فن و مشاهير

مواقف أثارت الجدل في حفل محمد رمضان الأخير في أمريكا وسر سخرية الجمهور منه

الفنان محمد رمضان تخطت شعبيته حدود مصر والعالم العربي، ووصلت حفلاته إى أمريكا، ولكن ما حدث معه في حفله الأخير في أمريكا أصبح حديث الناس بعد ظهوره وهو يشد اجزاء على أحد المعجبين، تابعونا لمعرفة تفاصيل ما حدث:

انفعال محمد رمضان

وظهر الفنان محمد رمضان، في الفيديو واقف على المسرح عشان كان عنده حفلة في مدينة سان دييجو في ولاية كاليفورنيا في الولايات المتحدة وكان منفعل على واحد من اللي حاضرين الحفلة وكان رمضان منفعل أوي وواضح من الكلام اللي قاله إن في تصرف عمله المعجب ده استفز محمد رمضان، وغالباً كده المعجب ده عربي وأساء لحد من اللي حاضرين في الحفلة بردوا واللي مكانوش عرب.

إيه اللي قاله محمد رمضان؟

الفيديو اللي اتنشر لمحمد رمضان على مواقع التواصل الاجتماعي، واللي وضح انفعاله قال فيه: “حبيبي أنت بتخلي شكلنا كعرب وحش.. شكلنا مش حلو.. نستحمل بعض.. نستحمل بعض”، وفضل الجمهور يصقف لكلام محمد رمضان واللي بتوضح إن لازم التعامل مع غيرنا يكون باحترام، عشان صورة العرب في الغرب تكون حلوة محدش يقدر يمشط علينا حاجة.

الجمهور بيضحك ليه؟

المشكلة بقى إن الجمهور قعد يضحك في نهاية الفيديو اللي اتنشر ده وده كان بعد ما قال كلمتين كده بالإنجليزي بيطلب فيهم من الجاردات يقفلوا الباب، وكإن لسان حال الجمهور يقوله إنجليزي ده يا مرسي؟، وضحك الجمهور قابله رمضان بالضحك بردوا.

ليه نهى الحفل؟

الغريبة إن محمد رمضان كان محسود باين عليه في الحفلة دي ومكملتش على خير يعني بعد شوية من الحفل يشد أجزاء على مُعجب وبعدها تاني ينهي الحفل والسبب مش واضح الحقيقة هو شاف مجموعة من الحاضرين الحفل عمالين يصوتوا ولما حاول يتدخل ويفض الاشتباك المنظمين والجاردات بعدوه وتقريباً بعدها نصحوه ينهي الحفل ويتوكل على الله بقى كفاية لحد كده.

إيرادات فيلم هارلي

والفنان محمد رمضان أحيا حفلات الفترة اللي فات في الولايات المتحدة الأمريكية ودي جولة بيعملها في أكتر من ولاية ومعاه أسرته ومراته وولاده، وده طبعا عشان يشاركوه النجاح اللي محققه في رمضان وعيد الفطر اللي عدوا.

ومحمد رمضان اطمن على نجاحه بعد ما طرح فيلم هارلي في دور العرض السينمائي في مصر، وحقق إيرادات مرتفعة في وحصد تقريباً لحد دلوقتي أكتر من 30 مليون جنيه، وبتدور أحداثه حوالين شغل هارلي مهندس الميكانيكا مع إحدى العصابات، وبيصبح العنصر الأبرز والأقرب زعيم العصابة، وبعدين بتنقلب الأحداث وبيُقرر يبتعد عن مجال العصابة ووفاة أخوه.

مسلسل جعفر العمدة

وكمان محمد رمضان حقق نجاح كبير في موسم دراما رمضان 2023 بمسلسل جعفر العمدة، واتصدر محركات البحث في جوجل ومواقع التواصل الاجتماعي، بشخصية جعفر اللي اتجوز 4 ستات وكان بيدور على ابنه اللي غايب عنه من 19 سنة.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى