فن و مشاهير

نجوم تشبهوا بالنساء وأثاروا غضب الجمهور

النجوم  اختياراتهم في اللبس غير مفهومة وبلبسوا شبه السيدات وهذا أمر غير عادي ويقلل من أحترام الجمهور للنجم، بالتأكيد عرفتو عمن نتحدث.

محدش ينكر ان كلنا بنحب صوت واغاني سعد لكن امبارح غلط غلطة كبيرة في اختيارته للبسه اللي ظهر بيه في حفلة تقويم جدة، وطلع يغني وهو لابس بنطلون متعرفش بقى بتاع صيادين ولا بتاع ترنج البيت ولا ايه بالظبط ، وكمان لبس حاجة شبه الشبيكة كدا من فوق ومخرمة وشكلها ستاتي اوي يا احمد ،، وبعد كل ده لابس عليهم بليزر ،، طب ازاي؟

لوك احمد سعد كله كان غير موفق خاصة مع الحلق اللي لابسه في ودنه ، واول مرة نشوفه بيعمل كدا، وللاسف عملها وهو في السعودية وفي حفلة كبيرة ، بدل ما يكون حريص انه يظهر بشكل شيك ويبقى اسم لبلده ، لكنه فضحنا الصراحة باللبس الغريب ده ، وبقى تريند من امبارح.
المشكلة كمان ان اخوه الممثل عمرو سعد عمل زيه ولبس حاجة كدا مش عارفنلها اسم ، شفاف واسود ومبين منها التاتو ،، هو في ايه يا جماعة مالكم ؟

ولسة كلنا بنتكلم عن اللي عمله احمد سعد واخوه ، وهووووب دخل على الخط الفنان احمد مجدي، وراح رازعنا صورة على انستجرام وهو لابس نفس استايل عمرو سعد ، برضه نفسه البتاع اللي مش عارفين اسمه ، واسود وشفاف ومبين جسمه .. انت بتعمل ايه يا فنان؟

هي جلسة تصوير غريبة ماشي علي عينيا وراسنا، بس ايه اللي انت لابسه ده ؟ لا هو قميص ولا تي شيرت ، وليه شفاف ومبين جسمك طب ما تخلعه احسن والله عادي زي محمد رمضان ..

صحيح ده محمد رمضان كمان عمل نفس الحركة كذا مرة ، اقربها من كام يوم في عيد ميلاده لما ظهر مع نجوم كتير ونجيب ساويرس وهما بيحتفلوا بيه ، وكان لابس بلوزة بيضا اه والله بناتي اوي ومش عارفين ازاي رمضان لبسها كدا

ومرة قبل كدا رمضان ظهر في حفلة في الساحل الشمالي ولبس برضه قميص اسود شفاف مبين جسمه ، واعتبرنا وقتها انه بيحب يلبس حاجات غريبة على المسرح ويعمل اجواء مختلفة ، او ميلبسش خالص من فوق وده اللي بيحب يعمله رمضان في كل حفلاته.

ويجز بتاع الراب هو كمان عملها مرة ولسلنا حاجة كدا لونها ابيض مخرمة ، ومتصور بيها ومبسوط اوي عادي .. كمان ظهر مرة بقميص اسود شفاف ومطرز ، متخيلين المنظر؟

سعد لمجرد بقى اسطورة ,, عليه شوية اطقم يخلوك متفمش هو ايه بالظبط ,, مفيش كليب يعله الا ونلاقيه لابس حاجة غريبة وكلها بناتي ، مرة فستان مرة كاروهات مرة شفاف برضه ، وكلها حاجات بارقام خيالية.

عمرو دياب كمان من فترة طلعلنا في موضة مش لايقة عليه وبقى يلبس حلق في ودنه ومش عارفين ليه عمل كدا ،وطبعا احمد سعد قلده امبارح وكان فاكر انه كدا روش يعني.

هي الناس دي مين بيختارلها لبسها يا جماعة وليه بيتعمدوا يختاروا حاجات غريبة تخلي الناس اللي بتحبهم تنتقدهم بالشكل ده ؟دول لو قاصدين يخلوا الجمهور يهزقهم كل شوية مش هيعملوا كدا لكن هنقول ايه بقى الله يسامحه التريند

نجوم كتير دلوقتي بيعملوا اي حاجة عشان يبقوا تريند ، بس مش لدرجة انهم يلبس لبس ستات ويهزقوا نفسهم بالشكل ده ، مانتو اصلا مش محتاجين شهرة ولا محتاجين تعملوا كل ده، طب الفنانين دول بيجيبوا الاستايلات دي منين ؟

اللبس الغريب ده بيبقى موجود في عروض ازياء كتير عالمية وعلى فكرة بيكون غالي جداااا ، يعني قميص محمد رمضان الشفاف ده عامله رقم محترم مش حتة بتاع كدا شفاف وخلاص لأ.

لكن مش كل حاجة بتتعمل برا بتكون مناسبة لينا ، وده اللي هما المفروض يفهموه لأنهم معروفين وقدوة للشباب، وكل حاجة بيعملوها بتتقلد بالحرف في الشارع ، فكان غريب انهم يطلعوا علينا بموضة القمصان الشفافة والمخرمة دي ، هتبقى كارثة لو لقينا الشباب ماشين بيها بكرة في الشارع عادي

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى