صورة تكشف مفاجأة عن ابنة مديحة كامل في فيلم “العفاريت”

بلية ولا لوزة.. مين هي بنت مديحة كامل؟.. سؤال ظل يحير جيل بعد جيل لكل من شاهد فيلم العفاريت، طبعًا من يقول إنها بلية والآخر يقول لوزة، لكن يوجد كواليس  فعلتها مديحة كامل في التصوير ووقتها هذه الصور اختفت خالص وكان مقصود إنها تختفي وتمر الأيام حتى وصلنا 33 سنة وصورة منهم ظهرت وكشفت كل حاجة.

وفي هذا التقرير سأحكي لكم. ليه مديحة كامل عملت الساسبنس ده في الفيلم وليه قصدت تحّير الناس بالسوال بتاع مين فيهم بنتها لوزة ولا بلية؟.. وكمان هتعرفوا إيه اللي كان بيدرو في الكواليس وقتها وليه الصورة اللي كانت هتكشف اللغز دي اختفت وليه ظهرت اليومين دول؟

كل ده رغم إن مديحة أصلًا رحلت من الدنيا بعد 7 سنين من عرض الفيلم وكان ممكن الحقيقة وقتها تظهر بس بردوا فضل صنّاع الفيلم محافظين على تشويق الجمهور للفيلم اللي يعتبر من الأفلام اللي كل ما تشوفها تتفرج عليها بردوا عادي.

بيقولوا إن سرْ الصنعة في الفن إنك تكسب الجمهور أطول وقت ممكن.. بس فيلم العفاريت كسب الجمهور أطول سنين ممكنة تخيلوا 33 سنة كاملين وصورة اللغز مختفية محدش في يوم طلّعها وقال الحقيقة أهي ولا شاور عليها.. أصل مديحة كامل فنانة تقيلة وهي قالت محدش يقول على حاجة ولا يحرق الفيلم وكان عندها هدف ورا كده هقولكم عليه بردوا.

لكن هي في الكواليس خدت صورة محدش يعرف عنها حاجة لسه يدول طالعة طازة اليومين دول للجمهور والسوشال ميديا بقت بتتكلم على الفيلم ده وكإنه موجود في عصرنا دلوقتي مش زمان قبل ما تظهر مواقع التواصل.. المهم بلية ولوزة فضلوا عنصر تشويقي مهم للجمهور زي ما هحكيلكم بالظبط.

القصة

فيلم العفاريت اتطرح للجمهور سنة 1990 وده بطولة مديحة كامل وعمرو دياب والطفلة هديل ونعيمة الصغير وحمدي الوزير وعماد محرم وغيرهم.. وقصته كانت عن واحد اسمه شمندي رئيس عصابات تهريب أطفال لهف طفلة رضيعة من أمها اللي هي ماما كريمة مذيعة الأطفال الشهيرة في التليفزيون وبتجسدها مديحة كامل وده عشان ينتقم من أبو الطفلة اللي خلّص على أخو شمندي وهو بيطارهم في شحنة ممنوعات.

وشمندي ده بقى باع الطفلة للمعلمة كاتعة اللي بتدير عصابة إجرامية للأطفال لحد ما يلاقي المطرب الشاب وقتها عمرو دياب طفلة صغيرة اسمها “بلية” شغالة مع كاتعة وعندها مواهب فنية.

عمرو دياب بدأ يعطف عليها ويقدمها لماما كريمة إنها قريبته عشان تشارك في برنامج استعراضي يقدمه للتليفزيون.. ولما بلية قعدت تتكلم مع عمرو دياب عن تفاصيل العصابة واللي بتتعرض ليه بيتفق عمرو مع ماما كريمة عشان ينقذوا الطفلة من العصابة.

وفي هجوم على المكان اكتشفت ماما كريمة لبس بنتها اللي ضايعة منها ومقدرش شمندي يكتشف مين بنت ماما كريمة الحقيقية اللي تاهت في وسط البنات واتعمل السؤال اللغز مين من الطفلتين بلية ولا لوزة تبقى بنت ماما كريمة وقتها مديحة كامل خدت الطفلتين في حضنها عشان واحدة منهم تبقى بنتها.

حل اللغزْ

اللغز هنا اتحل في صورة.. الصورة دي خدتها مديحة كامل مع عمرو دياب وشمندي وكاتعة وقدامهم تورتة عيد ميلاد مكتوب عليها “بنتي هي بلية”.. طبعًا الصورة دي انتشرت جامد على مواقع التوصال والجمهور عمال يتكلم عن بنت مديحة كامل اللي كانت في الفيلم ومبسطوين إن الحق ظهر وإن بلية هي بنت ماما كريمة أصل في ناس كتير توقعت إن بلية هي بنتها رغم إن في ناس تانية بتقول لوزة هي بنتها والدليل عشان كانت نضيفة وغلبانة وباين عليها بنت ناس ومديحه كامل في الفيلم كانت هاي لايف بنت ناس لكن بلية دي شقية وجربانة وكمان كانت بتقول لـ لوزة يا بنت أبو الهول والظابط بيكون عامل زي الصنم ناشف ومتصلب وشديد وأبو الهول صنم.

حلم مديحة كامل

طبعًا الساسبنس اللي اتعمل في الفيلم ده وراه موضوع كبير وزي ما اتقال إن مديحة كامل كان نفسها تعمل جزء تاني من الفيلم أيوه زي جعفر العدة ما هيعمل جزء تاني كده من المسلسل بتاعه ما هو فيه شبه من قصة الفيلم بردوا.. المهم القدر كان أسرع من مديحة كامل ومتكتبش الجزء التاني ولا اتعمل وفضل الموضوع متعلق شوية ورحلت مديحة سنة 1997 والناس نسيت الفيلم والجزء التاني والحكايات بتاعته لحد بدأ الكلام عنه والصورة انتشرت ويمكن الفيلم ناجح اكتر دلوقتي وهو كده من غير جزء تاني ولا غيره.

مديحة كامل كانت فرحانة في الكواليس بالفيلم ده وهو يعتبر انطلاقة للفنان عمرو دياب والناس فاكرة تجربته في الفيلم ده أكتر من أيس كريم في جليم والصورة اللي من الكواليس دي بالمناسبة مش عيد ميلاد واحدة من الطفلتين في الفيلم ولا حاجة دي فكرة مديحة كامل والله يرحمها بقى كان عندها بُعد نظر.