دائما حفلات تامر حسني تكون مختلفة عن اي حفلة ممكن تحضرها، ويحب يعمل أشياء جديدة ومجنونة على المسرح ، ولو عدت لكل حفلاته ستجدها مليئة بعروض ومواقف كثيرة بجانب الغناء.
وهو بيحب يتفاعل مع جمهوره جدا على المسرح ، عشان كدا بيكون في اقبال كبير على حفلات تامر.وامبارح تامر عملة حفلة ضخمة جدا في مهرجان العلمين الجديد ، وكان فيها حضور كبير ، لدرجة تخليك تحس ان مصر كلها قاعدة هناك ، و من امبارح وصور وفيديوهات حفلة تامر مالية الدنيا والناس بتتكلم عنها، طب ايه الي حصل في حفلة تامر خلاها تنجح بالشكل ده ؟ تعالى انا اقولك
تامر حسني حب يعمل دخلة جديدة لجمهوره ، ففكر شوية و استغل فكرة فيلم تاج اللي عمله من قريب وكان فيه بطل خارق ، و دخل على جمهوره من السما وهو مربوط ولابس نفس بدلة فيلم تاج اللي كان طالع فيه بيطير وقوي جدا وعنده قدرات رهيبة.
وقرر تامر يفاجئ جمهوره ويربط بين الفيلم والحفلة ، ودخل عليهم من ورا الاستيدج وهو متعلق بالاحبال في الهوا والجمهور اتفاجئ بجنان تامر واللي بيعمله فيهم كل حفلة ، وانتشر الفيديو على السوشيال ميديا وتامر متشعلق في الهوا فوق الجمهور.
ولما نزل تامر على الاستيدج قال : ما شاء الله إيه المنظر الجميل ده، منورين كلكم وأنا بتشرف إن تم اختياري لافتتاح مهرجان العلمين، المهرجان ده عايزين نحافظ عليه علشان يجمعنا ويجمع كل نجومنا من مصر وكل الوطن العربي.
وبعدها نزل تامر وخلع بدلة تاج ولبس قميص وبنطلون وبدأ يغني ويندمج مع الناس لكنه كان محضرلهم مفاجآة تانية محدش كان متوقعها.
فجأة ظهر التيك توكر الألماني نويل روبنسون وطلع على المسرح وغنى ورقص مع تامر حسني ، ومن هنا بقى الحفلة سخنت والناس اندمجت اكتر وتصفيق بقى وسهرة للصبح.
نويل الألماني بقاله حبة قاعد في مصر ، هو كان جاي زيارة بس شكله حب الموضوع وعجبته البلد والمصريين وقدر يتعايش معاهم ، ولما تامر حسني كان بيصور اغنية فيلمه تاج ،استعان بنويل وظهر معاه في البرومو ودي كانت مفاجآة وقتها ان تامر ونويل مع بعض في اغنية واحدة.
لكن تامر قرر يكمل سلسلة مفاجآته للناس ، وجاب نويل معاه في الحفلة وخلاه يطلع على المسرح يرقص ويغني على اغانيه بحركاته ورقصاته المشهورة ، وعمل اجواء حلوة جدا في الحفلة.
كمان طلعت الفنانة اللبنانية كارولينا كرم على المسرح وغنت مع تامر حسني ، ودي مش أول مرة تحصل، لكن تامر لما كان في لبنان من كام اسبوع ، طلعت برضه كارولينا وغنت معاه اغنية هرمون السعادة ، ورجعت كررت نفس الحركة تاني في حفلة تامر بالعلمين ، وواضح ان في دويتو هيجمعهم قريب.
وكان من ضمن الحضور امبارخ عروسين جداد جايين يتبسطوا ويغيروا جو في حفلة تامر ، وعشان هو بقى بيحب يعمل لقطة دايما احتفل بيهم وغنالهم اغنية بحبك.
الحفلة فعلا كانت ناجحة بكل المقاييس وتامر بيعرف يسعد جمهوره في اي حفلة ليه ، وكتب تامر على السوشيال ميديا عن الحفلة دي وقال : يمكن قولت كتير على حفلات انها من احلى حفلات حياتي بس حفلة العلمين امبارح بجد هي احلى واهم حفله عملتها في مشواري الفني كله من اول دخلة الحفله بالطيران على كل هذا الارتفاع واللوحه الخاصه بكل اغنيه بغنيها من عروض استعراضيه متناسقه مع كل الجرافيكس المعروض على الشاشات المتناسق مع ابهار الالعاب الناريه اللي بيعبر عن كل حرف في أي اغنيه بغنيها».
وقال تامر : بجد الحفله دي كان وراها ناس كتير مخلصه وبتحب شغلها وقبل أي شيء حابين بعض وحابين الخير لبعض عشان كده طلعنا بالنجاح الجماهيري الخرافي ده والنجاح المسرحي التاريخي ده، شكرًا جمهورنا الراقي، شكرًا صناع الحفله، شكراً لاختياري لافتتاح مهرجان العلمين”
ولحد دلوقتي صور وفيديوهات حفلة تامر حسني منتشرة بشكل كبير خاصة فيديو الدخلة وهو بيطير فوق الناس ، وه بقى بيخلينا نسأل نفسنا ياترى تامر هيعمل ايه في الحفلة الجاية وايه المفاجات اللي بيحضرها لجمهوره من جديد ؟
