الأنترو: عمرو دياب مش راحم، مقضيها بوس واحضان فى حفل افتتاح فندقة الجديد، كل اللى كان بيقابل عمرو دياب فى حفل الافتتاح كان بيبوسه ويحضنه، سواء ستات ولا رجالة ومنهم أبو هشيمة، وياسلام على الساعه اللى كان لابسها عمرو، دى طلعت حكايتها حكاية سعرها معدى الـ 10 مليون.
ايه اللى عمله عمرو دياب فى حفل افتتاح فندقة الجديد ؟ .. وايه حكاية الساعه أم 10 مليون اللى كان لابسها امبارح ؟ .. كل ده وأكتر هنعرفه مع بعض:
اللى حصل امبارح بليل لازم كلكم تعرفوه، الفنان عمرو دياب كان عامل سهره حلوه أمبارح على حس الفندق الجديد اللى افتتحه ودخل من خلاله عالم البيزنس، وأظاهر كده حفل امبارح كان عالى قوى والأمور فيه كانت عاليه على الأخر، كان فيه عدد كبير من المشاهير، وعمرو دياب كان بنفسه بيقابل الضيوف، كان كل اللى يقابله فى حفل امبارح كان ياخده بالحضن ويبوسه، سواء رجاله أو ستات مفيش تفرقة بين حد، كلهم أصحاب عمرو دياب وحبايبه والأمور بينهم فرى على الأخر، البوس والأحضان بينهم عادى، هما بحبوحين والدنيا بينهم لطيفة وحلوة على الأخر.
من ضمن المعازيم اللى شاركوا عمرو دياب امبارح فى حفل افتتاح فندقة الجديد كان رجل الأعمال الكبير قوى أحمد أبو هشيمة وأنتم عارفين أن الأتنين اصحاب قوى والعلاقة بينهم حلوة ولطيفة، بس الجمهور طبعا ماسبهمش فى حالهم اتعقدت مقارنات بين عمرو دياب وأحمد أبو هشيمة، وكان أبرز نقطة فى الحوار ده كله هى الساعه بتاعه عمرو دياب، عمرو كان لابس ساعه شيك قوى وأتضح أن سعرها معدى الـ 10 مليون جنيه.
موقع تحيا مصر الإخبارى راح سأل متخصصين فى الساعات وأتضح ان الساعه اللى كان لابسها عمرو دياب عامله على الأقل خالص 10 مليون جنيه، لأن الساعة وزي ما شايفين كده، الساعه جسمها مصنوع من الدهب الوردي عيار 18، أما سوار الساعه أو زى مابنقول إحنا عليه استيك الساعة، الأستيك طلع هو كمان مصنوع من الدهب عيار 18 ، يعنى الساعه كلها على بعضها دهب في دهب، ماهو عمرو دياب بردوا مايلبسش غير دهب، ده النجم الكبير اللى كل الناس بتحبه فى الوطن العربى، اغانية تقريبا فى كل بيت فى مصر ماعدى الناس اللى مابتحبش أصلا الأغانى.
وللى ميعرفش فيكم فا الفنان عمرو دياب بالفندق اللى عمله ده فاهوا كده أول مره يدخل عالم البيزنس، نقصد بيزنس الفنادق لأن ده أول فندق ليه بشراكة مع رجل الأعمال الكبير بردوا محمد العبار، يعنى المشروع ده كله على بعضه فلوس.
لحد هنا ونكون وصلنا لنهاية الفيديو وعرفناكم وعرفنا مع بعض البيزنس الجديد اللى دخل فيه الفنان الكبير عمرو دياب وكمان عرفنا مع بعض سر حضور رجل الأعمال الكبير أحمد أبو هشيمة حفل الافتتاح مع عمرو دياب، وكمان عرفنا ليه عمرو دياب كان بيبوس كل اللى داخلين حفل الافتتاح .. انتم بقى أيه رأيكم فى اللى عمله.
