الاثنين صوتهم حلو واغانيهم في المقدمة، وهما الأكثر شعبية في مصر والوطن العربي، الهضبة عمرو دياب يعتبر الاول بلا منازع في سوق الغناء والطرب، وجمهوره في كل مكان.
ونجم الجيل تامر حسني اللي الجمهور بيعتبره تلميذ عمرو دياب وهياخد الراية منه، واغاني الاتنين عاملة اعلى مشاهدات لان اغانيهم معبرة بتناسب الكل ومفيهاش إسفاف، لاول مرة الاتنين اجتمعوا مع بعض في فرح الممثل احمد عصام صديق كل النجوم.
وقدام مشاهير مصر والعرب عمرو دياب اتحدى تامر حسني لما الاتنين غنوا مع بعض، المشهد كان روعة، وكمان كل الحضور كانوا في قمة السعادة لان الاتنين عمرهم ما غنوا مع بعض، اي نعم غنوا في فرح وقدام الناس كلها، لكن غنوا إيه وازاي كان شعورهم جميل.
احمد عصام بطل الألعاب النارية والممثل المعروف، احتفل بفرحه وسط حضور كوكبة كبيرة من النجوم، ودعا تامر حسني وعمرو دياب على اعتبار إن الاتنين من أصدقائه، ده غير الكينج محمد منير طبعا ونجوم تانيين
كان في اتفاق على إن الفقرة الاساسية للفرح الهضبة هيغني فيها في مواجهة تامر حسني، كل الناس اللي كانت حاضرة الفرح اتفاجئوا باستضافة النجم تامرحسني للنجم عمرو دياب على المسرح.
وغنوا سوياً اغنية يا انا يا لا وسط حفاوة تاريخية من المعجبين والمصورين، وده اللي ألهب حماس كل الحاضرين لان الجمهور بيعشق الاتنين وحافظ كل أغانيهم.
وتعتبر أول مرة في القرن الحالي لقاء قطبي الغناء المصري والعربي تامرحسني و عمرو دياب في حفل زفاف أحمد عصام.
بعد اللقاء ده تداول عدد من رواد مواقع التواصل الإجتماعي فيديو الفرح اللي بيجمع بين الهضبة بتامر حسني لأول مرة. وبعدها تامر حسني شارك جمهوره بعض الصور الجديدة له، أثناء حضوره الفرح، واللي جمعته بالفنان عمرو دياب.
ونشر تامر الصور عبر صفحته الشخصية على موقع إنستجرام، وظهر خلالها بإطلالة أنيقة.ارتدى تامر بدلة سوداء، وكان واقف يغني جمب الفنان عمرو دياب، وسط تفاعل كبير من الحاضرين للفرح.
وعلق نجم الجيل تامر حسني على الصور وقال: مليار مبروك لحبيبي وصاحب عمري أحمد عصام، والله كنت حاسس إني بجوز إبني، ربنا يكرمك يا حبيبي أنت و مراتك.
وبالنسبة للصور الجميلة دي أظن مهما علقت مش هعرف أوصف جمال روحها و صدقها، عقبال الجميع”.مصمم الألعاب النارية والفنان احمد عصام كان احتفل لعقد قرانه بحضور نخبة من نجوم الفن
وشهد علي عقد القران النجوم تامر حسني والكينج محمد منير والنجم محمد حماقي في جو كله بهجة وسعادة في فرح أسطوري.
كمان عقد القران حضره عدد من أصدقاء احمد عصام أبرزهم مصمم الإضاءة طارق صبري والفنان إسماعيل فرغلي والداعية مصطفي حسني ونجوم غيرهم.
وشهد حفل زفاف الفنان أحمد عصام استعراضات نارية ، كما قام النجم تامر حسني بتقديم باقة من أغانيه الشهيرة خلال الحفل اللي أشعلت الأجواء.
أحمد عصام كان شارك مؤخرا في عدد كبير من الحفلات بفقرة الألعاب النارية لكبار نجوم الفن من أبرزهم تامر حسني اللي بتربطهم علاقة صداقة بقالها سنوات.
اما آخر أعمال أحمد عصام فكان مسلسل “طلقتك نفسي” واللي تم عرضه السنة اللي فاتت على شاشة قناة النهار، وحقق من خلال دوره ردود أفعال إيجابية وأشاد به عدد كبير من الجمهور والنقاد.
