لا يوجد حديث على السوشيال ميديا خلال الفترة الماضية إلا عن الخناقة بين الفنانة المعتزلة ميار الببلاوي والفنانة وفاء مكي والتي خرجت تتهم ميار أنها غيرت كلامها وأنها السبب في حبسها من 23 سنة.
لكن اللي متعرفوش أن دي مش الخناقة الوحيد لميار الببلاوي ولا العلاقة الوحيدة اللي أثارت الجدل.. لأن من فترة كبيرة حصلت مشكلة كبيرة بين ميار الببلاوي ومين بقى والمخرجة الجريئة إيناس الدغيدي.
علاقتهم اللي بدأت بدور إغراء عملته ميار في فيلم “ديسكو ديسكو” واللي كانت بتخرجه إيناس الدغيدي.. ووصلت إنها تدعي عليها بسبب اللي عملته فيها.. بس يا ترى إيه اللي حصل؟ وإزاي إيناس خلت ميار تعمل حاجة حرام؟ لدرجة أنها اعتزلت الفن بسبب القصة دي؟.. حكاية غريبة هتعرفها معنا في التقرير التالي:
المعروف أن الفنانة ميار الببلاوي اعتزلت الفن وهي صغيرة على الرغم من أنها كانت طالعة بسرعة الصاروخ والكل قال هتكون نجمة شباك بعد كام سنة.
ميار رغم إنها كانت فتاة أحلام كتير من الشباب في جيل الثمانينات لكنها اختفت فجأة عن الساحة الفنية ورجعت تاني بس بالحجاب وقالت إنها اعتزلت الفن لكنه زي كرات الدم البيضاء والحمراء بيجري في دمها، ماقدرتش تبعد عنه وكانت دايما يتتكلم عن الفن وأسراره.
وفضلت أزمتها الوحيدة في تاريخها الفني هي دورها في فيلم “ديسكو ديسكو” اللي كان من إخراج إيناس الدغيدي وطبعا كلنا عارفين أفلامها ما تحلاش غير بمشاهد الإغراء، لكن الفيلم اللي كان بداية العلاقة بين إيناس وميار اتحول في النهاية لخناقة كبيرة.
طيب إيه اللي حصل؟
ميار كان دورها في الفيلم بنت بتقدم إغراء في مشهدين عملوا لها ضجة إعلامية وقتها.. المشهدين دول واحد كان مع شريف منير في مشهد ليلة الدخلة والتاني بقى اللي مش عايزة تفتكره كان مشهدها مع الممثل عمرو عبد الجليل اللي كان حبيبها في الفيلم، وكان المفروض المشهد ده تمثله في شقة نجلاء فتحي أخت عمرو الكبيرة، وهتدخل عليهم تشوفهم في وضع مش تمام وتطردها من البيت.
ميار رفضت تصور المشهد لأنها شايفة أنه حرام تمثل مشهد وحش زي ده في نهار رمضان لدرجة أنها حبست نفسها في الحمام لغاية ما سمعت أذان المغرب، وخرجت تمثله، مش بس كده دي كمان كان ناقص تبوس رجلهم عشان ما يتصورش لكن ما باليد حيلة، كانت وقتها لسه ممثلة صغيرة محدش هيسمع كلامها.
الأستاذة الكبيرة نجلاء فتحي قررت إنها تخلي ميار تصور المشهد ماهي كانت بطلة الفيلم وليها اسمها وقتها والكل بيسمع كلامها.. عملت بالظبط زي محمود الجندي في فيلم الفرح لما دخل يحل المشكلة ويقول: “استهدي بالله يا بنتي وقومي إقلعي”.
وأقنعتها أنها تصور مشهدها بطريقة غريبة كأنها عملت دين مخصوص ليها وقالت لها أنه مش عيب تصور المشهد في نهار رمضان.. وخدتها على جنب وقالت لها: ” رمضان ده معمول علشان الناس الفقراء والناس الأغنياء بيعملوا نفسهم ما بياكلوش قدام الفقراء.. الموضوع مش محتاج عطلة يابنتي مافيش حاجة إسمها رمضان أصلا”.
مكنش فيه حل في إيد ميار غير إنها تعمل المشهد غصب عنها ما هو حظها الحلو وقعها في فيلم من إخراج إيناس الدغيدي وطبعا محدش يقدر يقول لإيناس لأ على حاجة.. مش كفاية بهدلتها على مشهد المايوه لما عملت نفسها ناصحة ولبست شورت تحت المايوه علشان كانت بتصور في رمضان.. لكن أول ما شافتها إيناس زعقت لها وخليتها تروح تلبس المايوه التاني المكشوف.
لكن بعد الفيلم فجأة اعتزلت ميار الببلاوي ولبست حجاب واختفت سنين.. لكنها بعد كده ظهرت تاني في التلفزيون والمرة دي طلعت تهاجم إيناس الدغيدي وتقول إنها أجبرتها أنها تعمل حاجة حرام بمشهد الإغراء وأنها دعت عليها بسبب أنها خلتها تعمل كده.
ولجل حظها الحلو كالعادة.. إيناء الدغيدي شافت تصريحاتها التلفزيونية، ولما سالوها تردي تقولي إيه لميار قالتلهم: أنا أكبر من أني أرد على الحاجات دي، بس هي اسمها معروف ومش كل واحدة تلبس طرحة هتدعي علينا وفي الآخر باين مين الشخصيات اللي بتتكلم.
بس ميار محبتش تعمل مشاكل مع زمايلها وقالت: أنا مش هدافع عن نفسي ومش هقول إني صح بس ربنا شاهد إني بتكلم بعفوية ومابعرفش اتخابث ولا قصدي أي إساءة لأي حد من زملائي اللي وبقدرهم وبعتز بأي عمل شاركتهم فيه طوال السنين اللي فاتت وأنا لا عاوزة أجيب سيرة الفيلم ولا المشهد ولا يشرفني ونفسي أنسى والناس تنسى بس معرفش ليه بعد 25 سنة بينبشوا في الماضي.
العلاقة بين إيناس الدغيدي وميار الببلاوي انتهت هنا.. لكن تفتكر هل ميار عندها حق إنها تفضل تدعي على إيناس.. ولا الشغل شغل وكانت لازم تعمل مشاهد الإغراء؟.. شاركونا برأيكم في التعليقات.
