أخبار الاقتصاد

لا تشتروا أي شئ قبل يوم الأحد ..رسالة جديدة من يوسف الحسيني يحذر المصريين

يوسف الحسيني يتوقع من جديد ويقول للمصريين كله يلزم مكانه ولا أحد ينفق أي أموال قبل يوم الأحد، فما سر اختيار يوم الأحد ، ولماذا فتح الدفاتر القديمة وذكر الجمهور بحديثه زمان والذي عرضة للكثير من الانتقادات والهجوم؟

اسمعوا مني انا كنت طالب شاطر اوي في الاقتصاد.. مين مشافش يوسف الحسيني وهو بيقول الكلمتين دول، لدرجة انه بقى تريند في مصر وناس كتير هاجمته.

أهو دلوقتي الإعلامي يوسف الحسيني ومن على شاشة التلفزيون المصري طالع بيقدم نصيحة جديدة للمصريين وبيطلب منهم يأجلوا شراء أي حاجة غالية ويستنوا لغاية الأحد الجاي.. بس ليه؟

الحسيني بيقول لكل مصري: تجار السوق السوداء بيلاعبوك، والأحد الجاي الدولارات هتدخل البنك المركزي، والبنوك هتبدأ تدبير العملة للمستوردين وده معناه أن السوق السوداء فنيتو وخلاص انتهت.

وعشان كده متوجعش دماغك باللص الكذاب اللي بيقول لك الدولار نزل لكن بدأ يرجع تاني وتعال ألحق اشتري العربية إحنا عملنا عرض على العربية لحضرتك منزلين فيها 10 %.

ومش بس كده يوسف الحسيني وجه كلامه لكل واحد بيتفرج عليه، وقاله نصيحة لوجه الله متشتريش حاجة دلوقتي، يعني لا تشتري عربية ولا تنزل تشتري ذهب ولا دولار، متوجعش دماغك بالقصة دي، أصبر أنت خسران إيه كلها أيام، والدولارات هتدخل المركزي

ده كمان حذر التجار اللي بيحاولوا يخدعوا الناس وماشيين في السوق بسعرين يعني لما بيشتروا الدولار من الناس بياخدوه بسعر قليل بحجه ان الدولار بينزل والعكس بيحصل لما يجوا يبيعه لانهم بيرفعوا السعر وبيقولوا الدولار رجع يزيد تاني.

وطبعا التجار استغل النقطه دي لصالحهم عشان يفضلوا رافعين اسعارهم رغم هبوط الدولار، وعندك مثلا تجار السيارات، خفضوا أسعارهم بنسبة 10 إلى 12% بس ، وده رغم انخفاض سعر الدولار بالسوق الموازية بمتوسط 22%.

وخد بالك ان الفلوس اللي بيتكلم عنها يوسف الحسيني هي فلوس صفقه راس الحكمه اللي هتدفعا الإمارات لمصر على دفعتين:

وخلاص زي ما أعلن الرئيس السيسي أن جزء منها اتحول خلاص للبنك المركزي.. واللي مصادر قالت حوالي 10 مليار دولار.. كمان فيه مبلغ تاني هيتحول يوم الجمعة الجاي.. وتقريبا حوالي 5 مليار دولار..

اما الدفعه الثانيه فهتكون خلال شهرين بقيمه 20 مليار، منهم 14 مليار دولار سيولة جديدة، و6 مليار ودايع في البنك المركزي.

وفي عز أزمة الدولار، كان طلع الحسيني في برنامجه خلال برنامج «التاسعة»، على القناة «الأولى» يقول الحقيقه ان انا كنت طالب شاطر جدا في الاقتصاد ومتخرج بامتياز وانا بقول لك الدولار مش هيوصل ل 20 جنيه ولا 25 جنيه ولا 30 جني

وبعد كده رجع يقول للناس محبة وجدعنة مني، اللي عنده دولار يطلعه ويوديه البنك.

ودلوقتي وبعد الاعلان عن صفقه راس الحكمه وكمان الاخبار عن صفقات جديده جايه في الطريق، كلنا شوفنا سعر الدولار بينزل في السوق السوداء.

عشان كده طلع يوسف الحسيني يقول: الناس فضلت ماسكه في التصريحات بتاعتي فتره كبيره بس أنا فعلا شاطر في الاقتصاد وطالع بامتياز، والدليل على كده انخفاض الدولار اللي بيحصل دلوقتي.

كمان اتكلم عن سيولة دولارية تانية هتدخل مصر قيمتها مابين 10 إلى 12 مليار دولار بعد الاتفاق مع صندوق النقد الدولي، وشايف ان كل المبالغ دي هانقذ مصر من ازمتها.

انت بقى رأيك من رأى يوسف الحسيني وشايف إن الصبر هو الحل، وبكره الدولار ينزل والأسعار تريح؟ ولا الاخضر هيرجع يفاجئنا تاني؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى