غرائب وطرائف شيرين عبد الوهاب ملهاش آخر.. كل ظهور ليها بيكون فيه تفاصيل وحكايات بتلفت نظر الناس وتكون تريند من أول لحظة، شيرين عبد الوهاب عملت حفلة جديدة في الكويت مؤخرا، وهي الحفلة الأولى ليها بعد مسلسل ازماتها اللي استمرت حلقاته على مدار شهور النص التاني من سنة ٢٠٢٢، من تبعات طلاقها وخلافاتها مع حسام حبيب، والتصريحات المتبادلة بين الطرفين.
وبعدين دخل شقيق الفنانة شيرين على الخط بعد ما اجبرها على دخول مستشفى للعلاج من الإدمان، واتهامه لحسام حبيب بإنه السبب وراء إدمان شيرين للمخدرات. وبعد كل ده فاجأت شيرين اهلها وجمهورها والوسط الفني ورجعت تاني لحسام حبيب واتجوزوا من جديد
شيرين الفترة دي عايشة في عالم تاني خالص.. بعد ما خدت حسام وسافرت لبنان وقضت هناك اسبوعين كلهم مثيرين للجدل.. سواء بفيديوهات الرقص الغريبة.. ولا تعاملها مع حسام قدام الناس والسكر والتدخين ووجود بنتها معاها في مكان زي ده
كملت مشاكلها بزيارة لبيت الفنان فضل شاكر في مخيم عين الحلوة من ورا السلطات اللبنانية.. ونشرت فيديوهات وصور معاه عملت لها مشاكل.. وخلتها يتقبض عليها هي وحسام ويتحقق معاهم في الزيارة دي وليه عملت كده
الناس كلها قالت هي دي النهاية.. ومش هتفوق لنفسها ولا ترجع ل فنها وجمهورها تاني.. بس هي برضه في ظل كل ده بتفاجئنا وأبدعت في أول حفلة ليها في الكويت
ظهرت شيرين في الحفلة بزيادة وزن ملحوظة جدا كعادتها مؤخرا.. بس ده مننعهاش انها تلبس فستانين.. وتظهر في إطلالتين مختلفتين جدا عن بعض
شيرين طلعت على المسرح وهي متألقة بعد ما اشترطت قايمة كبيرة من الشروط على الحضور.. ممنوع الاطفال والرقص والتدخين والخناقات والحوارات.. عاوزينها حفلة مبروكة.. بس هي مش محتاجة حد يبوظ لها حفلاتها هي بتقوم بالواجب يعني
شيرين على المسرح كانت حريصة إنها تجيب سيرة زيارة الفنان فضل شاكر.. وقالت إن بيادة الجيش اللبناني على دماغها.. وده كان اعتذار صريح منها على الغلطة اللي عملتها ومكنتش حاسبة لها الحسابات كعادتها.
ومن متحاسبنيش.. ل يا بتفكر يا بتحس.. مرورا ب كان خيري وأغاني تانية كتير .. انسجمت شيرين على المسرح وقدمت واحدة من أجمد حفلاتها وده بيأكد انها مهما عملت.. لسه محبوبة القلوب والجمهور بيستناها.
قبل ما تطلع شيرين على المسرح عملت جدل كبير برضه لما انتشر ليها فيديو لشخص بيلبسها الجزمة بتاعتها .. وناس كتير كانت فاكرة إنه حسام وانها لقطة رومانسية.. لكن طلع شخص عابر من فريق العمل معاها.
