رأس الحكمة..أسرار صفقة إنقاذ مصر ومصير سكان المنطقة بعد التطوير

رسميا.. الحكومة مضت عقود أكبر صفقة استثمارية في مصر، بالتنسيق مع كيانات كبيرة، والأرقام اللي كشفها رئيس الوزرا مفاجأة.

35 مليار دولار هيدخلوا البلد خلال شهرين بس وعلى دفعتين، الدفعة الأولى هتبقى 15 مليار دولار، منهم 10 مليارات دولار كاش ، وكمان تنازل الإمارات عن 5 مليار دولار من ودائعها في البنك المركزي.

والدفعة التانية 20 مليار دولار منها 14 مليار دولار سيولة و6 مليارات دولار من ودائع دولة الإمارات بالبنك المركزي.

طيب كده الدولة سلمت أرض رأس الحكمة للامارات بالكامل؟

الإجابة لأ، لأن حسب الاتفاق مصر ليها 35%؜ من أرباح المشروع، ومع تنفيذ هذا المشروع، هيتم ضخ مليارات الدولارات من دولة الامارات.

تنفيذ مشروع رأس الحكمة

الصفقة هى شراكة مش بيع أصول، وحسب رئيس الوزرا مشروع رأس الحكمة أكبر مشروع استثماري في تاريخ مصر، وهيتم تأسيس شركة رأس الحكمة عشان تبقى الشركة القابضة للمشروع، لبناء فنادق ومشروعات ترفيهية، ومنطقة المال والأعمال،

المشروع هدفه جذب ٥٠ مليون سائح، مع تطوير وإنشاء مطار دولي جنوب مدينة رأس الحكمة.

وبالنسبة لاهالي مطروح أصحاب المكان، الحكومة عملت حصر لكل الموجودين،، وهتبني ليهم بديل بالقرب من المشروع عشان يبقوا اكبر المستفيدين من هذا المشروع، وفعلا الدولة بدأت في التواصل معهم، وهيتم الانتهاء من تعويضهم في أسرع وقت ممكن.

كمان مدبولي، شكر دوله الامارات لان ضخها للمبالغ دولاريه في الوقت الحالي معناه انها واثقه في الاقتصاد المصري وان الفلوس اللي بتصرفها هتجيب مكسبها، واعتبر ان صفقة رأس الحكمة هي بداية عبور المحنة.

وحسب مصطفى مدبولي رئيس الوزراء، الصفقة دي ضمن خطة الحكومة للتنمية العمرانية، وهتكون البداية لمجموعة صفقات استثمارية جاية في الطريق، وده معناه كل بساطة دولارات اكتر هتدخل البلد.

يعني هتقدر تسدد ديونك ، وتشتري الأكل والشرب والخامات اللي انت محتاجها، وكمان البنوك فيها يبقى دولار، عشان تقفل الطريق على السوق السودة واللي شغالين فيها.

وفي نفس الوقت، انت بتتكلم عن مشروع سياحي كبير عشان يتنفذ محتاج عدد كبير من الشركات والمصانع تخدم عليه، يعني الكل هيستفيد، وخصوصا فرص الشغل اللي هتشغل آلاف الشباب وتفتح آلاف البيوت.

ده غير إن الحكومة في المرحلة الأخيرة من المفاوضات مع صندوق النقد الدولي عشان نكمل استلام القرض وكمان تزود قيمته لغاية 10 مليار دولار وكمان تنفذ وثيقة سياسه ملكيه الدوله اللي أعلنت عنها من فتره ومن خلالها بتشيل ايديها من صناعات معينه وتدخل مكانها القطاع الخاص.

تأثير رأس الحكمة على الأسعار

خلال الساعات اللي فاتت، حصل تراجع كبير في الدهب عشان يسجل سعر الجرام 3350 جنيه ، كمان الدولار في السوق السودة نزل لغاية 59 جنيه في بعض المناطق.

وزي ما أي اشاعة بترفع سعر الدولار جامد في السوق السوداء، كمان الاخبار الايجابيه تقدر انها توقعه، وده اللي حصل بعد التسريبات الاولى لصفقة راس الحكم لما سعر الدولار نزل من 70 جنيه ل 50 جنيه.

انت كمان شاركنا توقعاتك لاسعار الذهب والدولار وكل السلع بعد الاعلان الرسمي عن صفقه راس الحكمه.. وقولنا شايف الدولار والدهب هيبقوا بكام؟