بعد اعلان الحكومه الموافقه الرسميه على اعفاء وردات الذهب للمصريين في الخارج من الجمارك، ظهرت اسئله كثيرة.والكثير منا يريد أن يعرف كيف يقوم بحسابها وشروط الاستفادة من المبادرة؟ وهل الاعفاء الجمركي سيطبق على كل انواع الدهب؟
في البدايه لازم تعرف ان الاعفاء على واردات الدهب هيكون من الضريبه الجمركيه واي رسوم تانيه، لكن ضريبه القيمه المضافه لسه موجودة وهتدفعها ودي قيمتها 14% من قيمه الدهب اللي هتدخل بيه مصر.
طيب هتتحسب ازاي؟
حسب بوست منتشر على الفيسبوك خلينا نفترض ان معاك دهب وزنه 150 جرام، سواء بقى كان مشغولات أو سبايك، المهم ان تثمين الدهب بيتحدد بناء على سعر اليوم.
وفي الحالة دي لو معاك 150 جرام دهب عيار 21 وسعر الجرام 2550 جنيه مثلا، يبقى تمن 150 جرام هو 382 ألف و500 جنيه.
هنضرب المبلغ ده في 14%، هتطلع قيمة الضريبة المضافة 53 ألف و550 جنيه، أما بقى لو معاك دهب 150 جرام بس عيار 24، وسعر الجرام فيه 2914، يبقى كده تمنه 437 ألف و100 جنيه.
وعشان نحسب الضريبة المضافة بس من غير اي رسوم تانية هنضرب 437 ألف و100 جنيه ×0.14، و هتطلعنا قيمة الضريبة: 61 ألف و 194 جنيه
وطبعا ده من غير حساب رسوم الدمغ والفحص والتثمين، ورسوم التثمين لوحدها بتوصل إلى 1% من القيمة الإجمالية للسبايك بس.
فلو اطبقت على السبيكة عيار 24 هتبقى قيمتها 43 ألف و710 جنيه.يعني كده لو هتدفع ضريبة القيمة المضافة + رسوم التثمين، يبقى الاجمالي 104 ألف و 904جنيه، لكن لو هتدفع ضريبة القيمة المضافة بس المبلغ هيبقى 61 ألف و 194 جنيه.
لكن على الناحية التانية، شعبة الدهب أكدت إن ضريبة القيمةالمضافة بتتحسب على قيمة المصنعية مش قيمة الدهب، حسب موقع القاهرة 24.
وحاليا قيمة ضريبة القيمة المضافة على جرام عيار 24: 9.24 جنيه.وعلى جرام عيار 21: 6.16 جنيه.وعلى جرام عيار 18: 9.24 جنيه.
ما شروط الاستفاده من المبادرة؟
1. الإعفاء هيطبق على الأشكال نصف المشغولة، والمُعدة للتداول النقدي والحُلي والمجوهرات وأجزائها من معادن ثمينة.
2. الاعفاء ده مش متاح على أصناف اللؤلؤ الطبيعي، أو المزروع، أو الأحجار الكريمة، أو شبه الكريمة المركبة، أو المُرصعة على الحلي والمجوهرات وأجزائها.
3. مدة الإعفاء 6 شهور بس
4. الاعفاء هيكون على الضريبة الجمركية والرسوم التانية، بس ضريبة القيمة المضافة موجودة وهتدفعها زي ماقلنا في أول التقرير.
المفاجأة الكبيرة بقى ان ما فيش حد اقصى للكمية اللي ممكن تدخل بيها، ده اللي اكده مساعد وزير التموين، دكتور ابراهيم عشماوي في تصريحه على قناة صدى البلد.
وقال ان القرار جه في وقت مناسب، لان ده موسم نزول المصريين لمصر عشان يقضوا الاجازات مع أهلهم.وبكده أي حد منهم يقدر يجيب الكمية اللي عاوزها من السبايك والجنيهات الدهب، ويدخل بيها من المواني او المطارات ويدفع عليها ضريبه القيمة المضافه بس.
ودلوقتي بقى نيجي لسؤال مهم: الناس اللي جوة مصر هتستفيد من المبادرة دي ازاي؟
المبادره دي هتزود حجم المعروض من الدهب في السوق، وبالتالي هتقدر تشتريه بقيمه عادلة مش بأعلى من السعر العالمي زي ما كنا بنشوف الايام اللي فاتت.
وعشان الاسعار في السوق تظبط ممكن نشوف تحسنات على بداية الاسبوع الجاي، ومع الوقت هتلاقي سعر الذهب في مصر مساوي مثلا لسعر الذهب في السعوديه والإمارات.
ودلوقتي قولي لنا بقى لو انت شغال بره مصر شايف المبادره مناسبه ليك؟
