الناس كلها ليس لها سيرة غير التوقعات التي ستحدث في الجزء الثاني من مسلسل جعفر العمدة وهذا من بعد ما أعلن الفنان محمد رمضان توقيعه على هذه المغامرة .
وكلنا طبعاً مستنيين اللي هيعمله محمد سامي في الناس من جديد أصل التشويق بيجري في دمه وبيحب يلعب على الوتر الحساس.. إيه المفاجآت بقى اللي متخضرة للجزء التاني وليه محمد رمضان كان متردد في التوقيع.. تابعوا معايا هقولكم تفاصيل اللي هيحصل.
جزء مرفوض
الناقد الفني طارق الشناوي معروف إنه من المقربين للفنان محمد رمضان وبيعحبه الشغل اللي بيقدمه ودايما يقول على محمد سامي دراماتورجي مميز وبيعرف يشوف الجمهور عاوز إيه ويلعب عليه.. وبالنسبة لمحمد رمضان بيشوف إنه نجم كبير وبيتطور في مهنته وعارف يعمل إيه كويس وبيراجع نفسه في الشغل عشان يحافظ على جماهيريته.
طبعاً كل ده جميل لكنه على غير العادة نصح رمضان بإنه يشوف فكرة تانية تضرب مع الجمهور وتعدي نجاح جعفر العمدة.. ووجهة نظره كناقد إن اللي نجح نجح وخلينا نشوف فكرة جديدة أحسن عشان اللعب على المضمون حساباته مش مضمونة.
تردد محمد رمضان
محمد رمضان طول الفترة اللي فاتت كان متردد يعمل الجزء التاني من جعفر العمدة ولا يشوف فكرة تانية والصراحة هو خايف فكرة جديدة متنجحش ويقع ويبقى ماشي سنة آه وسنة لأ فقال عشان أضمن النجاح للسنة التانية على التوالي مفيش أحسن من جعفر العمدة الجزء التاني وأهو تبقى حاجة مضمون متابعتها عشان الجزء الأول عمل تاريخ كبير لرمضان على مستوى المشاهدات كلها.
توقعات
فاكرين لما كانت كل حلقة تخلص والجمهور يقعد يتوقع اللي هيحصل في الحلقة اللي بعدها ده اللي حصل لما عرفوا إن في جزء تاني يعني من دلوقتي تحس كده المسلسل كسبان كسبان والحقيقة مفيش بيت في مصر إلا لما اتفرج على جعفر العمدة وعرف إيه اللي حصل فيه.. طبعاً كلنا متفاعلين مع الأحداث وبدأت التخمينات من أول ما انتهت الحلقة الأخيرة.
دلال طبعاً اللي جسدت شخصيتها الفنانة إيمان العاصي مش هتاخد إعدام وهترجع تفش عليها في محمد رمضان أصله مرحمهاش لنا حاولت تستنجد بيه عشان ميبلغش عنها.. وكل محاولاتها هتكون بالاتفاق مع اخواتها شوقي فتح الله وأخوه وفعلا هتقدر تنتقم منه وابنه سيف هيدخل في طريق غلط وبيتقال إنه هيكون مدمن ممنوعات.. بس عامة حتى لو ده حصل أبوه هيلحقه.
لكن المتوقع أكتر إن سيف هياخد نفس طريق أبوه وهيكبر في الشغلانة ودوره هيخلص بعد نص الحلقات وفي الغالب رمضان هيعمل شخصيتين في المسلسل..
الجميل كمان إن دور الفنان الراحل سعيد صالح اللي شوفناه في فيلم سلام يا صاحبي هيتعاد تاني وهنشوفه بيفدي محمد رمضان وياخد رصاصة مكانه وهيودع المسلسل وطبعاً جعفر العمدة هياخد حقه.. كمان ثريا هيكون ليها دور قوي في المسلسل وهتحاول تمنع جعفر يتجوز تاني بس هو هيفضل زي ما هو وقلبه يساع من الحبايب ألف وهيتجوز تاني وهيخلف والحياة هتبقى أحلى معاه بس أعداؤه هيكتروا وهيجي فترة يقع بس هيرجع يقف على رجله من تاني.
صفصف اللي بتجسدها الفنانة هالة صدقي هينتهي دورها خالص بعد ما العمر يجري بيها وتودع.. كمان زينة مش هيكون ليها دور في المسلسل خالص الجزء التاني بسبب قرارها إنها مش هتشتغل تاني مع محمد سامي وتقريباً الجزء ده هيتعمل مخصوص بالعند فيها.
بس هي هتعيش حياتها وتتجوز واحد تاني وده هيتعرف عن طريق قريبها اللي هيعمل المشاهد دي.. سيد هيتغير خالص وهيتحول لبني آدم تاني بعد ما ياخد على عينه للمرة التانية من وداد اللي هتورث أبوها وترجع تقف تاني على رجلها وتتجوز ده اللي هيخليه أقوى..
دلوقتي بقى لو عندكم توقعات تانية اكتبولنا في الكومنتات.. وهل شايفين نجاح الجزء التاني هيكون بنفس نجاح الجزء الأول..؟
