبوها تعمل فوازير وبيقارنوها بالفنانة شيرهان.. وميرهان حسين متقلش عنها حاجة ومفيش أي اهتمام بيها.

الجمهور طالب إن يكون لميرهان مكانة فنية الفترة الجاية لإنها تستحق ولازم تتراجع عن موضوع الاعتزال ده وتكمل عشان حرام الموهبة دي تتطفي.

تفتكروا ميرهان حسين عندها حق في اللي قالته.. وهل بعد اللي حصل من تعاطف معاها ده هتتراجع عن قرار الاعتزال وترجع يكون ليها مكانها وتكمل ولا محدش هيهتم بيها أصلًا ويفضل الوضع زي ما هو؟.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى