قصة زوجة رشدي أباظة التي حبست العندليب في الحمام لسبب لن تتخيله!!

حكايات الزمن الجميل دائما تخطف قلوبنا وتجعلنا نتخيل القصة واحنا نسمعها، زمن الأبيض واسود والكلام الجميل ،اليوم سنحكي حكاية دمها خفيف من حكايات الزمن الجميل .

طبعاً رشدي أباظة كان نجم جيله والكل بيحب سواء المعجبين أو زمايله في الوسط الفني ، وكانت تجمعه علاقة صداقة قوية بعبد الحليم حافظ وكانوا بيزوروا بعض في البيت والدنيا زي الفل

في يوم قرر رشدي أباظة أنه يعزم عبد الحليم على الفطار في رمضان عنده في البيت ، وطبعا العندليب وافق وقرر يلبي الدعوة .. ولسوء حظ حليم ، كان رشدي وقتها متجوز ست أمريكية ، وعايشة معاه في مصر ، ومتعرفش لسة عبد الحليم ولا تعرف شكله، خاصة وأن رشدي اباظة كان معروف عنه جوازاته الكتيرة و القصيرة في نفس الوقت ، فالأمريكية دي مكنتش لسة تعرف اي حاجة عن زمايله النجوم

رشدي أباظة افتكر انه عنده مشاوير و نزل يشتري حاجات للبيت ، لكنه نسي يبلغ مراته الأمريكية ان العندليب بنفسه جاي يفطر معاهم انهاردة ، وقالها انه خارج عنده مشوار ، وأن الحلاق الخاص بتاعه هيجيله عشان يحلق شعره، فلو جه دخليه الحمام وخليه يستناني انا راجع على طووول

ونزل رشدي اباظة ، وبعدها وصل العندليب لبيته ، ورن الجرس وفتحت له مرات رشدي الأمريكية ، ولأنها متعرفش العندليب ، افتكرته الحلاق اللي جاي مخصوووص لجوزها ، وهنا تقدر تتوقع ايه اللي حصل للعندليب بنفسك ..

الست محاولتش تسأله انت مين ، وخدت العندليب على الحمام بدون اي مقدمات ولا سؤال ولا كلام ، وطبعا حليم بطبعه خجول ومش عارف يعمل ايه ولا يسألها انتي بتعملي فيا أيه فاستسلم تماما للموقف وفضل قاعد في الحمام مستني صاحبه رشدي اباظة ..

موقف لا يحسد عليه العندليب لكنه فضل قاعد مكانه لحد ما وصل رشدي أباظة ، وراح يقول لمراته :” صحيح أنا نسيت اقولك ان اشهر مطرب في مصر جاي يفطر معانا انهاردة” .. وطبعا هي متعرفش ان اللي في الحمام ده هو المطرب وقالتله ان الحلاق وصل ومستنيه في الحمام

دخل رشدي اباظة الحمام عشان يحلق قبل ما يوصل بقى العندليب ، واول ما فتح الباب لقى حليم جوا ، قاله انت بتعمل ايه ؟ رد عليه العندليب رد مضحك جدا وقاله :” أنا عارف.. مراتك دخلتني هنا وقالتلي إنك مش هتتأخر، فافتكرت إن الخواجات بيدخلوا الضيوف الحمام في أول زيارة، فاتكسفت أخرج”

طبعا رشدي في نص هدومه من اللي عملته مراته في حليم ، وقالها ده العندليب مش الحلاق، واول ما المدفع ضرب قالوا اتفضل على السفرة ، لكن حليم كمل هزار وقاله ما تخلينا ناكل في الحمام احسن يا رشدي .