الكل يترقب خبر إعلان تعويم الجنيه مرة اخرى، ولكن قبل ساعات من اجتماع البنك المركزي نجد ان سعر الدولار في البنك المركزي كسر حاجز ال 24 جنيه و70 قرش، فهل نقدر أن نقول ان المركزي اختار التخفيض التدريجي أم هذه صدفة؟ هذا ما سنعرفه من خلال التقرير التالي:
زيادة تدريجية في سعر الدولار خلال اخر كام يوم بعد استقرار لعدة أسابيع، ودلوقتي الاخضر سعره في البنك المركزي 24 جنيه و73 قرش.
تعالى بقي نشوف الصورة الأكبر عشان نفهم طبيعة التحرك ده، هتلاقي في وشك كل التقارير والتوقعات اللي بتكلمك عن تعويم كامل للجنيه، ومش بعيد كمان ده يحصل قبل 16 ديسمبر وده معاد اجتماع المجلس التنفيذي في صندوق النقد الدولي عشان يدي الموافقة النهائية على قرض مصر بقيمة 3 مليار دولار..
بس عمرو الألفي، رئيس البحوث في شركة برايم القابضة، قال إنه من الأفضل للاقتصاد المصري إن يكون في انخفاض مرن وتدريجي للجنيه أمام العملات الأخرى وبالأخص الدولار الأميركي، لأن خفض العملة هيساعد على استيعاب أي أزمة عالمية ممكن تحصل.
كمان اتكلم عن حركة الجنيه من بداية السنة لغاية دلوقتي، يعني في 21 مارس حصل تخفيض مرة واحدة بنسبة 15% تقريبا، ومن ساعتها والجنيه في هبوط تدريجي لغاية ماوصلنا ل27 أكتوبر وحصل خفض تاني بنسبة 20% بس المرة دي كان في اتفاق مع صندوق النقد الدولي على قرض جديد.
وحسب رصده للسوق، التقييمات بخصوص خفض الجنيه في أكتوبر شافت ان النسبة مكنتش كفاية ولازم يكون في خفض جديد بنسبة أكبر، وده اللي شجع على عودة المضاربات على العملة في الفترة الأخيرة
بس من وجهة نظره، خطوة الخفض الجديد لقيمة الجنيه المصري مش هتبقى مجدية اوي، لأن عشان نستفيد من قرار زي ده لازم يكون عندنا قوة تصديرية.
يعني في منتجات نقدر ننافس بيها فعلا في السوق العالمي وفي الحالة دي لما نخفض الجنيه، أسعار المنتجات المصرية هيبقى سعرها اقل وتتباع اكتر، فتزيد الدولارات اللي داخلة البلد.
في الوقت نفسه، أكد إن القفزة في سعر الدولار سببها نقص السيولة في النظام البنكي ومع اعتماد قرض صندوق النقد الدولي في 16 ديسمبر، توقع إتاحة الدولار في السوق وبالتالي هيحصل تباطؤ ارتفاع سعر الدولار.
وده ياخدنا لتقرير بنك جولدمان ساكس الأمريكي، واللي قال فيه انه بيتم تدوال الجنيه باقل من قيمته الحقيقية، كمان وصول الدولار إلى 36 جنيه هو سعر مبالغ فيه جدا وناتج عن ضعف العرض أمام زيادة الطلب في سوق الصرف.
وفي نفس الوقت البنك توقع ان البنك المركزي برفع سعر الفايدة بنسبة 1% لكن في معاد اجتماعه الطبيعي 22 ديسمبر وماتكلمش عن اجتماع استثنائي زي مافي توقعات تانية بتقول.
هل ده رأيكم انتم كمان وفعلا حسن عبدالله هيفضل يرفع سعر الدولار تدريجيا ولا هيبقى في تعويم كامل؟ طيب تتوقعوا الدولار سعره هيوصل لكام؟
