يظلوا يعدوا في الأيام والليالى من أجل ليلة العمر،ويجهزوا ويعدوا لها ويتدربوا على طريقة الاحتفال ويصمموا رقصة خاصة لهذه الليلة ويتدربون عليها، وفي النهاية نجد أن الفراح مليئة بالمفاجآت غير المتوقعة التي تتسبب في صدمة للعروسان وأيضا المعازيم، وفيما يلي سوف نستعرض أغرب الحكايات التي حدثت بحفلات الزفاف فتابعونا.
مش تفتح يا أعمى..دى الجملة الى كانت السبب فى إنفصال عريس وعروسة وهم فى الكوشة ،وده اللى حكته الراقصة دينا لما كانت بترقص على المسرح وقالت إن العروس كان بيشرب الشربات ومع الحركات بتاعته والهيصة دلق الشربات على فستانها فقالت له مش تفتح يا أعمى؟ ومن هنا قامت الخناقة وإنفصلوا ولكن علشان يلموا الليلة أهل العريس خلوا دينا تكمل رقص عادى دى مشاكل عائلية خليكى فى اللى إنتى فيه.
كمان منقدرش ننسى الفرح اللى إنتشر له فيديو على كل مواقع السوشيال ميديا وعمل ضجة كبيرة الفترة اللى فاتت لما العريس كان بيرقص رقص هستيرى وحركات عفوية ومع التنطيط والحركات بتاعته بدأ يمسك فى طرحة العروسة ويجر ويشد فيها وهى وراه بتصرخ وتقوله بتعمل إيه با مجنون؟
كمان إنتشر فيديو فى لعريس وعروسة فى دمياط، والأب خد المايك وبيهنى العرسان وهوب أما أم العروسة فهي طالق بالتلاتة وتروح من القاعة على بيت أهلها.
تخيل بقى صدمة العروسة فى موقف زى ده ؟ إيا كانت الخلافات فهو لا وقته ولا مكانه اللى يصرف فيه كده.
دايما فى الأفراح بنشوف البرايدمايدز نفس اللون أحيانا نفس الفساتين كمان، لكن فى الفرح ده شوفنا الدريس كوود لصحاب العريس كان ملابس العزل والأطقم الطبية، أيوة وده كان فرح فى قرية الجبلاو، بدائرة مركز قنا فى يونيو 2021،بعد الأزمة الصحية العالمية اللى مررنا بها .
معروف فى الأفراح بنعرض فيديو خفيف كده على أغنية حلوة فى صور للعرسان والحبايب،لكن فى الفرح ده العريس عرض فيديو بردوا ولكن فيديو كان صدمة للعروسة والمعازيم وهو فيديو جرئ وفاضح حقيقى، لعلاقة غرامية تجمع بين العروسة وزوج أختها.
الغريب إن العروسة مبينش أى علامات للندم أو إنها غلطانة بالعكس رمت بوكية الورد فى وش العريس .
بنشوف مشاهد كتير من أفراح وفى لحظات رومانسية تتقلب لخناقات، وعلى عكس المتوقع العروسة ضربت عريسها بالقلم على وشه،تفتكروا ليه؟
أثناء وهم بيقطعوا التورتة والعريس بيأكل العروسة، قالعروسة رفضت، العريس أصر بالعافية تاكل وحطلها قطعة الحلويات فى بوقها ،قامت هوب نازلة على وشه بالقلم ،ومسكوا فى بعض وحاولت العروسة تهرب شدها من شعرها وردها القلم قلمين.
مش دايما المواقف فى الأفراح بتكون سلبية أو مفاجئة بطريقة تخض أو تضايق وتسبب صدمة بالعكس ،زى ما فى كده فى بردوا مواقف مفاجئة حلوة تخليك تعيط بردوا بس من الفرحة والمشاعر الحلوة.
فاكرين صورة القايمة اللى إنتشرت على السوشيال ميديا مش مكتوب فيها إلا من يؤتمن على العرض لا يُسأل عن المال.. اتق الله في كريمتنا ،ورفض الأب كتابة المستحقات المالية على عكس العرف والعادات.
كمان بكاء الأب وتأثره أثناء كتب الكتاب ،وخاصة الأب اللى إتنشر له فيديو من فترة على السوشيال ميديا وعمل ضجة كبيرة لما كان بيعيط وهو بيقول زوجتك إبنتى بدلا من البكر الرشيد قال ابنتي قرة عيني، وروح فؤادي، صديقتي، وحبيبتي، ورفيقة العمر.
تفتكروا إيه اللى يخلى مواقف زى دى تحصل؟ هل بيكون فى سوابق للخناقات والأهالى شايلة من بعضها ومع الضغط والتوتر بيحصل كده؟وإزاى يتعاملوا مع المواقف دى لو حصلت بحيث الجوازة تتم على خير ده لو الموقف بسيط،لكن لو موقف مينفعش أو ميصحش هل إنتو مع ولا ضد إتمام الجوازة؟وإزاى تمنعوا إن مواقف زى دى تحصل؟ شاركونا برأيكم فى التعليقات.
