عري ورقص في رمضان.. هذا كان تعليق من تعليقات الجمهور على أول حلقة من حلقات الكبير أوي 7، الذي اعتدنا منه على الكوميديا والضحك من الأجزاء الماضية من هذا المسلسل.
بس إن أحمد مكي يجيب رقاصة في أول حلقة من الكبير أوي 7 ده أثار الجدل.. إزاي الجمهور علق على المشهد بتاع لورديانا.. وإيه قصة الاتهامات له أنه بقى بيقدم كوميديا مبتذلة؟.. إيه اللي حصل؟ وهل ده هيكون الموسم الأخير للكبير أوي؟.. كله ده وأكتر هنعرفه في هذا التقرير:
جمهور أحمد مكي في الكبير أوي اللي اتعمل منه 6 أجزاء قبل الموسم ده كان دايما بيدعمه ويقول إنه مسلسل كويس وفيه ضحك وإيفهات، لكن الجزء السابع اللي ابتدى في الموسم ده أحمد مكي من رأي الناس بوظه بإنه يجيب رقاصة في أول رمضان وأول حلقة من المسلسل.
كمان الجمهور علق كتير أوي على ظهور رقاصة في أول حلقة من حلقات الكبير أوي 7، ففي ناس قالت: “بقي إسفاف وسماجة، وشبه أي مسلسل من الكوميديا الرخيصة بعد ما كان أحسن مسلسل كوميدي مصري أصلًا”، وكمان ناس تانية قالت: “مش حلوه من أحمد مكي إحنا في رمضان جايب رقاصه لا حول ولاقوة الابالله العلي العظيم”.
وتعليقات كتير من هذا النوع، وفي ناس تانية علقت بإن مينفعش الكلام ده يحصل في رمضان وقالوا “مش حلوه من احمد مكي احنا في رمضان جايب رقاصة لا حول ولاقوة إلا بالله العلي العظيم”، مش بس كده ده في كمان تعليقات قالت “رقص وعري في رمضان، عليه العوض ومنة العوض”.
مش بس كده لكن كمان ناس كتير شايفة أن أحمد مكي بيقدم كوميديا مبتذلة في الكبير في السنة دي وعشان يسحب المشاهدات من رامز جلال بدأ يدخل في تريندات مختلفة زي أنه استعان برقاصة لأول مرة في المسلسل على الرغم من أنه عارف أن العمل ده بيحضرها أولاد صغيرين وبيكون دايمًا هو اللي بيتشاف في التجمعات العائلية المختلفة.
فى نقطه تانيه مهمه بخصوص ظهور لورديانا فى مسلسل الكبير، واللى اتضح أنها كانت مستعدة جدا لشهر رمضان، أو نقول لدورها فى مسلسل الكبير، من كام يوم نشرت على كل حساباتها على السوشيال ميديا أنها خلاص قررت تبطل رقص طول شهر رمضان، ووقتها جمهورها استغرب جدا، بس بعد حلقة الكبير امبارح الكل خلاص عرف مبررها وأسبابها، وأنها عايزه تتفرغ لدورها في المسلسل، ماهو يقال ان ليها مشاهد تانية غير مشهد جوازها من الكبير امبارح.
الجمهور بعد مشاهدة الحلقة الاولى من مسلسل الكبير أوي، اغلبيه الرأى كانت أنهم طلعوا مش محضرين حاجة افضل من الموسم اللى فات، هي هي نفس الإفيهات، وهي هي نفس طريقة الكلام والمواقف الكوميدية ما بينهم، و الأكتر من كده إن مربوحة صوتها بقى عالي شويه، والناس صدعت منها شويتين كمان.
مش بس كده لكن كمان انتشرت أخبار على السوشيال ميديا أن المسلسل لو استمر على الحال ده هيكون أخر موسم له في رمضان، على الرغم من أن الكبير بيستعد بالفعل لعمل موسم جديد السنة الجاية مع شركة الإنتاج.
شاركونا أنتم برأيكم.. ياترى ممكن يكون رمضان السنادي هو أخر موسم للكبير ولا لاء؟ وهل خلاص بقى بيقدم كوميديا مبتذلة وفقد قدرته على الضحك الخفيف والبسيط للناس؟.. اكتبوا رأيكم في التعليقات.
