لا يوجد شك إن الفنان أحمد فهمي من أهم نجوم جيله، وإنه من الكوميديانات المميزين جدا، وقدم أعمال كثير منها الذي حقق نجاح كبير، وبعضها الذي لم يكن على المستوى المطلوب، ويمكن جزء كبير من هذا يرجع لظروف خارجة عن إرادة أبطال هذه الأعمال، أو حتى لإن الكوميديا بشكل عام المكتوبة على الورق ليست أفضل شئ ووقع في هذا الفخ أحمد فهمي.
الفنان أحمد فهمي قدم في مسيرته عشرات الأعمال الفنية، وسواء لما كان بيشتغل هو وشيكو وهشام ماجد مع بعض، أو حتى بعد انفصالهم الفني، كان طول الوقت بيقدم أعمال كوميدية، في بعض الأوقات كان الجمهور بينتقد الكوميدية المعروضة على الشاشة، خصوصا إن كتير منها عبارة عن إيفيهات مش كوميديا موقف بتقول إن في ورق متعوب عليه.
على الشاشة بيبان فكرة إن الموقف بيخلق كوميديا حتى من غير ما الممثل يضطر يقول كلام يضحك، أو لما بيكون كل نجم بيقول إيفيه من دماغه، وببيتحول المسلسل أو الفيلم لقعدة هزار، وده بيقلل من قيمة العمل الفني.
أكبر هجوم اتعرض ليه الفنان أحمد فهمي، كان بسبب مسلسل «رجالة البيت» واتعرض لانتقادات كتير واتقال إنه فشل، الفنان أحمد فهمي نفسه كان شايف إن طالما في كلام كتير على العمل فهو شيء كويس، لإنه في النهاية نجح إنه يكون متشاف وموجود على الخريطة، لكن على جانب تاني الفنان بيومي فؤاد مقدرش ينكر، وقال إن العمل اتعرض لأزمات كتير منها كورونا مثلا، وده حوله لسيت كوم مش مسلسل.
أحمد فهمي زعل من بيومي فؤاد لأنه طلع أكتر من مرة اتكلم وقال إنه مش راضي عن المسلسل ده، ولكن مع ذلك نفى إن يكون في أي زعل ما بينهم.
ولكن الظاهر كدة إن ده كان إنذار لفهمي إن هو يبدأ ينوع شوية ويبعد عن منطقة الكوميديا بعض الشيء، وبالفعل ده حصل في فيلم العارف واللي كان عامل فيه دور أكشن ودراما ومكنش فيه أي كوميديا خالص، وبسبب الدور ده اترشح لدور تاني أهم في موسم رمضان 2023، في مسلسل سره الباتع للمخرج خالد يوسف اللي قاله أنا عايز أشوفك في منطقة جديدة عليك، وأحمد فهيم تحمس جدا.
وكمان بيستعد خلال الفترة الجاية لعرض مسلسل «السفاح- بدم بارد» وده بعيد تماما عن الكوميديا وبيقدم فيه شخصية قذافي فرج الشهير بسفاح الجيزة، واللي واخد إعدام بسبب عدم من جرائم إنهاء الحياة المتسلسلة واللي تمت بين سنة 2015 و2017.
أحمد فهمي قدر في فيلم العارف وفي مسلسل سره الباتع إنه يقدم أدوار كويسة وبعيد عن الكوميديا، وكمان في مسلسل السفاح هيكون خد خطوة جديدة في شخصيات مختلفة عن أدواره المعتادة، ويمكن كدة نقول إنه بيحاول يجنب نفسه الفشل اللي بتتعرض ليه بعض أعماله أحيانا.
