ساندوتش واحد يمنحك فرصة أن تأكل من مطعم بدون دفع أي نقود ولمدة شهر، هذا ما حدث مع شاب في مطعم شهير عندما طلب وجبة محشية آلاف الدولارات، تابعونا من خلال هذا التقرير لمعرفة ما حدث.
واقعة غريبة حصلت في مطعم ماكدونالدز بس قبل مانشوف تفاصيلها، لازم تعرف انك لو بتشوف أسعار ماكدونالدز غالية جوة مصر، تبقى غلطان، لأن الوضع برة مختلف تماما.
الأمريكان بيتعاملوا مع ماكدونالدز على انها شركة بتقدم وجبات سريعة بجودة متوسطة مقابل سعر رخيص، يعني مش مطعم فخم ولاحاجة.
وده بيخلي وجبات ماكدونالدز مناسبة لكل الطبقات في أمريكا، ومن ضمنهم شاب أمريكي دخل فرع للمطعم في شمال إن ديانا عشان يطلب وجبة نقانق تمنها ميعديش دولارات.. لكنه اتفاجأ بالمطعم بيديه 5 آلاف دولار، يعني حوالي 15 ألف جنيه مرة واحدة..
وطبعا جوشيا فارغاس ماكتشفش الواقعة في ساعتها، اللي حصل انه خد الطلب وساب المطعم، وبعد ماركي عربيته وجه يفتح الطلب لقى معاه شنطة فيها مبلغ كبير الاف من الدولارات.
وهنا الشاب الأمريكي بدأ يفكر يرجع الفلوس ولا لأ، والمشكلة الأكبر انه كان محتاج فلوس فعلا والظروف المالية مقصرة معاه، لدرجة انه سأل نفسه: ليه المطعم يحطه في اختبار صعب زي ده في عز أزمته؟
وأخيرا قرر فارغاس انه يرجع المبلغ لانه شاب كويس زي مابيقول وده التصرف الصح فدخل عليهم المطعم ومعاه الفلوس وبيقولهم: : “ليه تعملوا فيا كده انتوا مش عارفين انا محتاج المبلغ ده قد إيه؟
ومش بس كده حس الفكاهة كان مسيطر على الموقف كله وده ظهر أكتر لما الشاب سأل الموظفين : انتوا شغالين هنا في غسيل الأموال؟
أما بقى لو بتسأل عن رد فعل الموظفين ومين صاحب ال5 آلاف دولار؟ فحسب فارغاس واحدة من الموظفات مكنتش مصدقة نفسها ومن فرحتها قالته عاوزة احضنك.
ومش بس هي، كل الموظفين كانوا بيحضنوه ويشكروه وهما بيعيطوا، ومن شدة تأثرهم بشهامة فارغاس قرروا يدوه وجبات ماكدونالدز مجانا لمدة شهر بعد ما رجع الفلوس ليهم.
لا وإيه كمان، لما ركب عربيته وبعد عن المطعم، موظفين ماكدونالدز اتصلوا ليه والدوله 200 دولار.ومن كتر المشاعر اللي سيطرت على فارغاس والموظفين الشاب الأمريكي نشر فيديو بيحكي فيه القصة ونقل فيه رد فعل الموظفين.
وفي الاخر قال للمتابعين على السوشيال ميديا: اعملوا الخير.. رجعوا 5 آلاف دولار واحصلوا على 200 دولار ووجبات طعام مجانية لمدة شهر.. اعتقد أنها صفقة رائعة.
وواضح كده من الفيديو أن الفلوس دي كانت ايراد المطعم لانه متقسمة لكذا جزء وكل الموظفين فرحوا جدا برجوعها.
فهل سبق واتعرضتوا انتوا كمان لموقف مشابه وانتوا بتحاسبوز في مطعم أو سوبر ماركت واكتشفتوا انكم خدتوا اكتر من حقكم حتى لو كان مبلغ بسيط مش 15 ألف جنيه؟
